Read Кыргыз тилиндеги Библия, 2004 Малахия 3 Bible Online

Малахия 3 - Кыргыз тилиндеги Библия, 2004 bible

Малахия 3

¹Мына, Мен Өзүмдүн периштемди жиберип жатам, ал Менин алдымда жол даярдап коет, силер издеп жаткан Теңир Өз ийбадатканасына күтүлбөгөн жерден келет, силеркаалаган келишим периштеси келет. Мына, Ал келе жатат, - дейт Себайот Теңир.

²Ал келген күнү ким чыдай алат? Ал келгенде, ким туруштук бере алат? Анткени Ал эритүүчү оттой, тазалоочу шакардай.

³Ал күмүштү кайрадан эритип тазалоо үчүн отурат, Леби уулдарын тазалайт, алтын менен күмүштү эриткендей. аларды кайрадан эритет, ошондо алар Теңирге адилдик менен курмандык чалышат.

⁴Ошондо Жүйүт менен Иерусалимдин курмандыгы Теңирге байыркы күндөрдөгүдөй, мурунку жылдардагыдай жагымдуу болот.

⁵Мен силерге жазалаш үчүн келем, сыйкырчылардын, ойноштук кылгандардын, калп каргангандардын, жалчылардын акысын бербегендердин, жетим менен жесирге кысым көрсөткөндөрдүн, келгинге туура эмес мамиле кылгандардын тез ашкерелөөчүсү болом. Алар Менден коркушпайт, -дейт Себайот Теңир.

⁶Анткени Мен Теңирмин. Мен өзгөрбөйм. Ошондуктан силер, Жакып уулдары, тукум курут болгон жоксуңар.

⁷Силер ата-бабаларыңардын күндөрүнөн бери Менин мыйзамдарымдан баш тартып, аларды аткарбай келе жатасыңар. Мага кайрылып келгиле, ошондо Мен да силерге кайрылып келем, - дейт Себайот Теңир. Силер: "Эмне кылып кайрылып келебиз?" - дейсиңер.

⁸Адамга Кудайдыкын уурдаганга болобу? Силер Меникин уурдап жатасыңар. "Биз Сеникин эмне кылып уурдап жатабыз?" - дейсиңер. Ондук бербей, тартуу алып келбей уурдап жатасыңар.

⁹Силер катуу каргышка калдыңар, анткени силер, бүт эл, Меникин уурдап жатасыңар.

¹⁰Менин үйүмдө тамак болуш үчүн, ондуктардын баарын казына үйүнө алып келгиле. Мени ушул аркылуу сынап көргүлө, - дейт Себайот Теңир. - силер үчүн Мен асман терезелерин ачпайт бекем? Силерге батамды ашыгы менен төкпөйт бекем?

¹¹Силер үчүн Мен бардыгын жалмоочуларга тыюу салам, ошондо алар силердин түшүмүңөрдү кыйратпайт, талаадагы жүзүм сабагыңар өз жемишинен ажырабайт, - дейт Себайот Теңир.

¹²Бардык элдер силерди бактылуу деп айтышат, анткени силер суктанарлык өлкө болосуңар, - дейт Себайот Теңир.

¹³Силер Мага каршы тайманбай сүйлөп жатасыңар, дейт Теңир. Силер: "Биз Сага каршы эмнени сүйлөп жатабыз?" - дейсиңер.

¹⁴Силер: "Кудайга кызмат кылуу - курулай убаракерчилик. Анын буйруктарын сактап жүргөнүбүздөн. Себайот Теңирдин алдында кайгырып жүргөнүбүздөн кандай пайда болду?

¹⁵Азыр биз текеберлерди бактылуу деп эсептейбиз: мыйзамсыз иштерди кылгандар жашоосунда ийгиликке жетип жатышат. Алар Кудайды сынашса да, аман калып жатышат". - деп жатасыңар.

¹⁶Бирок Кудайдан корккондор бири-бирине: "Теңир кулак салып жатат. Ал угуп жатат. Теңирден коркуп. Анын ысымын урматтагандар тууралуу Анын алдында эстелик китеп жазылып жатат", - дешет.

¹⁷Алар Меники болот, - дейт Себайот Теңир, - Мен белгилеген күнү алар Менин менчигим болушат, адам өзүнө кызмат кылган уулуна кандай ырайым кылса, Мен да аларга ошондой ырайым кылам.

¹⁸Ошондо адил адам менен мыйзамсыз адамдын. Кудайга кызмат кылган адам менен кызмат кылбаган адамдын ортосундагы айырманы кайрадан көрөсүңөр.