Read Кыргыз тилиндеги Библия, 2004 Накыл 9 Bible Online

Накыл 9 - Кыргыз тилиндеги Библия, 2004 bible

Накыл 9

¹Акылмандык өзүнө үй куруп, анын жети мамысын жонуп жылмалады,

²курмандык мууздап, шарап ачытып, өзүнө дасторкон даярдады.

³Өзүнүн кулдарын шаардын бийик жерлеринен жар салууга жөнөттү:

⁴«Ким акылсыз болсо, бул жакка кайрылсын». Кем акылга ал мындай деди:

⁵«Келгиле, менин нанымды жегиле, мен ачытып койгон шарапты ичкиле!

⁶Акылсыздыкты таштагыла, жашагыла, акылдын жолу менен жүргүлө».

⁷Шылдыңчыл адамды үйрөткөн жаманаттыга калат, мыйзамсыз адамды ашкерелеген өз бетине көө жабат.

⁸Шылдыңчыл адамды ашкерелебе, болбосо ал сени жек көрүп калат, акылдуу адамды ашкереле, ал сени жакшы көрүп калат.

⁹Акылдуу адамга акыл-насаат айтсаң, ал ого бетер акылдуу болот, адил адамды үйрөтсөң, ал билимин дагы арбытат.

¹⁰Акылмандыктын башталышы – Теңирден коркуу, ыйык Кудайды таанып билүү – акыл.

¹¹Анткени мен аркылуу өмүрүң узарат, өмүрүңө өмүр кошулат.

¹²Акылдуу болсоң, өзүң үчүн акылдуусуң; шылдыңчыл болсоң, азабын өзүң тартасың.

¹³Ойлонуп иш кылбаган, чуулгандуу, акылсыз, эч нерсе билбеген аял

¹⁴өзүнүн үйүнүн эшигинин алдындагы отургучка, шаардын бийик жерлерине отуруп алып,

¹⁵жолдон өтүп бара жаткандарды, өз жолу менен түз бара жаткандарды чакырып:

¹⁶«Ким акылсыз болсо, бул жакка кайрылсын», – дейт, анан кем акыл адамга мындай деп айтат:

¹⁷«Уурдап ичкен суу таттуу болот, катып жеген нан даамдуу болот».

¹⁸Ал адам бул аялдын үйү өлгөндөр жаткан жай экенин, анын өтүнүп чакырып алган адамдары өлгөндөр жаткан жайдын түбүндө экенин билбейт.