Read Кыргыз тилиндеги Библия, 2004 Накыл 6 Bible Online

Накыл 6 - Кыргыз тилиндеги Библия, 2004 bible

Накыл 6

¹Уулум! Эгерде жакыныңа кепил болуп, башка бирөө үчүн кол берсең,

²анда сен оозуңдан чыккан сөзүң менен өзүңдү чырмап алдың, өз оозуңдан чыккан сөздөрүң менен кармалдың.

³Уулум, мындай кыл: өзүңдү куткар, анткени сен жакыныңдын колуна түшүп калдың, бар, бутуна жыгыл, жакыныңа жалынып-жалбар.

⁴Көзүңдү ирмебе, кирпик какпа.

⁵Мергенчинин колунан кутулган жейрендей, кушчунун колунан кутулган куштай кутул.

⁶Жалкоо, кумурскаларды кара, алардын иш-аракетин көр, анан акылыңа кел.

⁷Алардын башчысы да, көзөмөлчүсү да, өкүмдары да жок.

⁸Бирок алар өздөрүнүн нанын жайында камдап алышат, өздөрүнүн азыгын оруу-жыюу маалында жыйнап алышат.

⁹Жалкоо, качанга чейин уктай бересиң, качан ойгоносуң?

¹⁰Бир аз уктай турсаң, колуңду бооруңа алып, үргүлөп, бир аз жата турсаң,

¹¹жакырлыгың жолоочудай, муктаждыгың каракчыдай кирип келет.

¹²Анткор, мыйзамсыз адам жалган сүйлөйт.

¹³Көзүн кысат, буту менен сүйлөп, манжалары менен белги берет.

¹⁴Анын жүрөгүндө жүзү каралык, качан болбосун, ойлогону жамандык, арага чагым салат.

¹⁵Ошон үчүн ал күтүлбөгөн жерден өлөт, капыстан талкаланат, айыкпас дартка чалдыгат.

¹⁶Теңир жек көргөн алты нерсе, атүгүл, Анын жанына жийиркеничтүү болгон жети нерсе:

¹⁷менменсинген көздөр, жалган тил, жазыксыз адамдын канын төккөн кол,

¹⁸жамандык ойлогон жүрөк, кыянаттык кылганга тез чуркаган буттар,

¹⁹жалган жалаа жапкан жалган күбө, бир туугандардын ортосуна от жаккандар.

²⁰Уулум! Атаңдын осуяттарын сакта, энеңдин акыл-насаатын четке какпа.

²¹Аларды жүрөгүңө түбөлүккө байлап ал, мойнуңа тегерете байлап ал.

²²Жолго чыкканыңда, алар сени жетектейт, уктап жатканыңда кайтарат, ойгонгонуңда сени менен маектешет.

²³Анткени осуят – чырак, акыл-насаат – жарык, насыятты үйрөнүү – өмүргө жол.

²⁴Алар сени бузулган аялдан, башка бирөөнүн аялынын жасакерленип сүйлөгөн сөзүнөн сактайт.

²⁵Жүрөгүңдө анын сулуулугун каалаба, ал сени кирпиги менен өзүнө тартып кетпесин.

²⁶Анткени бузулган аялдын айынан адам бир сындырым нанга жетпей калат, бирөөнүн аялы кымбат жанды торго түшүрөт.

²⁷Ким көйнөгүн күйгүзбөй, отту колтугуна катып жүрө алат?

²⁸Ким бутун күйгүзбөй, күйүп турган чоктун үстүнөн басып жүрө алат?

²⁹Жакынынын аялына кирген адам ошондой болот, ага жакындаган адам күнөөгө батпай койбойт.

³⁰Курсагын тойгузуш үчүн, ачкалыктын айынан ууруга кирген кишини жек көрүшпөйбү?

³¹Ал кармалганда, жети эселеп төлөп берет, үйүндөгү бардык мал-мүлкүн берет.

³²Ал эми бирөөнүн аялы менен ойноштук кылган адамдын акылы жок, мындай кылган адам өз жанын өлтүрөт.

³³Ал токмок да жейт, абийири да кетет, маскара болгону унутулбайт.

³⁴Анткени кызганчаактык – күйөөсүнүн каары, ал өч алган күнү аябайт.

³⁵Эч кандай кун кабыл албайт, канчалык белек берсең да канагаттанбайт.