Read Кыргыз тилиндеги Библия, 2004 Сандар 10 Bible Online

Сандар 10 - Кыргыз тилиндеги Библия, 2004 bible

Сандар 10

¹Теңир Мусага дагы мындай деди:

²«Күмүштөн эки сурнай жаса, аларды чегип жаса. Сурнайларды сен жамаатты чакырыш үчүн, станды ордунан жылдырыш үчүн колдон.

³Сурнайлар тартылганда, бүткүл жамаат жыйын чатырынын алдына чогулат.

⁴Бир сурнай тартылганда, төрөлөр менен Ысрайылдын миң башылары чогулат.

⁵Сурнайды үзүп-үзүп тартканда, жыйын чатырынын чыгыш тарабында турган стандар козголот.

⁶Сурнайды экинчи ирет үзүп-үзүп тартканда, жыйын чатырынын түштүк тарабында турган стандар козголот. Стан жолго чыгарда, сурнайларды үзүп-үзүп тартышсын.

⁷Элди жыйынга чакырарда, сурнайларды үзбөй тарткыла.

⁸Сурнайларды Арундун уулдары – ыйык кызмат кылуучулар гана тартышсын. Бул көрсөтмө силердин укум-тукумуңарга түбөлүк калсын.

⁹Жериңерге кол салган душмандарыңар менен согушарда, сурнайларыңарды үзүп-үзүп тарткыла, ошондо Кудай-Теңириңер силерди эстеп, душмандарыңардан куткарат.

¹⁰Көңүл ачкан күндөрүңөрдө, майрамдарыңарда, ай жаңырганда, бүтүндөй өрттөлүүчү курмандыктар менен тынчтык курмандыктарын чалганыңарда, сурнайларыңарды тарткыла. Бул сурнай силерди Кудайыңар эсине алышы үчүн тартылат. Мен силердин Кудай-Теңириңермин».

¹¹Экинчи жылдын экинчи айынын жыйырманчы күнү жыйын чатырынын үстүнөн булут көтөрүлдү.

¹²Ошондо Ысрайыл уулдары станы менен Синай чөлүнөн чыгышты. Булут болсо Паран чөлүнө келип токтоду.

¹³Ошентип, алар биринчи жолу Теңирдин Муса аркылуу берген буйругу боюнча жолго чыгышты.

¹⁴Биринчи болуп Жүйүт станы туусун көтөрүп, кошуундары менен жолго чыкты. Алардын кошуун башында Аминадаптын уулу Нахшон турду.

¹⁵Исахар уруусунун кошуун башында Суардын уулу Натанаел турду.

¹⁶Забулун уулдарынын кошуун башында Хейлондун уулу Элийап турду.

¹⁷Жыйын чатыры чечилгенден кийин, аны Гейиршон уулдары менен Мерари уулдары көтөрүп жөнөштү.

¹⁸Анан Рубейин станы туусун көтөрүп, кошуундары менен жолго чыкты. Алардын кошуун башында Шедейурдун уулу Элитсур турду.

¹⁹Шымон уулдарынын кошуун башында Суришадайдын уулу Шелумиел турду.

²⁰Гат уулдарынын кошуун башында Ребуелдин уулу Элийасап турду.

²¹Андан кийин ыйык жайды көтөргөн Кааттын уулдары жөнөштү. Жыйын чатырын болсо алар келгиче орнотуп коюшчу.

²²Анан Эпрайым станы туусун көтөрүп, кошуундары менен жолго чыкты. Алардын кошуун башында Амийуттун уулу Элишама турду.

²³Менаше уулдарынын кошуун башында Пыдатсурдун уулу Гамлиел турду.

²⁴Бенжемин уулдарынын кошуун башында Гидонинин уулу Абидан турду.

²⁵Акыркы болуп Дан станы туусун көтөрүп, кошуундары менен жолго чыкты. Алардын кошуун башында Амишадайдын уулу Ахиезер турду.

²⁶Ашыр уулдарынын кошуун башында Охрандын уулу Пагиел турду.

²⁷Напталы уулдарынын кошуун башында Эйнандын уулу Акира турду.

²⁸Ысрайыл уулдарынын кошуундары ушундай тартип менен жолго чыгышты.

²⁹Ошондо Муса мидиандык тууганы Ребуелдин уулу Хобапка мындай деди: «Биз азыр Теңир берем деп убада кылган жерге жөнөйбүз. Биз менен жүр, биз сага жакшылык кылабыз, анткени Теңир Ысрайылга жакшылык убада кылган».

³⁰Бирок ал: «Барбайм, мен өз жериме, өз мекениме барам», – деди.

³¹Ошондо Муса ага мындай деди: «Бизди таштаба, анткени сен станыбызды чөлдө кантип жайгаштырып жатканыбызды билесиң, бизге жол көрсөтүүчү бол.

³²Эгерде биз менен барсаң, Теңирдин бизге кыла турган жакшылыгына үлүштөш болосуң».

³³Анан алар Теңирдин тоосунан жолго чыгып, үч күн жол жүрүштү. Теңирдин келишим сандыгын көтөргөндөр кошуун токтой турган жерди табыш үчүн, үч күн бою алдыда жол жүрүштү.

³⁴Алар жолго чыкканда, күндүз Теңирдин булуту аларга жол көрсөтүп турду.

³⁵Келишим сандыгын көтөргөндөр жолго чыкканда, Муса мындай дечү: «Теңир, ордуңан тур! Сен ордуңан турганда, Сенин душмандарың чачырап кетсин, Сени жек көргөндөр Сенин жүзүңдөн качсын!»

³⁶Келишим сандыгын көтөргөндөр токтогондо, Муса мындай дечү: «Теңир, миңдеген, түмөндөгөн Ысрайыл уулдарына кайрылып кел!»