Read Кыргыз тилиндеги Библия, 2004 Насаатчы 1 Bible Online

Насаатчы 1 - Кыргыз тилиндеги Библия, 2004 bible

Насаатчы 1

¹Иерусалимдеги падыша Дөөттүн уулу, Насаатчынын сөздөрү.

²«Түйшүктүн түйшүгү, – деди Насаатчы, – түйшүктүн түйшүгү – бардыгы түйшүк!

³Адамга өзүнүн күн астында мээнеттенген эмгегинен эмне пайда?

⁴Бир муун өтөт, бир муун келет, жер болсо кылымдан кылымга тура берет.

⁵Күн чыгат, күн кайра батат, ал өзүнүн ордуна, чыккан жерине шашат.

⁶Шамал түштүккө согот, андан түндүккө өтөт, ал өз жолу менен тегеренип жүрүп, чыккан жерине кайтат.

⁷Дарыялардын баары деңизге барып куят, бирок деңиз ашып-ташып кетпейт, кайра агыш үчүн, дарыялар өздөрүнүн чыккан жерине кайтышат.

⁸Бардыгы эмгектенүүдө. Эч ким аны сөз менен айтып жеткире албайт. Көз көргөнүнө тойбойт, кулак укканына тойбойт.

⁹Мурун эмне болсо, азыр да ошол боло берет, мурун эмне жасалса, азыр да ошол жасала берет, демек, күн астында жаңы эч нерсе жок.

¹⁰Адамдар: “Карасаң, бул – жаңы нерсе”, – деп айта турган бир нерсе болушу мүмкүн, бирок ал бизден мурун, өткөн кылымдарда эле болгон.

¹¹Мурун болгон нерселер эстелбейт, ошондой эле боло турган нерселер кийинкилердин эсинде калбайт.

¹²Мен, Насаатчы, Иерусалимде Ысрайылдын падышасы болгом.

¹³Мен асман астында эмне болуп жатса, ошонун баарын акыл менен сынаганга, изилдегенге көңүл койдум: бул татаал ишти Кудай адам баласына машыгып турсун деп берген.

¹⁴Мен күн астында жасалып жаткан иштердин баарын көрдүм, анын бардыгы – курулай убаракерчилик жана рухтун кыйналуусу!

¹⁵Ийри түзөлбөйт, жок нерсени бар деп эсептөөгө болбойт.

¹⁶Мен өзүмө өзүм мындай дедим: “Мына, мен Иерусалимге менден мурун бийлик кылгандарга караганда көбүрөөк акылмандуулукка ээ болдум. Менин жүрөгүм көп акылмандыкты жана көп билимди көрдү”.

¹⁷Мен акылмандыкты таанып билүүгө, акылсыздык менен түркөйлүктү таанып билүүгө көңүл койдум. Бул да рухтун кыйналуусу экенин билдим.

¹⁸Анткени акылмандуулук канчалык көп болсо, кайгы ошончолук көп, билимин арттырган адам кайгысын арттырат.