Read Кыргыз тилиндеги Библия, 2004 Накыл 29 Bible Online

Накыл 29 - Кыргыз тилиндеги Библия, 2004 bible

Накыл 29

¹Айыбы ашкереленген адам моюн сунбай өжөрлөнүп койсо, күтүлбөгөн жерден кыйрайт, дартына даба табылбайт.

²Адил адамдар көбөйө баштаганда, эл шаттыкка бөлөнөт, ал эми мыйзамсыз адам үстөмдүк кылганда, эл онтойт.

³Акылмандыкты сүйгөн адам атасын кубантат, ал эми бузулган аялдар менен жүргөн адам мал-мүлктү чачат.

⁴Падыша акыйкаттык менен жерди бекемдейт, ал эми алык-салыкты көбөйткөн падыша аны жакырчылыкка алып келет.

⁵Досуна кошомат кылган адам анын бутуна тузак тартат.

⁶Жаман адамдын күнөөсү өзүнө жайылган тор болот, ал эми адил адам кубанып, шаттанып жүрөт.

⁷Адил адам жакырлардын ишин кылдаттык менен териштирет, ал эми мыйзамсыз адам ишти териштирбейт.

⁸Бузулган адамдар шаарды дүрбөлөңгө салышат, ал эми акылдуу адамдар дүрбөлөңдү басышат.

⁹Акылдуу адам акылсыз адам менен соттошкондо, ачууланса да, күлсө да тынчтыгын жоготот.

¹⁰Канкор адамдар ак ниет адамды жек көрүшөт, ал эми адил адамдар анын өмүрү үчүн кам көрүшөт.

¹¹Акылсыз адам бүт каарын чачат, ал эми акылдуу адам ачуусун басат.

¹²Эгерде башкаруучу жалган сөз угуп жатса, анда анын кызматчыларынын баары – мыйзамсыз адамдар.

¹³Жакыр менен паракор кезигишпей койбойт, экөөнө тең жарыкты Теңир берет.

¹⁴Эгерде падыша кембагалдарды акыйкат соттосо, анда анын тагы түбөлүккө бекемделет.

¹⁵Чыбык жана ашкерелөө акылмандык берет, бирок өз эркине коюлган уул энесин уятка калтырат.

¹⁶Мыйзамсыз адамдар көбөйгөндө, мыйзамсыздык көбөйөт, бирок адил адамдар алардын кыйраганын көрүшөт.

¹⁷Уулуңду жазала, ошондо ал жаныңа тынчтык берип, кубаныч тартуулайт.

¹⁸Кудайдан аян болмоюнча, эл ооздукталбайт, ал эми Кудайдын мыйзамын сактаган адам бактылуу.

¹⁹Кулду сөз менен үйрөтө албайсың, анткени ал сөздү түшүнсө да, тил албайт.

²⁰Алды-артын ойлобой сүйлөгөн адамды көрдүң беле? Ага үмүттөнгөнгө караганда, акылсызга көбүрөөк үмүттөнсө болот.

²¹Эгерде кулду бала чагынан эркелетип тарбияласаң, акыры ал сага бала болгусу келет.

²²Каардуу адам чыр-чатак чыгарат, ачуусу чукул адам көп күнөө кылат.

²³Адамды өзүнүн текебердиги кемсинтет, ал эми момун адам урматка ээ болот.

²⁴Ууру менен үлүштөш болгон адам өз жанын жек көрөт, ал каргыштарды укса да, бул жөнүндө эч кимге айтпайт.

²⁵Адамдардан коркуу тузак коёт, ал эми Теңирден үмүттөнгөн адам коопсуз болот.

²⁶Адамдардын көбү башкаруучунун алдында ырайым тапкысы келет, бирок адамдын тагдыры Теңирдин колунда.

²⁷Мыйзамсыз адам адил адамдар үчүн жийиркеничтүү, түз жол менен жүргөн адам мыйзамсыз адам үчүн жийиркеничтүү.