Read Кыргыз тилиндеги Жаны Келишим (Луч Надежды) Матай 21 Bible Online

Матай 21 - Кыргыз тилиндеги Жаны Келишим (Луч Надежды) bible

Матай 21

¹1 Иерусалимге жакын жердеги, Зайтун тоосунун этегиндеги Бейтфагия айылына келишкенде, Ыйса эки шакиртин мындай деп жөнөттү:

²2 «Айылга кирсеңер, байланып турган бир ургаачы эшекти, кодикти, көрөсүңөр. Чечип алып, Мага алып келгиле.

³3 Эгерде бирөө бирдеме десе, “Булар Теңирге керек” дегиле. Ошондо ал дароо берет».

⁴4 Мунун баары пайгамбар аркылуу айтылган бул сөздөрдүн аткарылышы үчүн болду:

⁵5 «Сион кызына: “Сага өзүңдүн момун Падышаң келет. Ал ургаачы эшекке, кодикке, минип келет”, - деп айткыла».

⁶6 Шакирттер барып, Ыйса буйругандай кылышты.

⁷7 Ургаачы эшекти, кодикти, алып келип, үстүнө чапандарын салып, Ыйсаны мингизишти.

⁸8 Элдин көпчүлүгү өздөрүнүн кийимдерин, айрымдары болсо курма дарактарынын бутактарын кесип алып, жолго төшөп жатышты.

⁹9 Ыйсанын алды-артындагы эл: «Дөөттүн Уулуна даңк! Теңирдин атынан Келе Жатканга алкыш! Эң жогорудагыга даңк!» - деп, кыйкырып келе жатты.

¹⁰10 Ыйса Иерусалимге киргенде, бүт шаар кыймылга келип: «Бул ким?» - деп сурап жатты.

¹¹11 Эл болсо: «Бул - Галилеянын Назарет шаарынан чыккан Ыйса пайгамбар», - деп жооп берип жатты.

¹²12 Ыйса ийбадатканага кирип, андагы сатуучулар менен сатып алуучулардын баарын кууп чыкты. Акча алмаштыруучулардын үстөлдөрүн, көгүчкөн сатып отургандардын орундуктарын көңтөрүп таштады.

¹³13 Аларга мындай деди: «Ыйык Жазууда: “Менин үйүм сыйынуу үйү деп аталат”, - деп жазылган. Силер болсо аны каракчылардын уюгуна айландырып жатасыңар».

¹⁴14 Ийбадатканада Ыйсанын жанына сокурлар жана майыптар келди. Ыйса аларды айыктырды.

¹⁵15 Башкы ыйык кызмат кылуучулар менен мыйзам окутуучулар Ыйса кылып жаткан ажайып иштерди, ийбадатканада: «Дөөттүн Уулуна даңк!» - деп кыйкырып жаткан балдарды көргөндө, кыжырданышып, Ыйсага:

¹⁶16 «Булардын эмне деп жатканын угуп жатасыңбы?» - дешти. Ыйса аларга: «Ооба! Эмне, силер “Наристелер менен эмчектеги балдарга Өзүңдү даңктаттың” деген сөздөрдү такыр окуган жок белеңер?» - деди да, ал жерден кетип калды.

¹⁷17 Шаардан чыгып, Бетанияга келип, түндү ошол жерде өткөрдү.

¹⁸18 Эртең менен шаарга кайтып келе жатканда, Ыйса ачка болду.

¹⁹19 Жолдун жээгиндеги анжыр дарагын көрүп, анын жанына келди. Жалбырагынан башка эч нерсеси жок экенин көрүп, даракка мындай деди: «Мындан ары сенде эч качан жемиш болбосун». Анжыр дарагы ошол замат куурап калды.

²⁰20 Муну көргөн шакирттер: «Анжыр дарагынын тез эле куурап калганы кандай?» - деп таң калышты.

²¹21 Ыйса болсо аларга мындай деп жооп берди: «Силерге чындыкты айтып коёюн, эгерде ишенимиңер болсо, шектенбесеңер, анда анжыр дарагына кылынганды гана эмес, мына бул тоого да: “Ордуңан көтөрүлүп, деңизге түш”, - десеңер, айтканыңардай болот.

²²22 Ишеним менен сыйынсаңар, сураганыңардын баарын аласыңар».

²³23 Ыйса ийбадатканага келип, элди окутуп жатканда, башкы ыйык кызмат кылуучулар менен аксакалдар жанына басып келип: «Муну Сен кайсы бийликтин негизинде кылып жатасың? Мындай бийликти Сага ким берди?» - деп сурашты.

