Read Кыргыз тилиндеги Библия, 2004 Накыл 8 Bible Online

Накыл 8 - Кыргыз тилиндеги Библия, 2004 bible

Накыл 8

¹Акылмандык чакырып жаткан жокпу? Акыл үнүн бийик чыгарып жаткан жокпу?

²Ал бийик жерлерге, жолдорго, жол тоомдоруна туруп алып чакырып жатат.

³Ал шаардын дарбазасынын жанына, шаардын кире беришине туруп алып чакырып жатат:

⁴«Адамдар, мен силерге чакырык салып жатам. Менин үнүм адам баласына!

⁵Эси жоктор, эстүү болгула, акылы жоктор, акылдуу болгула!

⁶Уккула, анткени мен маанилүү сөз айтам, менин оозумдан чыккан сөз чындык.

⁷Анткени менин тилим чындыкты сүйлөйт, жаман сөздөрдү сүйлөгөндөн оозум жийиркенет.

⁸Менин оозумдан чыккан сөздүн бардыгы адилет, анда жалган да, анткорлук да жок.

⁹Булардын бардыгы акылдуулар үчүн айкын, билимге ээ болгондор үчүн адилет.

¹⁰Күмүштү эмес, менин окутуумду кабыл алгыла, тандамал алтындан билим артык.

¹¹Анткени акылмандык берметтен артык, ага адам каалаган нерселердин эч бири тең келбейт.

¹²Мен, акылмандык, акыл менен чогуу жашайм, туура билимди издейм.

¹³Теңирден коркуу – жамандыкты жек көрүү. Текебердикти, менменсингендикти, кыянат жолду, жалган оозду мен жек көрөм.

¹⁴Менде кеңеш менен чындык бар; мен акылмын, менде күч бар.

¹⁵Падышалар менин жардамым менен бийлик кылышат, өкүмдарлар менин жардамым менен чындыктын негизинде мыйзам чыгарышат.

¹⁶Башчылар да, төрөлөр да, жер жүзүндөгү башкаруучулар да менин жардамым менен башкарышат.

¹⁷Мени сүйгөндөрдү мен да сүйөм, мени издегендер мени табышат.

¹⁸Байлык да, даңк да, жок болбой турган казына да, чындык да менде.

¹⁹Менин жемишим алтындан, эң таза алтындан артык, тандамал күмүшкө караганда менден пайда көп.

²⁰Мен чындыктын жолу менен, адилеттиктин жолу менен жүрөм.

²¹Мени сүйгөндөрдү чыныгы байлыкка жеткирем, алардын казыналарын толтурам.

²²Теңир мени Өзүнүн жолунун башталышында эле, бардыгын жарата электен мурун эле, эзелки убакта эле жараткан.

²³Мен кылымдар мурун эле, башында эле, жер жаратыла электен мурун эле майлангам.

²⁴Мен түпсүз туңгуюктар жарала электе эле, суусу мол булактар жарала электе эле төрөлгөм.

²⁵Мен тоолор орнотула электе эле, адырлар жаратыла электе эле төрөлгөм.

²⁶Теңир жерди да, талааларды да, ааламдын алгачкы чаңчаларын да жарата электе эле төрөлгөм.

²⁷Теңир асманды даярдай баштаганда, мен ошол жерде болчумун. Ал түпсүз туңгуюктардын үстүнөн тегерете сызык жүргүзүп жатканда,

²⁸асманга булуттарды орнотуп жатканда, түпсүз туңгуюк булактарын бекемдеп жатканда,

²⁹суулар чегинен ашып кетпесин деп, деңизге мыйзам берип жатканда, жердин негизин орнотуп жатканда,

³⁰мен Анын жанында сүрөтчү болчумун. Ар күнү Анын кубанычы болчумун, Анын алдында ар дайым кубанып турчумун.

³¹Анын жараткан жер шарында кубанып турчумун, менин кубанычым адам баласы менен бирге болгон.

³²Ошентип, балдарым, мени уккула. Менин жолумду сактагандар бактылуу!

³³Акыл-насааттарды угуп, акылдуу болгула, четке какпагыла.

³⁴Ар күнү менин дарбазамдын жанында сергек болуп, эшигимдин алдында сакчылыкта туруп, мени уккан адам бактылуу!

³⁵Анткени мени тапкан адам өмүрдү тапты, ал Теңирден ырайым табат.

³⁶Ал эми мага каршы күнөө кылган адам өз жанына зыян келтирет, мени жек көргөндөрдүн бардыгы өлүмдү жакшы көрүшөт».