Read Кыргыз тилиндеги Библия, 2004 Сандар 31 Bible Online

Сандар 31 - Кыргыз тилиндеги Библия, 2004 bible

Сандар 31

²«Ысрайыл уулдары үчүн мидиандыктардан өч ал, ошондон кийин өз элиңе кошуласың».

³Ошондо Муса элге кайрылып, мындай деди: «Мидиандыктардан Теңирдин өчүн алыш үчүн, мидиандыктарга каршы чыгууга өзүңөрдүн араңардан адамдарды куралдандырып, согушка камдагыла.

⁴Ысрайыл урууларынын ар биринен миңден киши чыгарып, согушка жөнөткүлө».

⁵Ошондо миңдеген Ысрайыл элинин ар бир уруусунан миңден – он эки миң куралдуу жоокер согушка бөлүндү.

⁶Муса ар бир уруудан миңден алып, аларды согушка жөнөттү, алар менен кошо ыйык кызмат кылуучу Элазардын уулу Пинехасты да согушка жөнөттү. Анын колунда ыйык идиштер жана белги берүүчү сурнай бар эле.

⁷Ошентип, Теңир Мусага буйругандай, алар мидиандыктарга каршы согуш ачып, алардын бардык эркек аттууларын кырып салышты.

⁸Өлтүрүлгөндөр менен кошо Мидиандын беш падышасын: Эби, Рекем, Сур, Хур, Ребаны кошо өлтүрүштү, Бейордун уулу Биламды да кылыч менен өлтүрүштү.

⁹Ал эми мидиандыктардын аялдары менен балдарын Ысрайыл уулдары туткундап алышты, алардын бодо малын, короо-короо койлорун, мүлкүн олжолоп алышты.

¹⁰Алардын карамагындагы шаарларды, айыл-кыштактарды өрттөп жиберишти.

¹¹Тартып алгандарынын баарын: бүт олжону, малды, туткундап алган адамдарды алып кетишти.

¹²Алар туткундарын, олжолорун, тартып алгандарын Жерихонун маңдайындагы Иордандын боюнда, Маап түздүгүндө жайгашкан Ысрайыл уулдарынын жамаатына жана Муса менен ыйык кызмат кылуучу Элазарга жеткиришти.

¹³Муса менен ыйык кызмат кылуучу Элазар, жамааттын бүт төрөлөрү алардын алдынан тосуп чыгышты.

¹⁴Ошондо согуштан кайткан аскер башчыларына, миң башыларына, жүз башыларына Мусанын ачуусу келип, мындай деди:

¹⁵«Аялдарын эмне үчүн тирүү калтырдыңар?

¹⁶Биламдын кеңеши менен Пейорго жагынып, Ысрайыл уулдарынын Теңирден баш тартуусуна себепкер болгондор ушулар. Ошон үчүн Теңирдин жамааты кыйраган.

¹⁷Ошондуктан бардык эркек балдарын, эркек менен жаткан аялдарын өлтүргүлө.

¹⁸Ал эми эркек көрө элек кыздарын өзүңөр үчүн тирүү калтыргыла.

¹⁹Ошондон кийин жети күн стандын сыртында туруп тургула. Киши өлтүргөн же өлүккө тийген адамдарыңардын баары, туткундарыңар да үчүнчү жана жетинчи күнү тазалангыла.

²⁰Бүт кийимиңерди, бүт булгаары буюмдарыңарды, эчкинин жүнүнөн жасалган бүт нерселериңерди, бүт жыгач идиштериңерди тазалап чыккыла».

²¹Ыйык кызмат кылуучу Элазар согушка барып келген жоокерлерге мындай деди: «Теңирдин Мусага осуяттаган мыйзамы мындай:

²²“Алтынды, күмүштү, жезди, темирди, калайды жана коргошунду,

²³отко салына тургандардын бардыгын тазалаш үчүн отко салгыла, андан кийин тазартуучу сууга салгыла, ошондо таза болот, ал эми отко салынбай тургандардын бардыгын сууга салгыла.

