Read Кыргыз тилиндеги Библия, 2004 Сандар 1 Bible Online

Сандар 1 - Кыргыз тилиндеги Библия, 2004 bible

Сандар 1

¹Ысрайыл эли Мисир жеринен чыккандан кийин, экинчи жылдын экинчи айынын биринчи күнүндө Синай чөлүндө, жыйын чатырында Теңир Мусага мындай деди:

²«Арун экөөңөр Ысрайылдын бүткүл жамаатындагы ар бир урууну, ар бир үй-бүлөнү санап чыккыла. Эркек аттууларынын бирин да калтырбай, аттарын атап санап чыккыла.

³Ысрайыл элинин жыйырма жана андан жогорку жаштагы согушка жарактууларынын баарын кошуундары боюнча санап чыккыла.

⁴Ар бир уруунун уруу башчысы силерге жардам берсин.

⁵Силерге жардамдаша турган эркектердин аттары мындай: Рубейин уруусунан Шедейурдун уулу Элитсур,

⁶Шымон уруусунан Суришадайдын уулу Шелумиел,

⁷Жүйүт уруусунан Аминадаптын уулу Нахшон,

⁸Исахар уруусунан Суардын уулу Натанаел,

⁹Забулун уруусунан Хейлондун уулу Элийап,

¹⁰Жусуптун уулдарынан: Эпрайым уруусунан Амийуттун уулу Элишама, Менаше уруусунан Пыдатсурдун уулу Гамлиел,

¹¹Бенжемин уруусунан Гидонинин уулу Абидан,

¹²Дан уруусунан Амишадайдын уулу Ахиезер,

¹³Ашыр уруусунан Охрандын уулу Пагиел,

¹⁴Гат уруусунан Ребуелдин уулу Элийасап,

¹⁵Напталы уруусунан Эйнандын уулу Акира.

¹⁶Булар – жамааттын тандалган уулдары, өз-өз урууларынын уруу башчылары, Ысрайыл миң башылары».

¹⁷Муса менен Арун аттары аталган ушул эркектерди алып жөнөштү.

¹⁸Алар экинчи айдын биринчи күнү бүткүл жамаатты жыйнашты. Ошондо алар жыйырма жана андан жогорку жаштагы эркек аттуулардын бирин калтырбай, уруусу, үй-бүлөсү боюнча аттарын атап санап чыгышты.

¹⁹Муса Теңирдин айтканындай кылып, аларды Синай чөлүндө санап чыкты.

²⁰Ошондо Ысрайылдын тун уулу Рубейинден тараган, жыйырма жана андан жогорку жаштагы согушка жарактуу эркек аттууларынын бири калбай, уруусу, тукуму, үй-бүлөсү боюнча аттары аталды.

²¹Рубейин уруусундагы эркектердин саны кырк алты миң беш жүз болду.

²²Шымондун уулдарынан тараган урууларды өз-өз уруусу боюнча, үй-бүлөсү боюнча жыйырма жана андан жогорку жаштагы согушка жарактуу эркек аттууларынын бирин калтырбай, аттарын атап санап чыгышты.

²³Шымон уруусундагы эркектердин саны элүү тогуз миң үч жүз болду.

²⁴Гаттын уулдарынан тараган урууларды өз-өз уруусу боюнча, үй-бүлөсү боюнча жыйырма жана андан жогорку жаштагы согушка жарактуу эркек аттууларынын бирин калтырбай, аттарын атап санап чыгышты.

²⁵Гат уруусундагы эркектердин саны кырк беш миң алты жүз элүү болду.

²⁶Жүйүттүн уулдарынан тараган урууларды өз-өз уруусу боюнча, үй-бүлөсү боюнча жыйырма жана андан жогорку жаштагы согушка жарактуу эркек аттууларынын бирин калтырбай, аттарын атап санап чыгышты.

²⁷Жүйүт уруусундагы эркектердин саны жетимиш төрт миң алты жүз болду.

²⁸Исахардын уулдарынан тараган урууларды өз-өз уруусу боюнча, үй-бүлөсү боюнча жыйырма жана андан жогорку жаштагы согушка жарактуу эркек аттууларынын бирин калтырбай, аттарын атап санап чыгышты.

²⁹Исахар уруусундагы эркектердин саны элүү төрт миң төрт жүз болду.

