Read Кыргыз тилиндеги Библия, 2004 Накыл 5 Bible Online

Накыл 5 - Кыргыз тилиндеги Библия, 2004 bible

Накыл 5

¹Уулум! Акыл-эстүү болушуң үчүн, оозуңда билим болушу үчүн, менин даанышмандык менен айткан сөздөрүмө кулак сал, акылмандык менен айткан сөздөрүмө кулак төшө.

³Анткени башка бирөөнүн аялы тилинен бал тамызып сүйлөйт, сүйлөгөн сөздөрү зайтун майынан да жумшак.

⁴Бирок анын акыры эрмендей ачуу, эки миздүү кылычтай курч.

⁵Анын буту өлүмгө алып барат, таманы өлгөндөр жаткан жайга түшүрөт.

⁶Эгерде сен анын баскан жолун билгиң келсе, анын жолдору туруктуу эмес, ошондуктан сен аларды биле албайсың.

⁷Ошондуктан, балдарым, мени уккула, менин оозумдан чыккан сөздөрдөн четтебегиле.

⁸Ал аялдан алыс жүр, анын үйүнүн эшигине жакын барба,

⁹болбосо ден соолугуңду башкаларга алдырасың, өмүрүңдү кыйноочуга бересиң,

¹⁰күчүңө башка бирөөлөр тоёт, эмгегиң башка бирөөнүн үйүнө кетет.

¹¹Дене-мүчөң күч-кубаттан ажыраганда, онтоп,

¹²мындай деп айтасың: «Эмне үчүн мен акыл-насаатты жек көрдүм экен, эмне үчүн жүрөгүм ашкерелөөнү капарына албады экен?

¹³Эмне үчүн устаттарымдын үнүн укпадым экен, эмне үчүн насаатчыларыма кулак төшөбөдүм экен?

¹⁴Аз жерден элдин жана коомдун арасында ар кандай жамандыкка дуушар болуп кала жаздадым».

¹⁵Өз көлмөңдөгү, өз кудугуңдагы суудан ич.

¹⁶Булактарың көчөгө, агын сууларың аянттарга акпасын.

¹⁷Алар жат кишиге эмес, бир гана сага таандык болсун.

¹⁸Булагың баталуу болсун. Жаш кезде алган,

¹⁹маралдай сүйкүмдүү, жейрендей сулуу аялың менен кубан. Анын төшү сени ар дайым канааттандырсын, анын махабаты менен дайыма ыракаттан.

²⁰Уулум, башка бирөөнүн аялына кызыгып, башка бирөөнүн аялынын төшүн кучактап эмне кыласың?

²¹Адамдын жолдору Теңирдин көз алдында, Ал анын ар бир кадамын ченеп турат.

²²Мыйзамсыз адамды өзүнүн мыйзамсыздыгы тузакка түшүрөт, ал өз күнөөсүнүн торунда камалып турат.

²³Ал акыл-насааттын жетишсиздигинен өлөт, акылсыздыгынын көптүгүнөн жок болот.