Read Кыргыз тилиндеги Библия, 2004 1 Тесалоникалыктарга 5 Bible Online

1 Тесалоникалыктарга 5 - Кыргыз тилиндеги Библия, 2004 bible

1 Тесалоникалыктарга 5

¹Бир туугандар, убакыты жана мөөнөтү жөнүндө жазып кереги жок.

²Теңирдин күнү түн жамынган уурудай болуп келерин силер жакшы билесиңер.

³«Тынчтык жана коопсуздук», – деп айтышканда, кош бойлуу аялдын толгоосу кармаган сыяктуу, алар күтүлбөгөн жерден өлүмгө дуушар болушат жана андан качып кутула алышпайт.

⁴Бирок, бир туугандар, ал Күн силерге ууруга окшоп күтүлбөгөн жерден келгидей, силер караңгыда эмессиңер.

⁵Анткени силер, баарыңар, жарыктын уулдарысыңар, күндүн уулдарысыңар. Биз караңгынын да, түндүн да уулдары эмеспиз.

⁶Ошондуктан башкаларга окшоп уктабайлы. Тескерисинче, сергек жана эстүү бололу.

⁷Себеби уктагандар түнкүсүн укташат, ичкендер түнкүсүн ичишет.

⁸Биз болсо күндүн уулдарыбыз, ошондуктан эстүү бололу. Ишеним менен сүйүүнү соот кылып, куткарылуу үмүтүн туулга кылып киели.

⁹Анткени Кудай бизди каарга эмес, биз үчүн өлгөн Теңирибиз Ыйса Машайак аркылуу куткарылууга белгилеген.

¹⁰Сергек болсок да, уктасак да, Аны менен жашашыбыз үчүн, Ал ушундай кылган.

¹¹Ошондуктан бири-бириңерге кайрат берип, акыл-насаат айтып жатканыңардай эле, мындан ары да ошондой кыла бергиле.

¹²Бир туугандар, силерден суранарыбыз, араңарда эмгектенип жаткандарды, Теңир жолундагы жетекчилериңерди жана насаатчыларыңарды сыйлагыла.

¹³Аларды кылган эмгеги үчүн өзгөчө сыйлагыла, сүйгүлө. Өз ара тынчтыкта болгула.

¹⁴Силерден өтүнөрүбүз, бир туугандар, ээнбаштык кылгандарды эскерткиле, коркокторго кайрат бергиле, алсыздарды колдогула, баарына чыдамдуулук көрсөткүлө.

¹⁵Жамандыкка жамандык менен жооп бербегиле, тескерисинче, ар дайым бири-бириңерге жана бардыгына жакшылык кылгыла.

¹⁶Дайыма кубангыла.

¹⁷Үзгүлтүксүз сыйынгыла.

¹⁸Бардыгы үчүн ыраазычылык билдиргиле, анткени Кудайдын Машайак Ыйса аркылуу силерге ачылган эрки ушундай.

¹⁹Рухту өчүрбөгүлө.

²⁰Пайгамбарчылыктарга маани бербей койбогула.

²¹Бардыгын сынагыла, жакшысын кабыл алгыла.

²²Ар кандай жамандыктан алыс болгула.

²³Тынчтыктын булагы болгон Кудай Өзү силерди толугу менен ыйык кылсын. Рухуңар, жаныңар жана денеңер Теңирибиз Ыйса Машайак келгенге чейин эч кемчиликсиз, толук сакталсын.

²⁴Силерди чакырып алган Кудай ишенимдүү, Ал ишке ашырат.

²⁵Бир туугандар, биз үчүн сыйынгыла.

²⁶Бардык бир туугандарды өөп, салам айтып койгула.

²⁷Бул катты бардык ыйык бир туугандарга окуп беришиңерди Теңирдин атынан суранам.

²⁸Теңирибиз Ыйса Машайак баарыңарга ырайымын төгө берсин! Оомийин.