Read Кыргыз тилиндеги Библия, 2004 Накыл 26 Bible Online

Накыл 26 - Кыргыз тилиндеги Библия, 2004 bible

Накыл 26

¹Акылсыз адамга көрсөтүлгөн урмат жайында жааган кардай, оруу-жыюу маалында жааган жамгырдай орунсуз.

²Жөн жерден айтылган каргыш таранчынын бырп этип, чабалекейдин шуу этип учуп кеткениндей, ал орундалбайт.

³Камчы ат үчүн, жүгөн эшек үчүн, ал эми таяк акылсыздар үчүн.

⁴Акылсыз адамга акылсыздыгына жараша жооп бербе, болбосо өзүң да ага окшоп акылсыз болуп каласың.

⁵Акылсыз өзүн акылдуу эсептеп калбашы үчүн, ага акылсыздыгына жараша жооп бер.

⁶Акылсызды чабарман кылуу өз бутун өзү кескенге барабар, анткен адам балээни башына үйөт.

⁷Акылсыздардын накыл айтканы аксактын басыгындай.

⁸Асыл ташты салмоорго салып ыргытуу акылсызга урмат көрсөтүүгө барабар.

⁹Акылсыздын оозунан чыккан накыл сөз мастын колундагы тикенектей.

¹⁰Күчтүү адам бардык нерсени өз каалоосу боюнча кылат: ал акылсызды да сыйлайт, өтүп бара жаткан кишини да сыйлайт.

¹¹Дөбөт өзүнүн кусундусуна кайра келгендей, акылсыз да акылсыздыгын кайра кайталай берет.

¹²Өзүн акылман эсептеген адамды көрдүң беле? Ага караганда акылсыз адамга көбүрөөк үмүттөнсө болот.

¹³Жалкоо адам: «Жолдо арстан турат! Аянтта арстан турат!» – дейт.

¹⁴Эшик өзүнүн ашык-машыгында айланат, ал эми жалкоо өзүнүн төшөгүндө оонайт.

¹⁵Эринчээк адам колун чөйчөккө сунат, бирок аны оозуна жеткирүү – ал үчүн кыйын иш.

¹⁶Жалкоо өзүн ойлонуп жооп берген жети кишиден акылдуу эсептейт.

¹⁷Өтүп бара жатып бирөөнүн чыр-чатагына кийлигишүү дөбөттү кулактан алганга барабар.

¹⁸Акылынан ажырамыш болуп, оттуу өлүм жебелерин ыргытуу

¹⁹досуна эки жүздүүлүк менен зыян келтирип туруп: «Мен тамашалап эле койдум», – дегенге барабар.

²⁰Отун жок жерде от өчөт, ушакчы жок жерде чатак басылат.

²¹Жыгачтын көмүрү ысытат, отун отту тутантат, ал эми урушчаак адам чыр-чатак чыгарат.

²²Ушакчынын сөздөрү таттуу нерсе сыяктуу, алар адамдын карынына кирип кетет.

²³Таза эмес жүрөктөн чыккан жагымдуу сөздөр таза эмес күмүш менен капталган чопо идиштей.

²⁴Душман тили менен анткорлонуп сүйлөйт, бирок жүрөгүндө жамандык ойлоп турат.

²⁵Ал назик үн менен сүйлөсө да, ага ишенбе, анткени анын жүрөгүндө жети кыянатчылык бар.

²⁶Эгерде жек көргөнүн билгизбей алдап жүрсө, анда анын ачуусу эл чогулган жерде билинет.

²⁷Бирөөгө ор казган адам орго өзү түшөт, тоголоткон ташы тоголоткон адамдын өзүнө келип тиет.

²⁸Жалганчы тил өзү ыза кылган адамдарды жек көрөт, кошоматчы ооз бирөөгө жыгылуу даярдайт.