Read Кыргыз тилиндеги Библия, 2004 Накыл 30 Bible Online

Накыл 30 - Кыргыз тилиндеги Библия, 2004 bible

Накыл 30

¹Жакеп уулу Агурдун сөздөрү. Ал кишинин Итиелге жана Ухалга айткан, адамды шыктандырган накыл сөздөрү мындай:

²«Чындыгында, эл ичинде мен эң акылсыз адаммын, менде адамдык акыл жок.

³Мен акылмандыкты да үйрөнө алган жокмун, менде ыйык адамдарда болгон Кудайды таанып билүү да жок.

⁴Асманга көтөрүлүп, кайра түшкөн барбы? Шамалды чогултуп, кош уучуна салып алган барбы? Сууну кийимине түйүп алган барбы? Жердин бүт чектерин ким койду? Анын аты ким? Анын баласынын аты ким? Билесиңби?

⁵Кудайдын ар бир сөзү таза, Ал – Өзүнө таянгандарга калкан.

⁶Ал сени ашкерелебеши үчүн, алдамчы болуп калбашың үчүн, Анын сөздөрүнө эч нерсе кошпо.

⁷Мен Сенден эки нерсе сурайын, орундатпай койбо:

⁸бул жашоомдо менден курулай убаракерчиликти жана алдамчылыкты алыс кыл, мени бай да, жакыр да кылба, мени күндөлүк турмушта эң зарыл болгон нан менен камсыз кыл.

⁹Ашыра тоюп алып, Өзүңдөн баш тартпайын, “Теңир ким?” деп айтпайын же жакырданып кетип, уурулук кылбайын, Кудайымдын атын курулай атабайын.

¹⁰Каргышына калбашың үчүн, күнөөлүү болуп калбашың үчүн, кулду мырзасынын алдында жамандаба.

¹¹Атасына наалат айткан, энесине ыраазы болбогон адамдар бар.

¹²Өзүнүн ыпыластыгынан жуулбай туруп, өзүн тазамын деп эсептеген адамдар бар.

¹³Менменсинген, боюн көтөргөн адамдар бар.

¹⁴Жер үстүндөгү жакырларды жана эл ичиндеги жарды-жалчыларды жей турган тиштери кылыч, жаактары шамшар болгон адамдар бар.

¹⁵Тойбостун “Келе, келе” деген эки кызы бар. Тойбогон үч нерсе бар, “Жетет” дебеген төрт нерсе бар.

¹⁶Булар: өлгөндөр жаткан жай жана тукумсуз жатын, сууга тойбогон жер жана “Жетишет” дебеген от.

¹⁷Атасын мыскылдаган, энесине баш ийбеген көздү чөл кузгундары чокуп салат, бүркүттүн барчындары жеп салат.

¹⁸Мен үчүн үч нерсе кол жеткис, төрт нерсени түшүнбөйм:

¹⁹асмандагы бүркүт жолу, аскадагы жылан жолу, деңиздеги кеме жолу, кызга барган жигиттин жолу.

²⁰Бузулган аялдын жолу да ошондой: жеп бүтүп, оозун аарчып: “Мен эч кандай жамандык кылган жокмун”, – дейт.

²¹Yч нерседен жер солкулдайт, төрт нерсени көтөрө албайт:

²²кулдун падыша болгонуна, акылсыздын нанды тоё жегенине,

²³бузулган аялдын күйөөгө тийгенине, күңдүн өзүнүн мырзайымынын ордун ээлеп алганына.

²⁴Жер үстүндө төрт майда жаныбар бар, бирок алар акылдуулардан да акылдуу:

²⁵кумурскалар, күчтүү эл эмес, бирок алар өздөрүнүн азыгын жайында камдап алышат;

²⁶тоо чычкандары, алсыз эл, бирок алар үйлөрүн аскаларга салышат;

²⁷чегирткелер, алардын падышасы жок, бирок бардыгы тизилип чыгышат;

²⁸жөргөмүштөр, алар буттары менен илинип турушат, бирок падышанын ак сарайларында болушат.

²⁹Басканы сонун үч нерсе бар, жүрүшү укмуш төрт нерсе бар:

³⁰арстан, ал – жырткычтардын эң күчтүүсү, эч кимге жол бербейт;

³¹жылкы, эчки жана өз элинин арасындагы падыша.

³²Эгерде сен өзүңдүн текебердигиң менен акылсыздык кылып, бирөөгө жамандык ойлогон болсоң, анда колуң менен оозуңду жап.

³³Анткени сүттү бышса май түшөт, мурунга урса кан чыгат, ошондой эле ачууну козгосо чатак чыгат».