Read Кыргыз тилиндеги Библия, 2004 Жеремиянын ыйы 5 Bible Online

Жеремиянын ыйы 5 - Кыргыз тилиндеги Библия, 2004 bible

Жеремиянын ыйы 5

¹Теңир, биздин башыбызга эмне түшкөнүн эсте. Көз кырыңды сал, биздин кордолгонубузду кара.

²Биздин мурасыбыз чоочун элге өттү, үйлөрүбүз бөтөн урууларга өттү.

³Биз атасыз жетим калдык, энелерибиз жесирлердей болуп калышты.

⁴Биз өзүбүздүн суубузду күмүшкө сатып алып ичип жатабыз, өз отундарыбызды акчага алып жатабыз.

⁵Мойнубузга моюнтурук салып айдап алышты, биз иштеп жатабыз, бизде эс алуу жок.

⁶Нанга тоюш үчүн, мисирликтер менен ашурлуктарга колубузду сунуп жатабыз.

⁷Биздин ата-бабаларыбыз күнөөгө батышкан, азыр алар жок. Алардын мыйзамсыздыктары үчүн биз жазаланып жатабыз.

⁸Бизге кулдар үстөмдүк кылып жатышат, бизди алардын колунан куткарып алчу эч ким жок.

⁹Өмүрүбүздү кылыч коркунучуна салып, чөлдө өзүбүзгө нан таап жатабыз.

¹⁰Жанга баткан ачкачылыктан терибиз мештей карарып кетти.

¹¹Сиондо аялдардын, Жүйүт шаарларында кыздардын абийирин булгап жатышат.

¹²Төрөлөрдү асышты, аксакалдарды урматташкан жок.

¹³Уландарды тегирмен таштарын айлантууга алып жатышат, өспүрүмдөр көтөргөн отундарынын оордугунан жыгылып жатышат.

¹⁴Аксакалдар дарбаза алдында отурбай калышты, уландар ырдабай калышты.

¹⁵Жүрөгүбүз кубанбай калды, ыр-бийлерибиз кайгы-муңга айланды.

¹⁶Башыбыздан таажы түштү. Бизге кайгы, анткени биз күнөөгө баттык!

¹⁷Мына ошон үчүн жүрөгүбүз кыйналып жатат, ошон үчүн көздөрүбүз тунарды.

¹⁸Сион тоосу ээн калгандыктан, түлкүлөр жойлоп жүрөт.

¹⁹Сен, Теңир, түбөлүктүүсүң. Сенин тагың укумдан-тукумга турат.

²⁰Эмне үчүн бизди таптакыр эсиңден чыгарып салдың? Эмне үчүн бизди узак убакытка таштап койдуң?

²¹Теңир, бизди Өзүңө кайры, ошондо биз Сага кайрылабыз. Биздин күндөрүбүздү байыркы күндөрдөгүдөй кылып жаңырт.

²²Чын эле, Сен бизди биротоло четке кагып салдыңбы, бизге катуу каардандыңбы?