Read Кыргыз тилиндеги Библия, 2004 Накыл 4 Bible Online

Накыл 4 - Кыргыз тилиндеги Библия, 2004 bible

Накыл 4

¹Балдар, атаңардын акыл-насаатын уккула, акыл-эстүү болуу үчүн кулак салгыла!

²Анткени мен силерге жакшы сабак бердим. Менин осуяттарымды таштабагыла.

³Анткени мен да бир кезде атамдын уулу элем, энемдин жалгыз, сүйүктүү уулу элем.

⁴Ошондо атам мага акыл үйрөтүп: «Жүрөгүңө менин сөздөрүмдү тутуп ал, осуяттарымды сактап жаша», – деген.

⁵Даанышмандыкка ээ бол, акылмандуулукка ээ бол. Муну эсиңден чыгарба, менин айткандарымдан четтебе.

⁶Менин сөзүмдү таштаба, ошондо ал сени сактап жүрөт; аны сүй, ошондо ал сени коргоп жүрөт.

⁷Эң негизгиси – акылмандык. Акылмандыкка ээ бол, бардык мал-мүлкүң менен акыл-эстүүлүккө ээ бол.

⁸Аны бийик бааласаң, ал сени бийикке көтөрөт. Эгерде ага жабышсаң, ал сенин даңкыңды чыгарат.

⁹Ал сенин башыңа эң сонун гүлчамбар кийгизет, эң сонун таажыга жеткирет.

¹⁰Кулак сал, уулум, менин сөздөрүмдү кабыл ал, ошондо өмүрүң узарат.

¹¹Мен сага акылмандыктын жолун көрсөтүп жатам, түз жол менен алып бара жатам.

¹²Бара жатканыңда жолуң тарыбайт, чуркап жөнөсөң мүдүрүлбөйсүң.

¹³Акыл-насааттарды бекем карма, аны таштаба, сактап жүр, анткени ал сенин өмүрүң.

¹⁴Мыйзамсыздардын жолуна түшпө, зулумдардын жолу менен жүрбө.

¹⁵Ал жолду ташта, ал жол менен баспа, ал жолго жолобо, ал жолдон кыя өт.

¹⁶Анткени алар жамандык кылмайынча укташпайт, бирөөнү кулатмайынча, алардан уйку качат.

¹⁷Анткени алар мыйзамсыздык менен нан таап жешет, уурдалган шарап ичишет.

¹⁸Адил адамдардын жолу – жаркыраган чырак, ал толук жарык киргенге чейин уламдан-улам жаркырай берет.

¹⁹Мыйзамсыздардын жолу – караңгылык, алар эмнеге мүдүрүлөрүн билишпейт.

²⁰Уулум! Менин сөздөрүмө кулак сал, айткандарыма кулагыңды төшө!

²¹Алар сенин көз алдыңдан кетпесин, аларды жүрөгүңдүн түпкүрүндө сакта.

²²Анткени ал – аны тапкандар үчүн өмүр, бүт денеси үчүн – саламаттык.

²³Баарынан да, сактай тургандардан жүрөгүңдү сакта, анткени өмүрдүн булагы анда.

²⁴Калп айтуудан баш тарт, анткорлонуп сүйлөөдөн кач.

²⁵Көзүң түз карасын, көз карашың түз болсун.

²⁶Басар жолуңду ойлонуп бас, ошондо сенин бүт жолуң бекем болот.

²⁷Оңго да, солго да бурулба, бутуңду жаман жолдон алыс кыл.