Read Кыргыз тилиндеги Жаны Келишим (Луч Надежды) Матай 15 Bible Online

Матай 15 - Кыргыз тилиндеги Жаны Келишим (Луч Надежды) bible

Матай 15

¹1 Ошол убакта Иерусалимден мыйзам окутуучулар менен фарисейлер Ыйсага келип:

²2 «Эмне үчүн Сенин шакирттериң ата-бабалардын салтын бузуп жатышат? Алар тамактанардын алдында кол жуу расмисин аткарышпайт», - дешти.

³3 Ыйса аларга мындай деп жооп берди: «Анда эмне үчүн өзүңөр салттарыңардын айынан Кудайдын осуятын бузуп жатасыңар?

⁴4 Кудай мындай деп осуят кылган: “Ата-энеңди сыйла”, “Ким атасына же энесине тил тийгизсе, ал өлүм жазасына тартылсын”.

⁵5 Силер болсо: “Эгерде ким атасына же энесине: "Сенин менден алчу нерсеңдин баары Кудайга багышталган", - десе,

⁶6 ал адам атасына же энесине сый көрсөтпөй койсо да болот”, - дейсиңер. Ошентип, силер өз салттарыңар үчүн Кудайдын осуятын четке кагып койдуңар.

⁷7 Эки жүздүүлөр! Ышайа силер жөнүндө туура пайгамбарчылык кылган:

⁸8 “Бул эл Мага оозу менен жакындайт, Мени тили менен урматтайт, бирок жүрөгү Менден алыс.

⁹9 Алардын Мени урматтаганы - бекер, анткени алардын үйрөткөнү - адамдык эрежелер”».

¹⁰10 Анан элди жанына чакырып, аларга мындай деди: «Жакшылап угуп, түшүнүп алгыла.

¹¹11 Адамды оозуна кирген нерсе арам кылбайт, оозунан чыккан нерсе арам кылат».

¹²12 Ошондо шакирттери келип, Ага: «Билесиңби, фарисейлер бул сөздү укканда кыжырданышты», - дешти.

¹³13 Ыйса аларга мындай деп жооп берди: «Асмандагы Атам тикпеген ар бир өсүмдүк түп-тамыры менен жок кылынат.

¹⁴14 Аларды жайына койгула. Алар - сокурлардын сокур жол башчылары. Сокурду сокур жетелесе, экөө тең аңга түшөт».

¹⁵15 Петир Ага: «Бул үлгү-насаат аңгемеңди бизге түшүндүрүп берчи!» - деди.

¹⁶16 Ошондо Ыйса: «Силер да алиге чейин түшүнө элексиңерби?

¹⁷17 Оозго кирген нерсенин баары ашказанга келип, анан тышка чыгып кетерин билбейсиңерби?

¹⁸18 Ооздон чыкканы жүрөктөн чыгат, адамды арам кылган мына ушу.

¹⁹19 Анткени жаман ойлор, киши өлтүрүү, нике бузуу, ойноштук кылуу, уурулук, жалаа жабуу, ушак жүрөктө пайда болот.

²⁰20 Мына ушулар адамды арам кылат. Ал эми кол жуу расмисин аткарбай тамактануу адамды арам кылбайт».

²¹21 Ыйса ал жерден чыгып, Тир жана Сидон аймактарына келди.

²²22 Ошол аймактардан канаандык бир аял чыгып, Ыйсага: «Мага ырайым кылчы, Теңир, Дөөттүн Уулу! Кызым жин оорусунан катуу кыйналып жатат», - деп кыйкырды.

²³23 Бирок Ыйса аялга жооп берген жок. Ошондо шакирттери Ага жакын келип: «Аркабыздан калбай кыйкырып келе жатат, аны кетирип жиберчи», - дешти.

²⁴24 Ыйса болсо: «Мен Ысрайыл элинин гана жоголгон койлоруна жиберилгем», - деп жооп берди.

²⁵25 Аял жакын келип, Анын алдына чөгөлөп: «Теңир! Мага жардам бере көр», - деп өтүндү.

²⁶26 Ыйса ага: «Балдардын нанын тартып алып, иттерге ыргыткан жакшы эмес», - деди.

²⁷27 Аял Ага: «Ооба, ошондой, Теңир! Бирок иттер да кожоюндарынын үстөлүнөн түшкөн күкүмдөрдү жешет эмеспи», - деди.

²⁸28 Ыйса аялга: «Оо, аял! Ишенимиң зор экен, тилегениңдей болсун», - деп жооп берди. Ошондо анын кызы дароо айыгып калды.

²⁹29 Ыйса ал жерден кетип, Галилея көлү тарапка келди. Бир тоого чыгып отурду.

³⁰30 Ошондо Анын жанына көп эл келди. Алар чолок, сокур, дудук, майып жана башка оорулуу адамдарды Ыйсанын алдына алып келишти. Ыйса аларды айыктырды.

³¹31 Дудуктар сүйлөп, буту баспагандар басып, сокурлар көрүп калышты. Муну көргөн эл таң калып, Ысрайылдын Кудайын даңктады.

³²32 Ыйса шакирттерин жанына чакырып алып, мындай деди: «Элди аяп жатам. Үч күндөн бери жанымда жүрүшөт, жегенге эч нерселери жок. Ачка кетиргим келбей турат, жолдо алсырап калышат го».

³³33 Шакирттери Ага: «Ушундай ээн жерде ушунча эл тоё турган нанды кайдан табабыз?» - дешти.

³⁴34 Ыйса алардан: «Канча наныңар бар?» - деп сурады. «Жети наныбыз, бир аз майда балыгыбыз бар», - дешти алар.

³⁵35 Ошондо Ал элге жерге отурууну буйруду.

³⁶36 Анан жети нан менен балыктарды алды да, асманды карап, Кудайга ыраазычылык билдирди. Нандарды сындырып, шакирттерине берди, алар болсо элге таратышты.

³⁷37 Бардыгы тоё жешти. Артып калган нандарды чогултканда, жети себет толду.

³⁸38 Аялдар менен бала-бакыраны эсептебегенде, тамактангандардын саны төрт миң эле.

³⁹39 Элди таратып жибергенден кийин, Ыйса кайыкка түшүп, Магдала аймагына келди.