Read Кыргыз тилиндеги Жаны Келишим (Луч Надежды) Матай 22 Bible Online

Матай 22 - Кыргыз тилиндеги Жаны Келишим (Луч Надежды) bible

Матай 22

¹1 Ыйса үлгү-насаат аңгемелерин улантты:

²2 «Асман Падышачылыгын бул нерсеге салыштырса болот: бир падыша өзүнүн уулунун үйлөнүү тоюн өткөрмөкчү болот.

³3 Ал тойго чакырылгандарды чакырыш үчүн, кулдарын жөнөтөт. Бирок алардын келгиси келбейт.

⁴4 Ошондо ал башка кулдарын жөнөтүп: “Дасторконумду даярдап койдум. Торпокторум, борго байланган малым союлду, баары даяр. Тойго келгиле!” - деп айттырат.

⁵5 Бирок чакырылгандар кайдыгер мамиле кылып, бири талаасына кетсе, бири соода кылганы кетет.

⁶6 Дагы бирөөлөрү кулдарын кармап алып кордоп, өлтүрүп салышат.

⁷7 Муну уккан падыша каарданып, аскерлерин жиберет. Алар канкорлорду өлтүрүп, шаарын күлгө айландырышат.

⁸8 Ошондо падыша кулдарына мындай дейт: “Той даяр, бирок чакырылгандар татыктуу эмес болуп чыкты.

⁹9 Ошондуктан тогуз жолдун тоомуна баргыла да, жолуккандардын баарын тойго чакыргыла”.

¹⁰10 Кулдар жолго чыгышат да, жолуккандардын баарын - жаманын да, жакшысын да чогултушат. Ошентип, той өткөргөн жай мейманга толот.

¹¹11 Падыша меймандарды көрүш үчүн кирип, ал жерден той кийимин кийбеген бир адамды көрөт.

¹²12 Ага: “Досум, той кийимин кийбей, бул жерге кантип кирдиң?” - дейт. Тиги адам унчукпайт.

¹³13 Ошондо падыша кулдарына мындай дейт: “Колу-бутун байлап, муну сырттагы караңгылыкка ыргытып жибергиле. Ал жерде ый жана тиш кычыратуу болот”.

¹⁴14 Анткени чакырылгандар көп, бирок тандалгандар аз».

¹⁵15 Ошондон кийин фарисейлер барып, Ыйсаны сөзүнөн кармоо жөнүндө кеңешишти.

¹⁶16 Анан алар Ироддун адамдарын жана өз шакирттерин Ыйсага жөнөтүштү. Алар келип: «Устат! Сенин адилеттүү адам экениң бизге белгилүү. Кудайдын мыйзамдарын туура окутасың. Эч кимге жагынбайсың, бет карамалык кылбайсың.

¹⁷17 Оюңду айтчы, Рим падышасына салык төлөө туурабы же туура эмеспи?» - дешти.

¹⁸18 Ыйса алардын арам оюн билип: «Эки жүздүүлөр! Эмнеге Мени сынап жатасыңар?

¹⁹19 Мага салыкка төлөнүүчү тыйынды көрсөткүлөчү!» - деди. Ага бир динарий алып келип беришти.

²⁰20 Ыйса алардан: «Мына бул сүрөт менен жазуу кимдики?» - деп сурады.

²¹21 «Падышаныкы», - деп жооп беришти алар. Ошондо Ыйса аларга: «Анда падышага тиешелүүнү падышага, Кудайга тиешелүүнү Кудайга бергиле», - деди.

²²22 Алар муну укканда таң калып, Ыйсанын жанынан кетип калышты.

²³23 «Өлгөндөр тирилбейт» деген садукейлер ошол күнү Ыйсанын жанына келип, мындай деп сурашты:

²⁴24 «Устат! Муса мындай дебеди беле: “Ким бала көрбөй көз жумса, анда анын аялын бир тууганы алып, анын тукумун уласын”.

²⁵25 Арабызда жети бир тууган бар эле. Биринчиси үйлөнүп, бала көрбөй өлүп калды. Аялы инисине калды.

²⁶26 Экинчиси, үчүнчүсү, атүгүл, жетинчиси да ошондой болду.

²⁷27 Акырында аял да өлдү.

²⁸28 Өлгөндөр тирилгенден кийин, ал аял бул жети бир туугандын кимисинин аялы болот? Анткени аны баары аялдыкка алышкан».

²⁹29 Ыйса аларга мындай деп жооп берди: «Силер Ыйык Жазууну жана Кудайдын күчүн билбегендиктен жаңылып жатасыңар.

³⁰30 Анткени өлгөндөр тирилгенден кийин, аял алуу, күйөөгө тийүү деген болбойт. Алар асмандагы Кудайдын периштелериндей болуп калышат.

³¹31 Ал эми өлгөндөрдүн тирилери жөнүндө болсо, Кудайдын

³²32 “Мен Ыбрайымдын, Ыскактын, Жакыптын Кудайымын” деген сөзүн окуган жок белеңер? Кудай - өлгөндөрдүн эмес, тирүүлөрдүн Кудайы».

³³33 Буларды уккан эл Анын окутуусуна таң калды.

³⁴34 Фарисейлер Ыйсанын садукейлерди сөзгө жыкканын угуп, чогула калышты.

³⁵35 Алардын арасындагы бир мыйзам окутуучу Ыйсаны сынап, мындай деп сурады:

³⁶36 «Устат! Мыйзамдагы эң маанилүү осуят кайсы?»

³⁷37 Ыйса ага мындай деп жооп берди: «Кудай-Теңириңди чын жүрөгүң менен, жан-дилиң менен, бүт акылың менен сүй.

³⁸38 Биринчи жана эң маанилүү осуят ушул.

³⁹39 Экинчиси ушуга эле окшош: “Өзүңдү кандай сүйсөң, жакыныңды ошондой сүй”.

⁴⁰40 Бүт мыйзам жана пайгамбарчылыктар ушул эки осуятка негизделген».

⁴¹41 Фарисейлер чогулганда, Ыйса алардан:

⁴²42 «Машайак жөнүндө кандай ойдосуңар, Ал кимдин Уулу?» - деп сурады. «Дөөттүн», - деп жооп беришти алар.

⁴³43 Ыйса аларга: «Дөөт Ыйык Рухтун жетеги менен Машайакты “Теңирим” деп айткандыгын кандай түшүнөсүңөр? Анткени Дөөт мындай дебеди беле:

⁴⁴44 “Теңир менин Теңириме мындай деди: "Мен Сенин душмандарыңды бут алдыңа жыкканга чейин, Менин оң жагыма отур"”.

⁴⁵45 Ошентип, эгерде Дөөт Аны “Теңир” деп атаган болсо, кантип Ал анын Уулу болсун?» - деди.

⁴⁶46 Ошондо эч ким жооп бере алган жок. Ошол күндөн тартып, эч ким Ага суроо берүүгө даабай калды.