Read Кыргыз тилиндеги Библия, 2004 Накыл 3 Bible Online

Накыл 3 - Кыргыз тилиндеги Библия, 2004 bible

Накыл 3

¹Уулум! Менин акыл-насаатымды эсиңден чыгарба, жүрөгүң осуяттарымды сактасын.

²Анткени алар сага узун өмүр, узак өмүр жаш, тынчтык берет.

³Сени ырайым менен чындык таштабасын. Буларды мойнуңа байлап ал, жүрөгүңдүн лоокторуна жазып ал,

⁴ошондо Кудайдын жана адамдардын алдында ырайым жана жакшылык табасың.

⁵Бүт жүрөгүң менен Теңирден үмүттөн, өз акылыңа таянба.

⁶Бардык жолдоруңда Кудайды таанып бил, ошондо Ал сенин жолдоруңду багыттайт.

⁷Өзүңдү акылман эсептебе, Теңирден корк, жамандыктан кач.

⁸Бул денеңе саламаттык, сөөгүңө азык болот.

⁹Теңириңе мал-мүлкүң менен, алгачкы кирешең менен урмат көрсөт.

¹⁰Ошондо кампаларың ашыгы менен данга толот, жүзүм сыгылуучу жайыңдан жаңы шарап ашып-ташып төгүлүп турат.

¹¹Уулум, Теңирдин жазасын четке какпа, Анын айыбыңды ачканын оор көрбө.

¹²Анткени Теңир сүйгөн адамын жазалайт, ага атасы уулуна ырайым кылгандай ырайым кылат.

¹³Акылмандыкты издеп тапкан, акылга ээ болгон адам бактылуу!

¹⁴Анткени акылга ээ болуу күмүшкө ээ болуудан артык, анын жемиши алтындан артык.

¹⁵Ал асыл таштардан кымбат. Сен каалагандардын ичинен ага эч нерсе тең келбейт.

¹⁶Анын оң колунда – узун өмүр, сол колунда – байлык менен атак-даңк.

¹⁷Анын жолу – жагымдуу жол, анын бардык жолу – бейпилдик.

¹⁸Ага ээ болгондор үчүн ал – өмүр дарагы, аны сактагандар – бактылуу адамдар!

¹⁹Теңир жерди кеменгерлиги менен негиздеген, асманды акылмандыгы менен орноткон.

²⁰Анын акылмандыгы менен түпсүз туңгуюктар ачылган, булуттар шүүдүрүм себелейт.

²¹Уулум! Булардан көзүңдү алба, туура ой жүгүртүүнү, эстүүлүктү сакта,

²²алар жаның үчүн өмүр, мойнуң үчүн мончок болот.

²³Ошондо өз жолуңду коркпостон улайсың, мүдүрүлбөйсүң.

²⁴Жатканыңда коркпойсуң, уйкуң таттуу болот.

²⁵Күтүлбөгөн коркунучтан, мыйзамсыздардын кол салганынан коркпойсуң.

²⁶Анткени Теңир сенин таянычың болот, бутуңду тузактан сактайт.

²⁷Жакшылык кылууга мүмкүнчүлүгүң бар болуп турганда, муктаж болгон адамга жакшылык кылуудан баш тартпа.

²⁸Жаныңда бар болуп туруп, досуңа: «Эртең кел, эртең берем», – дебегин.

²⁹Сени менен капарсыз жашап жаткан жакыныңа жамандык кылууну ойлобо.

³⁰Сага жамандык кылбаган адам менен себепсиз чатакташпа.

³¹Зордук-зомбулук кылган адамга көз артпа, анын жолдорунун бирине да түшпө.

³²Анткени бузулган адам Теңирдин алдында жийиркеничтүү, ал эми адил адамдар менен Анын байланышы бар.

³³Теңирдин каргышы мыйзамсыздын үйүнүн үстүндө, ал эми адил адамдардын үйүнө Ал батасын берет.

³⁴Эгерде Ал шылдыңчыл текеберлерди уятка калтырып жатса, анда момундарга ырайым кылат.

³⁵Акылмандар атак-даңкты, акылсыздар маскарачылыкты мурасташат.