³⁰Забулундун уулдарынан тараган урууларды өз-өз уруусу боюнча, үй-бүлөсү боюнча жыйырма жана андан жогорку жаштагы согушка жарактуу эркек аттууларынын бирин калтырбай, аттарын атап санап чыгышты.

³¹Забулун уруусундагы эркектердин саны элүү жети миң төрт жүз болду.

³²Жусуптун уулу Эпрайымдын уулдарынан тараган урууларды өз-өз уруусу, үй-бүлөсү боюнча жыйырма жана андан жогорку жаштагы согушка жарактуу эркек аттууларынын бирин калтырбай, аттарын атап санап чыгышты.

³³Эпрайым уруусундагы эркектердин саны кырк миң беш жүз болду.

³⁴Жусуптун уулу Менашенин уулдарынан тараган урууларды өз-өз уруусу, үй-бүлөсү боюнча жыйырма жана андан жогорку жаштагы согушка жарактуу эркек аттууларынын бирин калтырбай, аттарын атап санап чыгышты.

³⁵Менаше уруусундагы эркектердин саны отуз эки миң эки жүз болду.

³⁶Бенжеминдин уулдарынан тараган урууларды өз-өз уруусу, үй-бүлөсү боюнча жыйырма жана андан жогорку жаштагы согушка жарактуу эркек аттууларынын бирин калтырбай, аттарын атап санап чыгышты.

³⁷Бенжемин уруусундагы эркектердин саны отуз беш миң төрт жүз болду.

³⁸Дандын уулдарынан тараган урууларды өз-өз уруусу, үй-бүлөсү боюнча жыйырма жана андан жогорку жаштагы согушка жарактуу эркек аттууларынын бирин калтырбай, аттарын атап санап чыгышты.

³⁹Дан уруусундагы эркектердин саны алтымыш эки миң жети жүз болду.

⁴⁰Ашырдын уулдарынан тараган урууларды өз-өз уруусу, үй-бүлөсү боюнча жыйырма жана андан жогорку жаштагы согушка жарактуу эркек аттууларынын бирин калтырбай, аттарын атап санап чыгышты.

⁴¹Ашыр уруусундагы эркектердин саны кырк бир миң беш жүз болду.

⁴²Напталынын уулдарынан тараган урууларды өз-өз уруусу, үй-бүлөсү боюнча жыйырма жана андан жогорку жаштагы согушка жарактуу эркек аттууларынын бирин калтырбай, аттарын атап санап чыгышты.

⁴³Напталы уруусундагы эркектердин саны элүү үч миң төрт жүз болду.

⁴⁴Санакка киргендер мына ушулар. Аларды Муса менен Арун жана Ысрайылдын уруу башчылары – он эки уруу башчы санап чыгышты.

⁴⁵Алар Ысрайыл уулдарынын согушка жарактуу жыйырма жана андан жогорку жаштагы эркек аттууларынын баарын үй-бүлөсү боюнча санап чыгышты.

⁴⁶Алардын жалпы саны алты жүз үч миң беш жүз элүү болду.

⁴⁷Леби уруусу алар менен кошо санакка кирген жок.

⁴⁸Анткени Теңир Мусага мындай деп айткан:

⁴⁹«Леби уруусун гана тизмеге киргизбе, Ысрайыл уулдарындай кылып аларды санаба.

⁵⁰Лебилерге жыйын чатырын жана ага тиешелүү бардык нерселерди тапшырып бер. Алар жыйын чатырын жана ага тиешелүү нерселердин баарын көтөрүп жүрүшсүн, ошол жерде кызмат кылышсын жана анын тегерегине өздөрүнүн станын жайгаштырышсын.

⁵¹Жыйын чатырын көчүргөндө, лебилер жыйнаштырсын; жыйын чатырын орноткондо, лебилер орнотсун. Эгерде бул ишке лебилерден бөлөк бирөө жакындаса, ал өлүм жазасына тартылсын.

⁵²Ысрайыл уулдары өз станынын, өз туусунун жанында турушсун.

⁵³Теңирдин каары Ысрайыл уулдарына төгүлбөш үчүн, лебилер өз стандарын жыйын чатырынын тегерегине жайгаштырышсын. Лебилер жыйын чатырынын жанында күзөттө турушсун».

⁵⁴Теңир Мусага кандай буйруса, Ысрайыл уулдары ошондой кылышты.