Read Кыргыз тилиндеги Библия, 2004 1 Тиметейге 2 Bible Online

1 Тиметейге 2 - Кыргыз тилиндеги Библия, 2004 bible

1 Тиметейге 2

¹Ошентип, баарынан мурда суранарым: такыбаалык, тазалык менен бейпил жана коогасыз жашашыбыз үчүн,

²бардык адамдар үчүн, падышалар жана бардык башкаруучулар үчүн сыйынгыла, өтүнгүлө, жалынгыла жана ыраазычылык билдиргиле.

³Анткени бул жакшы жана биздин Куткаруучубуз Кудайга жагат.

⁴Анткени Ал бардык адамдардын куткарылышын, чындыкты таанып билишин каалайт.

⁵Анткени Кудай бирөө, Кудай менен адамдардын ортосундагы арачы да бирөө. Ал – адам болуп келген Машайак Ыйса.

⁶Ал Өзүн бардык адамдар үчүн кун катары берди: өз убагында берилген күбөлөндүрүү ушул.

⁷Мен ошол күбөлөндүрүүнүн жар салуучусу жана элчиси, ишеним жана чындык менен окуткан бутпарастардын окутуучусу болуп дайындалгам. Мен чындыкты айтып жатам, калп айткан жокмун.

⁸Ошондуктан мен эркектердин бардык жерде таза колдорун көтөрүп, ачууланбастан жана шектенбестен сыйынууларын каалайм.

⁹Ошондой эле аялдар да өздөрүн өргөн чачы, алтын, бермет, кымбат баалуу кийим менен эмес, жөнөкөй кийим менен, уят-сыйыттуулук жана акыл-эстүүлүк менен,

¹⁰өздөрүн такыбаа жашоого арнаган аялдарга таандык болгон жакшы иштер менен жасалгалашсын.

¹¹Аял киши унчукпастан, толук баш ийүү менен үйрөнсүн.

¹²Аял кишинин окутушуна, күйөөсүнө бийлик кылышына тыюу салам, ал унчукпасын.

¹³Анткени адегенде Адам ата, андан кийин Обо эне жаратылган.

¹⁴Адам ата азгырылган эмес, аял азгырылып, күнөөгө баткан.

¹⁵Ошондой болсо да, эгерде ишенимди жана сүйүүнү, ыйыктыкты жана адеп-ахлактуулукту сактаса, бала төрөө аркылуу куткарылат.