²⁴24 Ыйса аларга мындай деди: «Мен да силерге бир суроо берейин. Эгерде Мага жооп берсеңер, Мен да силерге муну кайсы бийликтин негизинде кылып жатканымды айтам.

²⁵25 Жакандын чөмүлдүрүүсү кимден эле: Кудайданбы же адамданбы?» Алар өз ара акылдашып: «Эгерде Кудайдан десек, анда Ал бизге: “Анда эмне үчүн Жаканга ишенген жоксуңар?” - дейт,

²⁶26 “Адамдардан”, - десек, элден коркобуз. Анткени баары Жаканды пайгамбар деп эсептешет», - дешти.

²⁷27 Анан Ыйсага: «Билбейбиз», - деп жооп беришти. Ошондо Ыйса аларга: «Кайсы бийликтин негизинде кылып жатканымды Мен да силерге айтпайм», - деди.

²⁸28 «Кандай деп ойлойсуңар? Бир адамдын эки уулу болгон экен. Ал биринчисине келип: “Уулум, барып, жүзүмдүгүмдө иштегин”, - дейт.

²⁹29 Бирок ал: “Барбайм”, - деп коюп, кийин анысына өкүнүп, иштегени барат.

³⁰30 Экинчи уулуна келип, ошону эле айтат. Анысы: “Баратам, кожоюн”, - деп коюп, барбай коёт.

³¹31 Экөөнүн кимиси атасынын каалоосун аткарды?» «Биринчиси», - деп жооп беришти. Ыйса аларга мындай деди: «Силерге чындыкты айтып коёюн, салык жыйноочулар менен бузулган аялдар Кудайдын Падышачылыгына силерден мурун барышат.

³²32 Анткени Жакан силерге туура жолду көрсөткөнү келген, бирок силер ага ишенген жоксуңар. Салык жыйноочулар менен бузулган аялдар ага ишеништи. Муну көргөндөн кийин да өкүнгөн жоксуңар, ишенген жоксуңар.

³³33 Дагы бир үлгү-насаат аңгемени угуп алгыла. Бир кожоюн жүзүм багын отургузат. Аны дубал менен курчап, жүзүм сыгылуучу жай жасап, күзөт мунарасын салат. Анан жүзүмдүгүн жүзүмчүлөргө тапшырып, өзү башка жакка кетет.

³⁴34 Түшүм жыйноо убагы жакындаганда, жүзүм жемишинен алдыртыш үчүн, кулдарын жумшайт.

³⁵35 Жүзүмчүлөр болсо анын кулдарын кармап алып, бирин сабашат, бирин өлтүрүшөт, бирин таш бараңга алышат.

³⁶36 Ошондо ал мурункудан да көп кулун жөнөтөт. Жүзүмчүлөр аларга да ошондой эле мамиле кылышат.

³⁷37 Акырында кожоюн: “Уулумдан уялышар”, - деп, уулун жөнөтөт.

³⁸38 Бирок жүзүмчүлөр анын уулун көрүшкөндө, өз ара: “Бул - мурасчы. Жүргүлө, аны өлтүрүп, мурасына ээ бололу”, - дешет.

³⁹39 Аны кармап алып, жүзүмдүктүн сыртына алып чыгып, өлтүрүп салышат.

⁴⁰40 Жүзүмдүктүн кожоюну кайтып келгенде, бул жүзүмчүлөрдү эмне кылат?»

⁴¹41 Алар Ага: «Бул зулумдарга ал азаптуу өлүм өкүмүн чыгарат, жүзүмдүктү болсо түшүмүн өз маалында жыйнап бере турган жүзүмчүлөргө тапшырат», - деп жооп беришти.

⁴²42 Ошондо Ыйса аларга мындай деди: «Ыйык Жазуудагы “Куруучулар жаратпай койгон таш бурчтун негизи болуп калды. Бул Теңирден, бул биздин көзүбүзгө укмуштуу көрүнөт” деген сөздөрдү такыр окуган жок белеңер?

⁴³43 Ошондуктан силерге айтып коёюн, Кудайдын Падышачылыгы силерден тартылып алынып, жемишин бере турган адамдарга берилет.

⁴⁴44 Ал ташка жыгылган адам өлөт. Ал эми ал таш кимдин үстүнө куласа, аны басып өлтүрөт».

⁴⁵45 Бул үлгү-насаат аңгемелерди уккан башкы ыйык кызмат кылуучулар менен фарисейлер Ыйсанын өздөрү жөнүндө айтып жатканын түшүнүштү.

⁴⁶46 Алар Ыйсаны колго түшүрүүгө аракет кылышты, бирок элден коркушту. Анткени эл Аны пайгамбар деп эсептечү.