Read Кыргыз тилиндеги Библия, 2004 Мыйзамды кайталоо 14 Bible Online

Мыйзамды кайталоо 14 - Кыргыз тилиндеги Библия, 2004 bible

Мыйзамды кайталоо 14

¹Силер Кудай-Теңириңердин балдарысыңар. Өлгөндөр үчүн аза күткөнүңөрдү билдирип, денеңерге так салбагыла, чачыңарды кыркпагыла.

²Анткени сен Кудай-Теңириңдин ыйык элисиң. Сени Теңир жер үстүндөгү бардык элдердин ичинен Өз эли болушуң үчүн тандап алган.

³Эч кандай арам нерсе жебегиле.

⁴Силер жей турган мал мына булар: уй, кой, эчки,

⁵бугу, жейрен, топоз, элик, зубр, багыш, тоо теке.

⁶Ача туяктуу, салаасы терең, кепшеген жаныбарларды жесеңер болот.

⁷Бирок кепшеген, ача туяктуу, салаасы терең жаныбарлардын ичинен төөнү, коёнду, суурду жебегиле, анткени алар кепшегени менен, ача туяктуу эмес, силер үчүн алар арам болуп эсептелет.

⁸Чочкону да жебегиле, анткени ал ача туяктуу болгону менен кепшебейт. Ал силер үчүн арам. Алардын этин жебегиле, өлүгүнө колуңарды тийгизбегиле.

⁹Сууда жашаган жаныбарлардын ичинен сүзө турган канаты жана кабырчыгы бар жаныбарлардын бардыгын жесеңер болот.

¹⁰Ал эми канаты менен кабырчыгы жок жаныбарларды жебегиле. Алар силер үчүн арам.

¹¹Адал канаттуулардын баарын жегиле.

¹²Бирок алардын ичинен буларды жебешиңер керек: бүркүт, жору, суу бүркүтү,

¹³кулаалы, шумкар, ылаачын жана анын түрлөрү,

¹⁴карга жана анын түрлөрү,

¹⁵төө куш, үкү, чардак, туйгун жана анын түрлөрү,

¹⁶чекир көз үкү, ибис, ак куу,

¹⁷биргазан, ак кажыр, балыкчы куш,

¹⁸көк кытан, илегилек жана анын түрлөрү, сасык үпүп, жарганат.

¹⁹Канаты бар курт-кумурскалардын баары силер үчүн арам. Аларды жебегиле.

²⁰Адал канаттуулардын баарын жегиле.

²¹Эч бир жаныбардын өлүгүн жебегиле. Аны силердин араңарда жашаган бөтөн жерликке бер, ошол жесин, же ошого сат, анткени сен Кудай-Теңириңдин ыйык элисиң. Улакты энесинин сүтүнө бышырба.

²²Жыл сайын алган түшүмүңдүн ондон бир бөлүгүн бөлүп кой.

²³Кудай-Теңириң Өзүнүн ысымы бар болуп турушу үчүн тандап алган жерде эгиниңдин, жүзүмүңдүн ширесинин, зайтун майыңдын ондон бир бөлүгүн, бодо жана майда малыңдын биринчи төлүн же, Кудай-Теңириңден өмүрүң өткөнчө коркуп жүрүүнү ошентип үйрөнөсүң.

²⁴Кудай-Теңириң Өзүнүн ысымы бар болуп турушу үчүн, сага батасын бериш үчүн тандап алган жер сенден алыс болуп, ушуларды алып бара албасаң, сен үчүн жол алыс болсо,

²⁵анда аларды күмүшкө алмаштырып, Кудай-Теңириң тандап алган жерге алып кел.

²⁶Ал жерден күмүштөрүңө эмне кааласаң, ошону: өгүз болобу, кой болобу, шарап болобу, күчтүү ичимдик болобу, сатып ал. Аларды Кудай-Теңириңдин алдында үй-бүлөң менен бирге ичип-жеп көңүл ач.

²⁷Сени менен жашаган лебилерди таштаба, анткени алар сени менен бирге үлүш алышкан жок.

²⁸Yч жыл өткөндөн кийин, ошол жылы алган түшүмүңдүн ондон бир бөлүгүн кампаларыңа сал.

²⁹Аны лебилер келип алсын, анткени аларга сени менен кошо үлүш бөлүнгөн жок. Сенин жаныңда жашаган келгиндер, жетимдер, жесирлер тойгончо жешсин, ошондо Кудай-Теңириң ар бир ишиңе батасын берет.