Read Кыргыз тилиндеги Жаны Келишим (Луч Надежды) Матай 14 Bible Online

Матай 14 - Кыргыз тилиндеги Жаны Келишим (Луч Надежды) bible

Матай 14

¹1 Ошол күндөрү дубан акими Ирод Ыйса жөнүндө угуп,

²2 өз карамагындагы адамдарына: «Бул - чөмүлдүрүүчү Жакан. Ал тирилиптир, ошондуктан кереметтерди көрсөтүп жатат», - деди.

³3 Ирод өзүнүн бир тууганы Филиптин аялы Иродия үчүн Жаканды байлатып, түрмөгө отургуздурган эле.

⁴4 Анткени Жакан ага: «Бул аялды албашың керек болчу», - деп айткан.

⁵5 Ирод Жаканды өлтүргүсү келген, бирок элден корккон. Анткени эл аны пайгамбар деп эсептечү.

⁶6 Ироддун туулган күнү белгиленип жатканда, Иродиянын кызы ортого чыгып бийлеп берди. Анын бийлегени Иродго жагып калгандыктан,

⁷7 ал эмнени гана сурабасын, берерин айтып, ант берди.

⁸8 Кыз болсо энесинин үйрөтүүсү боюнча: «Мага азыр чөмүлдүрүүчү Жакандын башын идишке салдырып келип бер», - деди.

⁹9 Буга падыша капа болду. Бирок конокторунун алдында ант берип койгондугу үчүн, анын сураганын орундатууну буйруду.

¹⁰10 Жакандын башын алууга түрмөгө киши жиберди.

¹¹11 Идишке салынган башты кызга алып келип беришти, кыз болсо аны энесине алып барып берди.

¹²12 Шакирттери келип, анын сөөгүн коюшту. Андан кийин алар барып, Ыйсага кабарлашты.

¹³13 Ыйса муну укканда, Өзү жалгыз кайыкка түшүп, ээн жерге сүзүп кетти. Бул жөнүндө уккан адамдар өз шаарларынан чыгып, Анын артынан жөө ээрчишти.

¹⁴14 Жээкке чыгып, Ыйса чогулган көп элди көрдү. Аларга боору ооруп, оорулууларын айыктырды.

¹⁵15 Кеч киргенде, шакирттери Ыйсанын жанына келип: «Бул ээн жер экен, кеч да болуп кетти. Элди тарат, айылдарга барып, өздөрүнө тамак-аш сатып алышсын», - дешти.

¹⁶16 Ошондо Ыйса аларга: «Элди таратуунун кереги жок, аларга тамак-ашты силер бергиле», - деди.

¹⁷17 Алар Ага: «Бизде беш нан, эки балык эле бар», - дешти.

¹⁸18 Ошондо Ыйса: «Аларды бул жерге, Мага алып келгиле», - деди.

¹⁹19 Элге чөпкө отурууну буйругандан кийин, Ал беш нан менен эки балыкты алды да, асманды карап, Кудайга ыраазычылык билдирди. Нандарды сындырып, шакирттерине берди, алар болсо элге таратышты.

²⁰20 Бардыгы тоё жешти. Артып калган нандарды чогултканда, он эки себет толду.

²¹21 Аялдар менен бала-бакыраны эсептебегенде, тамактангандардын саны беш миңге жакын эле.

²²22 Ошондон кийин Ыйса Өзүнүн шакирттерине: «Кайыкка түшүп, Менден мурун наркы өйүзгө өтө бергиле», - деп буйруду. Өзү болсо элди таратыш үчүн калып калды.

²³23 Элди таратып жибергенден кийин, Өзү жалгыз сыйынуу үчүн, тоого чыкты. Түн ортосуна чейин Ыйса ал жерде жалгыз болду.

²⁴24 Ал убакта кайык көлдүн ортосуна жетип калган эле. Карама-каршы тараптан шамал соккондуктан, толкун кайыкты ары-бери чайпап жатты.

²⁵25 Түнкү төртүнчү күзөт убагында Ыйса көлдүн үстү менен басып, аларга келди.

²⁶26 Көлдүн үстүндө басып келе жаткан Ыйсаны көргөн шакирттер коркуп кетип: «Бул - элес!» - деп кыйкырып жиберишти.

²⁷27 Бирок Ыйса ошол замат аларга: «Кайраттангыла! Бул Менмин, коркпогула!» - деди.

²⁸28 Петир Ага: «Теңир! Эгерде бул Сен болсоң, буйрук бер, мен Сага суу үстү менен басып барайын», - деди.

²⁹29 Ыйса ага: «Кел», - деди. Петир кайыктан түшүп, суу үстү менен басып, Ыйсага жакын барды.

³⁰30 Бирок катуу шамалды көргөндө, коркуп кетип, чөгө баштады. Ошондо ал: «Теңир! Мени сакта!» - деп кыйкырды.

³¹31 Ыйса колун сунуп, аны дароо кармап калды. Анан ага: «Ишеними аз, эмнеге шектендиң?» - деди.

³²32 Алар кайыкка түшкөндөн кийин, шамал басылып калды.

³³33 Кайыктагылар болсо: «Сен чын эле Кудайдын Уулу экенсиң», - деп, Ага таазим кылышты.

³⁴34 Наркы өйүзгө, Генисарет жерине сүзүп өтүштү.

³⁵35 Ал жердин тургундары Ыйсаны таанып, тегерек-четтегилердин баарына киши жиберишти. Ошондо Ыйсага оорулуулардын баарын алып келишип,

³⁶36 Андан: «Кийимиңдин этегине эле колубузду тийгизүүгө уруксат бер», - деп өтүнүп жатышты. Анын кийимине колун тийгизгендер айыгып жатышты.