Read Кыргыз тилиндеги Библия, 2004 1 Корунттуктарга 13 Bible Online

1 Корунттуктарга 13 - Кыргыз тилиндеги Библия, 2004 bible

1 Корунттуктарга 13

¹Эгерде мен адамдын жана периштенин тили менен сүйлөй алсам, бирок менде сүйүү жок болсо, анда мен зың эткен жезмин же шыңгыраган коңгуроомун.

²Эгерде мен пайгамбарчылык кылсам, бардык сырларды билсем, толук билимге ээ болсом, тоону ордунан жылдыра ала тургандай ишенимим бар болсо, бирок менде сүйүү жок болсо, анда мен эч ким эмесмин.

³Эгерде мен мал-мүлкүмдүн баарын таратып берсем, денемди отко таштоого даяр болсом, бирок менде сүйүү жок болсо, мунун баары пайдасыз.

⁴Сүйүү чыдамдуу, боорукер, сүйүү көрө албастык кылбайт, мактанбайт, текеберденбейт,

⁵адепсиздик кылбайт, өз пайдасын көздөбөйт, ачууланбайт, кек сактабайт,

⁶адилетсиздикке кубанбайт, чындыкка кубанат,

⁷баарын жаап коёт, баарына ишенет, баарынан үмүт үзбөйт, баарын көтөрөт.

⁸Сүйүү эч качан токтобойт. Пайгамбарчылык айтылбай калат, тилдер сүйлөнбөй калат, билимдин кереги жок болуп калат.

⁹Анткени биздин билимибиз чектелүү, пайгамбарчылыгыбыз да чектелүү.

¹⁰Жеткилеңдүүлүктүн убагы келгенде, чектелүү нерселер жок болот.

¹¹Бала кезимде жаш балача сүйлөп, жаш балача ойлонуп, жаш балача ой жүгүртчүмүн. Эр жеткенде балалык көз караштарымды калтырдым.

¹²Азыр биз күңүрт күзгүдөн көргөнсүп, даана көрө албай жатабыз, кийин болсо даана көрөбүз. Азыр менин билимим чектелүү, Теңир мени кандай билсе, кийин мен баарын ошондой билип алам.

¹³Ал эми азыр үчөө бар: ишеним, үмүт, сүйүү. Бирок сүйүү баарынан жогору.