Read Кыргыз тилиндеги Библия, 2004 Накыл 31 Bible Online

Накыл 31 - Кыргыз тилиндеги Библия, 2004 bible

Накыл 31

¹Лемуел падышанын сөздөрү. Энесинин ага айткан акыл-насааттары булар:

²«Эмне болду, уулум? Эмне болду, жатынымдан чыккан уулум? Эмне болду, убада берип төрөгөн уулум?

³Күчүңдү аялдарга бербе, жолдоруңду падышаларды ойрон кылган бузулган аялдарга бербе.

⁴Лемуел, падышаларга шарап, мырзаларга күчтүү ичимдик ичкенге болбойт.

⁵Алар ичкилик ичип алып, мыйзамды унутуп коюшпасын, эзилгендерге адилетсиздик кылышпасын.

⁶Ичкиликти өлүп бара жаткан адамга бергиле, шарапты кайгыга баткан адамга бергиле.

⁷Ал ичип, жакырлыгын унутсун, өзүнүн кайгысын эсинен чыгарсын.

⁸Оозуңду сүйлөй албай тургандар үчүн, жетимдерди коргош үчүн ач.

⁹Оозуңду акыйкаттык үчүн, алсыздар менен жарды-жалчылардын иши үчүн ач».

¹⁰Ким жакшы аял таба алат? Анын баасы асыл берметтерден да жогору.

¹¹Ага күйөөсүнүн жүрөгү ишенет, күйөөсү кирешесиз калбайт.

¹²Ал күйөөсүнө өмүрү өткөнчө жамандык менен эмес, жакшылык менен гана кайтарат.

¹³Ал жүн, зыгыр буласын өндүрөт, өз колу менен чын жүрөктөн иштейт.

¹⁴Ал аял соодагерлердин кемелерине окшоп, өзүнүн нанын алыстан табат.

¹⁵Ал таң ата электе эле туруп, үйүндөгүлөргө тамак берип, күңдөрүнө белгиленген иштерди тапшырат.

¹⁶Жер алгысы келсе, ага да ээ болот. Өз колунун жемиши менен жүзүмзар отургузат.

¹⁷Белин бекем бууп, булчуңдарын чыңайт.

¹⁸Ал өз ишинин жакшы экенин сезет, анын чырагы түн ичинде да өчпөйт.

¹⁹Колун жип ийрүүчү чарыкка сунат, колуна ийик алат.

²⁰Жардыларга алаканын ачат, муктаж болгондорго колун сунат.

²¹Суук болгондо үй-бүлөм үшүйт деп коркпойт, анткени анын бүт үй-бүлөсү эки сыйрадан кийим кийген.

²²Ал өзүнө килем согот, ак мата менен кызыл шайыдан кийим киет.

²³Анын күйөөсү – кадырлуу адам, дарбаза алдында уруу аксакалдары менен отурат.

²⁴Ал жабуу жасап сатат, финикиялык соодагерлерге кур жеткирет.

²⁵Күч менен сулуулук – анын кийими, ал келечекке кубанычтуу карайт.

²⁶Акылмандык менен сүйлөйт, момундук менен акыл-насаат айтат.

²⁷Ал өз үйүндөгү чарбасына көз салат, бекер тамак жебейт.

²⁸Балдары туруп, аны сыйлашат, күйөөсү туруп, аны мактайт:

²⁹«Жакшы аялдар көп болгон, бирок сен алардын баарынан ашып түштүң».

³⁰Сүйкүмдүүлүк алдап кетет, сулуулук өтүп кетет, бирок Теңирден корккон аял мактоого татыктуу.

³¹Ага өз колунан чыккан жемишинен бергиле, иштери аны дарбаза алдында даңктасын!