Read Кыргыз тилиндеги Библия, 2004 Накыл 27 Bible Online

Накыл 27 - Кыргыз тилиндеги Библия, 2004 bible

Накыл 27

¹Эртеңки күн менен мактанба, анткени эртеңки күнү эмне болорун билбейсиң.

²Сени өз оозуң эмес, башка бирөөнүн оозу мактасын. Сени өз тилиң эмес, бөлөк бирөөнүн тили мактасын.

³Таш оор, кум да салмактуу, бирок акылсыздын ачуусу экөөнөн тең оор.

⁴Каар катаал, жаал тыйылгыс, бирок кызганчаактыкка ким туруштук бере алат?

⁵Жашыруун сүйүүгө караганда ачык айтылган ашкере жакшы.

⁶Сүйгөн адамдын жемеси чын жүрөктөн чыгат, жек көргөн адамдын өбүүсү жалган.

⁷Курсагы ток адам балды да тебелейт, ачка кишиге ачуунун баары таттуу.

⁸Өз жерин таштап кеткен адам уясын таштап кеткен канаттуудай.

⁹Жыпар жыттуу майлоочу май жана түтөтүлүүчү зат жүрөктү кубантат, адамга досунун чын жүрөктөн берген кеңеши да ошондой жагымдуу.

¹⁰Өз досуңду да, атаңдын досун да таштаба. Башыңа мүшкүл түшкөн күнү бир тууганыңдын үйүнө барба, алыстагы бир тууганыңдан жаныңдагы кошунаң артык.

¹¹Уулум, акылдуу бол, менин жүрөгүмдү кубант. Ошондо мага жаман сүйлөгөн адамга жооп бере алам.

¹²Акылдуу адам кырсыкты көрүп жашынат, ал эми тажрыйбасыздар түз барып кырсыкка учурашат.

¹³Бирөөгө кепил болгон адамдын көйнөгүн алып кал, чоочун бирөө үчүн кепил болгон адамдан күрөө ал.

¹⁴Досун таң заардан катуу мактай баштаган адамды жамандап жаткан адам катары эсептешет.

¹⁵Ажаан аял жамгыр жааган күнү тынымсыз тамчылаган тамчыдай,

¹⁶аны жашыргысы келген адам шамалды жашыргысы келген адамдай жана өзү жөнүндө билдирип турган майды оң колуна жашыргысы келген адамдай.

¹⁷Темирди темир курчутат, адамды адам курчутат.

¹⁸Анжырды кайтарган адам анын мөмөсүн жейт. Мырзасын сактаган адам урматка ээ болот.

¹⁹Адамдын жүзүнүн кандай экенин суу көрсөтөт, адамдын өзү кандай экенин жүрөгү көрсөтөт.

²⁰Өлгөндөр жаткан жай менен Абадон – тойбогон жай. Адамдын көзү да ошолор сыяктуу эле тойбойт.

²¹Күмүш үчүн эритүүчү меш, алтын үчүн көөрүктүн очогу кандай болсо, адам үчүн аны мактаган ооз ошондой.

²²Акылсызды сокуга салып, сокбилек менен жанчсаң да, андан акылсыздык ажырабайт.

²³Бодо малыңды жакшы кара, майда малыңды бак.

²⁴Анткени байлык түбөлүк эмес, ал тургай, бийлик да муундан муунга өтпөйт.

²⁵Чөп чабылат, кайра чөп чыгат, анан тоонун чөбү чабылат.

²⁶Койлоруң кийим, эчкилериң жер сатып алууга кетет.

²⁷Эчкинин сүтү өзүңдүн да, үйүңдөгүлөрдүн да, үйүңдөгү күңдөрүңдүн да тамак-ашына жетет.