²⁴Кийимиңерди болсо жетинчи күнү жуугула, ошондо таза болосуңар, ошондон кийин гана станга кирсеңер болот”».

²⁵Теңир Мусага мындай деди:

²⁶«Ыйык кызмат кылуучу Элазар жана жамааттын уруу башчылары менен олжого түшкөн адамдарды, малды санап чык.

²⁷Анан олжону согушка барып келген жоокерлерге жана бүт жамаатка тең бөлүп бер.

²⁸Согушка барып келген ар бир жоокерден Теңир үчүн алым ал, адамдардан да, бодо малдан да, эшектерден да, майда малдан да ал: беш жүз баштан бир баш ал.

²⁹Аларга тийген олжонун жарымынан алым ал. Муну өйдө көтөрүп Теңирге алып келген курмандык катары ыйык кызмат кылуучу Элазарга бер.

³⁰Ысрайыл уулдарына тийген олжонун жарымынан Теңирдин жыйын чатырында кызмат кылган лебилерге бер. Адамдардан да, бодо малдан да, эшектерден да, майда малдан да ал: элүү баштан бир баш ал».

³¹Муса менен ыйык кызмат кылуучу Элазар Теңирдин Мусага айтканындай кылышты.

³²Согушка барып келген жоокерлер тартып алган олжонун саны: алты жүз жетимиш беш миң майда мал,

³³жетимиш эки миң бодо мал,

³⁴алтымыш бир миң эшек,

³⁵отуз эки миң эркек көрө элек кыз.

³⁶Согушка катышкандардын жарым үлүшүн эсептегенде, үч жүз отуз жети миң беш жүз майда мал болду.

³⁷Теңир үчүн алынган алымдын саны алты жүз жетимиш беш майда мал болду.

³⁸Бодо малдын саны – отуз алты миң, анын жетимиш экиси – Теңир үчүн алынган алым.

³⁹Эшектин саны – отуз миң беш жүз, анын алтымыш бири – Теңир үчүн алынган алым.

⁴⁰Адамдардын саны – он алты миң, анын отуз экиси – Теңир үчүн алынган алым.

⁴¹Муса Теңир үчүн алынган алымды, Теңир буйругандай, ыйык кызмат кылуучу Элазарга тапшырды.

⁴²Муса согушка катышкандар алып келген олжонун жарымын Ысрайыл уулдарына бөлүп берди.

⁴³Жамааттын энчисине тийген олжонун жарымы мынча: үч жүз отуз жети миң беш жүз майда мал,

⁴⁴ отуз алты миң бодо мал,

⁴⁵отуз миң беш жүз эшек,

⁴⁶он алты миң адам.

⁴⁷Ысрайыл уулдарына тийген жарым олжонун: адамдардын, малдын элүүдөн бир бөлүгүн Муса алып, Теңир буйругандай, Теңирдин жыйын чатырында кызмат кылган лебилерге берди.

⁴⁸Мусага миңдеген жоокерлердин аскер башчылары, миң башылары, жүз башылары келип, мындай дешти:

⁴⁹«Кулдарың өздөрүнө тапшырылган жоокерлерди санап чыгышты, алардын бири да кемибептир.

⁵⁰Мына, Теңирдин алдында тазаланышыбыз үчүн, ар кимибиз өзүбүз тапкан алтындан жасалган буюмдарды: моюнга тагылчу чынжырларды, билериктерди, шакектерди, сөйкөлөрдү, чачпактарды Теңирге арнап алып келдик».

⁵¹Муса менен ыйык кызмат кылуучу Элазар алтындан жасалган ушул буюмдарды алардан алышты.

⁵²Миң башылар менен жүз башылардын Теңирге арнап алып келген алтын буюмдарынын салмагы он алты миң жети жүз элүү шекел болду.

⁵³Жоокерлердин ар бири өзү үчүн талап-тоногон.

⁵⁴Ошентип, Муса менен ыйык кызмат кылуучу Элазар миң башылар менен жүз башылардан алтындарды алып, Теңир Ысрайыл уулдарын эсине алышы үчүн, жыйын чатырына алып келишти.