Read Кыргыз тилиндеги Библия, 2004 Сандар 34 Bible Online

Сандар 34 - Кыргыз тилиндеги Библия, 2004 bible

Сандар 34

¹Теңир Мусага мындай деди:

²«Ысрайыл уулдарына мындай деп буйрук бер: “Канаан жерине киргениңерде, силердин энчиңерге тие турган Канаан жери жана анын чек аралары бул:

³силердин түштүк чек араңар Эдомдун жанындагы Син чөлү болот, түштүк чек араңар чыгыш тараптагы Туздуу деңиздин аягынан башталат.

⁴Чек араңар түштүк тараптагы Акрабым дөңсөөсүнө бурулуп, Син чөлүнөн өтөт, анан Кадеш-Барнейинин түштүгүнө келип такалат, андан Гатсар-Адарга жетип, Асмон аркылуу өтөт.

⁵Чек ара Асмондон Мисир суусуна бурулуп, деңизге барып такалат.

⁶Ал эми батыштагы чек араңар улуу деңиз болот. Бул силердин батыш тарабыңардагы чек араңар.

⁷Түндүк тарабыңардагы чек араңар улуу деңизден Ор тоосуна чейин созулат.

⁸Ор тоосунан Хаматка жетет да, андан ары Седатка барып такалат.

⁹Андан ары Зиброндон Хатсар-Эйнанга чейин кетет. Бул силердин түндүк чек араңар.

¹⁰Чыгыш чек араңар Хатсар-Эйнандан Шепамга чейин болсун.

¹¹Шепамдан чек ара Айындын чыгыш тарабы менен Риблага жетет, анан Кинерет деңизинин чыгыш жээктерине тийип өтөт.

¹²Чек ара Иорданга жетип, Туздуу деңизге такалат. Бул силердин бардык тарабынан чек ара менен чектелген жериңер болот”».

¹³Анан Муса Ысрайыл уулдарына мындай деп буйрук берди: «Мынакей, өкчөмө таш ыргытып бөлүп алчу жериңер ушул, ушул жерди Теңир тогуз урууңарга жана жарым урууңарга берүүгө буйруду.

¹⁴Анткени Рубейин уулдарынын уруулары, Гат уулдарынын уруулары жана Менаше уулдарынын жарым уруусу өз энчилерине тийген үлүштөрүн алышкан.

¹⁵Иордандын аркы өйүзүндөгү, чыгыш жактагы, Жерихонун маңдайындагы жерди ушул эки уруу менен жарым уруу бөлүп алышкан».

¹⁶Теңир Мусага мындай деди:

¹⁷«Силерге жер бөлүп бере турган адамдар булар: ыйык кызмат кылуучу Элазар жана Нундун уулу Жашыя.

¹⁸Жер бөлүштүргөнгө ар бир уруудан бирден төрө алгыла.

¹⁹Ал төрөлөр булар: Жүйүт уруусунан Жепундун уулу Калеп,

²⁰Шымон уруусунан Амийуттун уулу Шемуел,

²¹Бенжемин уруусунан Кислондун уулу Элидат,

²²Дан уруусунан мырза Жогланын уулу Буки төрө,

²³Жусуптун уулдарынан Менашенин уруусунан Эйпоттун уулу Ханиел төрө,

²⁴Эпрайым уруусунан Шиптандын уулу Кемуел төрө,

²⁵Забулун уруусунан Парнактын уулу Элитсапан төрө,

²⁶Исахар уруусунан Азандын уулу Палтиел төрө,

²⁷Ашыр уруусунан Шеломинин уулу Акийут төрө,

²⁸Напталы уруусунан Амийуттун уулу Педаел төрө».

²⁹Теңирдин буйругу боюнча Ысрайыл уулдарынын энчисине Канаан жерин бөлүштүрө тургандар ушулар.