Read Кыргыз тилиндеги Библия, 2004 Жеремиянын ыйы 3 Bible Online

Жеремиянын ыйы 3 - Кыргыз тилиндеги Библия, 2004 bible

Жеремиянын ыйы 3

¹Мен Теңирдин каар таягынын соккусунан улам кайгыны баштан өткөргөн адаммын.

²Ал мени жетелеп, жарыкка эмес, караңгылыкка киргизди.

³Ал мага каршы бурулуп, күнү бою Өз колун менден тарткан жок.

⁴Менин денем менен теримди жабыркатты, сөөктөрүмдү талкалады.

⁵Мени тегерете тосту, мени кайгы жана кыйынчылык менен курчады.

⁶Мени небак өлгөндөрдөй кылып, караңгы жерге отургузду.

⁷Чыгып кетпесин деп, мени дубал менен курчады, кишендеримди оордотту.

⁸Мен жалынып-жалбарып кайрылганымда, сыйынуумду токтотуп койду.

⁹Менин жолдорумду таштар менен тосту, жолдорумду бузуп салды.

¹⁰Ал мен үчүн буктурмада бугуп жаткан аюудай, жашыруун жерде жаткан арстандай болуп калды.

¹¹Ал менин жолдорумду бузуп салды, мени тытып таштады, мени киши санынан чыгарды.

¹²Өз жаасын тартты, мени жаа үчүн бута кылып койду.

¹³Өз саадагындагы жебелер менен бөйрөктөрүмө атты.

¹⁴Мен өзүмдүн бүт элиме шылдың болдум, алардын күндөлүк ырына айландым.

¹⁵Ал мени кайгыга тойгузду, мага эрмен ичирди.

¹⁶Тиштеримди таш менен талкалады, мени күлгө оонатты.

¹⁷Жанымдан тынчтык кетти, жакшы күн жөнүндө унутуп койдум.

¹⁸Ошондо мен: «Алсырап калдым, Теңирге болгон үмүтүм үзүлдү.

¹⁹Менин кайгым жөнүндө, кыйынчылыктарым жөнүндө, эрмен менен өт жөнүндө ойло», – дедим.

²⁰Аларды менин жаным тынымсыз эстеп, кыйналып жатат.

²¹Мен өз жүрөгүмө мындай деп жооп берип, үмүт кылып жатам:

²²«Теңир ырайымдуу болгондуктан, биз жок болуп кеткен жокпуз, анткени Анын ырайымы түгөнгөн жок.

²³Анын ырайымы ар бир таңда жаңырып турат. Сенин ишенимдүүлүгүң зор!

²⁴Теңир менин бөлүгүм, – дейт менин жаным, – ошондуктан мен Андан үмүттөнөм».

²⁵Теңирден үмүттөнгөндөргө, Теңирди издеген адамга Теңир ырайымдуу.

²⁶Теңирдин куткаруусун чыдамкайлык менен күткөн адамга жакшы.

²⁷Жаш кезинде моюнтурук көтөргөн адамга жакшы.

²⁸Ал унчукпастан жалгыз отурат, анткени аны ага Теңир салды.

²⁹Ал оозун топуракка коюп: «Балким, дагы үмүт бардыр», – деп ойлойт.

³⁰Ал уруп жатканга бетин тосот, кордукка тоёт.

³¹Бирок Теңир түбөлүккө таштабайт.

³²Кайгы жиберсе да, Өзүнүн улуу ырайымдуулугу менен ырайым кылат.

³³Анткени Ал адам уулдарын Өз жүрөгүнүн каалоосу боюнча жазалабайт, Өз жүрөгүнүн каалоосу боюнча кайгыга салбайт.

³⁴Бирок жер жүзүндөгү бардык туткундарды тебелеп жатышканда,

³⁵Бардыгынан Жогору Тургандын алдында адамды адилетсиз соттоп жатышканда,

³⁶адамды өз ишинде кысымга алып жатышканда, Теңир көрбөйт бекен?

³⁷«Теңир буйрук кылбаган нерселер деле боло берет», – деп, ким айтып жатат?

³⁸Алаамат да, тынчтык да Бардыгынан Жогору Тургандын оозунан чыккан буйрук боюнча болуп жаткан жокпу?

³⁹Жашап жаткан адам эмнеге кайгырып жатат? Ар ким өз күнөөлөрү үчүн кайгырсын.

⁴⁰Өзүбүздүн жолдорубузду сынайлы, изилдейли, анан Теңирге кайрылалы.

⁴¹Асманда жашаган Кудайга жүрөгүбүз менен колубузду көтөрөлү:

⁴²«Биз күнөө кетирип, өжөрлөндүк, Сен кечирген жоксуң.

⁴³Сен Өзүңдү каар менен жаап алып, биздин артыбыздан түштүң, бизди өлтүрдүң, аяган жоксуң.

⁴⁴Биздин сыйынуубуз Сага жетпеш үчүн, Сен Өзүңдү булут менен жаап алдың.

⁴⁵Элдердин арасында Сен бизди таштандыга, жийиркеничке айланттың.

⁴⁶Душмандарыбыздын бардыгы бизге каршы ооздорун араандай ачышты.

⁴⁷Коркунуч жана ор, кыйроо жана бүлүнүү биздин энчибиз болду».

⁴⁸Элимдин кызы кыйрагандыктан, көзүмдүн жашы көл болуп жатат.

⁴⁹Көз жашым токтобой төгүлүп жатат, анткени жеңилдик жок.

⁵⁰Теңир асмандан качанга чейин көз кырын салбайт, качанга чейин көрбөйт?

⁵¹Менин шаарымдын бүт кыздары үчүн көзүм жанымды кайгыга салып жатат.

⁵²Мага эч себепсиз душман болгондор мени чымчык сыяктуу торго түшүрүү үчүн, ар кандай аракет кылышты.

⁵³Менин өмүрүмдү орго салып, мага таш жаадырышты.

⁵⁴Суу башыма чейин көтөрүлдү, ошондо мен: «Өлдүм!» – дедим.

⁵⁵Теңир, терең ордун ичинен мен Сенин ысымыңды чакырдым.

⁵⁶Сен менин үнүмдү уктуң. Менин үшкүрүгүмдү, ыйымды укпаш үчүн, Өз кулагыңды жаап алба!

⁵⁷Мен Сени чакырганда, Сен жакын келип: «Коркпо!» – дечүсүң.

⁵⁸Теңир, Сен менин жанымдын ишин коргоп турчусуң, менин өмүрүмдү куткарып турчусуң.

⁵⁹Теңир, Сен менин таарынычымды көрүп турасың, менин ишимди чечип бер!

⁶⁰Сен алардын бүт кегин, алардын мага каршы ойлогон бүт оюн көрүп турасың.

⁶¹Теңир, Сен алардын тилдегенин, алардын мага каршы ойлогон ойлорун угуп турасың.

⁶²Сен күн сайын мага каршы чыккандардын сөздөрүн, алардын мага каршы колдонгон айла-амалдарын угуп турасың.

⁶³Аларды карачы, отурса да, турса да, алардын ыры – мен.

⁶⁴Теңир, аларга кылган иштерине жараша тиешесин бере көр.

⁶⁵Алардын жүрөгүнө караңгылык жибер, аларга Өзүңдүн каргышыңды жибер.

⁶⁶Теңир, каарың менен алардын артынан түш, аларды асман астынан жок кыл.