Read Кыргыз тилиндеги Библия, 2004 1 Тиметейге 4 Bible Online

1 Тиметейге 4 - Кыргыз тилиндеги Библия, 2004 bible

1 Тиметейге 4

¹Рух болсо мындай деп ачык айтып жатат: акыркы убактарда адаштыруучу рухтарга жана жиндердин окутууларына кулак салып, кээ бирөөлөр ишенимден четтешет.

²Бул окутуулар абийири күйүп кеткен калпычылардын эки жүздүүлүгү менен таратылат.

³Алар үйлөнүүгө жана Кудай жараткан кээ бир тамактарды жегенге тыюу салышат. Бирок ал тамактарды ишенгендер менен чындыкты таанып билгендер ыраазычылык билдирүү менен жеши керек.

⁴Анткени Кудай жараткан нерсенин бардыгы жакшы. Эгерде ыраазычылык менен кабыл алынса, эч бир нерсе четке кагылбоого тийиш.

⁵Себеби алардын бардыгы Кудайдын сөзү жана сыйынуу менен ыйыкталынат.

⁶Ушуну бир туугандарга үйрөтсөң, өзүң жолдогон жакшы окутуунун жана ишенимдин сөздөрү менен азыктанган, Ыйса Машайактын жакшы кызматчысы болосуң.

⁷Пайдасыз, куру сөздөрдөн кач. Такыбаа болууга машык.

⁸Анткени денени машыктыруудан пайда аз, ал эми такыбаалык бардык нерсеге пайдалуу, анда азыркы жана келечектеги жашоо үчүн убадалар камтылган.

⁹Бул сөз чындык жана толугу менен кабыл алынууга арзыйт.

¹⁰Анткени биз бардык адамдардын, айрыкча Ыйсага ишенгендердин, Куткаруучусу болгон тирүү Кудайдан үмүттөнгөндүгүбүз үчүн, эмгектенип да, кордукка чыдап да жатабыз.

¹¹Ушуну айтып үйрөт.

¹²Эч ким сени жашсынтпашы үчүн, сен Ыйсага ишенгендерге сөзүң менен, жүрүш-турушуң менен, сүйүүң менен, ишенимиң менен, тазалыгың менен үлгү бол.

¹³Мен келгенче, Ыйык Жазууну окуп берип, насаат айтып, үйрөтүп тур.

¹⁴Пайгамбарчылык боюнча Жыйын башчыларынын кол коюп сыйынуусу аркылуу берилген жөндөмдүүлүгүңө көңүл коштук кылба.

¹⁵Ошол үчүн кам көр, ошону таштаба, сенин ийгилигиңди бардыгы көргүдөй болсун.

¹⁶Өзүңө жана окутууга көңүл бур, ушул нерседе туруктуу бол, анткени ошентүү менен өзүңдү да, угуучуларыңды да куткарасың.