Read Кыргыз тилиндеги Жаны Келишим (Луч Надежды) Матай 24 Bible Online

Матай 24 - Кыргыз тилиндеги Жаны Келишим (Луч Надежды) bible

Матай 24

¹1 Ыйса ийбадатканадан чыгып кетип бара жатканда, ийбадаткананын имараттарын көрсөтүш үчүн, шакирттери жанына келишти.

²2 Ыйса аларга: «Булардын баарын көрүп турасыңарбы? Силерге чындыкты айтып коёюн, бул жерде таш үстүндө таш калбайт, баары кыйратылат», - деди.

³3 Ыйса Зайтун тоосунда отурганда, шакирттери жанына келип: «Бизге айтып берчи, бул качан болот? Сенин келер убактыңды жана дүйнөнүн акыры келип калганын кандай белгилер аркылуу билсе болот?» - деп сурашты.

⁴4 Ыйса аларга мындай деп жооп берди: «Силерди бирөө адаштырып кетпес үчүн, сак болгула.

⁵5 Анткени: “Машайак Менмин”, - деп, Менин ысымымды жамынып көптөр келип, көп адамдарды адаштырышат.

⁶6 Ошондой эле алыс жана жакын жерде болуп жаткан согуштар жөнүндө угасыңар. Бирок коркпогула! Анткени булардын баары болушу керек, бирок бул дүйнөнүн акыры эмес!

⁷7 Бир элге бир эл, бир падышачылыкка бир падышачылык каршы көтөрүлөт. Жер-жерлерде ачарчылык, жугуштуу оорулар жана жер титирөөлөр болот.

⁸8 Булардын баары кыйынчылыктардын башталышы гана.

⁹9 Ошондо силерди кыйнашат, өлтүрүшөт. Менин ысымым үчүн бардык элдерге жек көрүндү болосуңар.

¹⁰10 Ошондо көптөр азгырылышат, бири-бирине чыккынчылык кылышат, бири-бирин жек көрүшөт.

¹¹11 Көптөгөн жалган пайгамбарлар чыгып, көптөрдү адаштырат.

¹²12 Тартипсиздиктин көбөйүү себебинен көбүндө сүйүүнүн ысыгы кайтат.

¹³13 Акырына чейин чыдаган адам куткарылат.

¹⁴14 Асман Падышачылыгы жөнүндөгү бул Жакшы Кабар бүт ааламга, бардык элдерге күбөлөндүрүү катары таратылат, ошондон кийин дүйнөнүн акыры келет.

¹⁵15 Окуган адам түшүнүп алсын: ошентип, Даниел пайгамбар аркылуу айтылган кыйратуучу жийиркенич ыйык жайда турганын көргөнүңөрдө,

¹⁶16 Жүйүт аймагындагылар тоолорго качып кетишсин.

¹⁷17 Ким үйдүн үстүндө болсо, ал үйүнөн бир нерсе алуу үчүн түшпөсүн.

¹⁸18 Ким талаада болсо, ал кийимдерин алуу үчүн, артка кайтпасын.

¹⁹19 Ошол күндөрү кош бойлуу жана эмчекте баласы бар аялдарга кыйын болот.

²⁰20 Качууңар кышка же ишемби күнүнө туура келип калбас үчүн, сыйынгыла.

²¹21 Анткени ошондо жер жаралгандан тартып, азыркыга чейин болбогон жана андан кийин да болбой турган чоң алаамат болот.

²²22 Эгерде ал күндөр кыскартылбаса, эч бир адам куткарылмак эмес. Ал күндөр тандалгандар үчүн гана кыскартылат.

²³23 Эгерде ошондо кимдир бирөө силерге: “Машайак мына, бул жерде” же “Тигине, тигил жерде”, - десе, ишенбегиле.

²⁴24 Анткени жалган машайактар, жалган пайгамбарлар чыгат. Мүмкүн болсо тандалгандарды да адаштыруу үчүн, чоң жышаандарды жана ажайыптарды көрсөтүшөт.

²⁵25 Мына, Мен силерге алдын ала айттым.

²⁶26 Ошондуктан, эгерде силерге: “Мына, Ал ээн талаада”, - дешсе, чыкпагыла; “Мына, Ал ички бөлмөдө”, - дешсе, ишенбегиле.

²⁷27 Анткени Адам Уулу чыгыштан батышка чейин жарк этип көрүнгөн чагылган сыяктуу келет.

²⁸28 Өлүк кайсы жерде болсо, жору-кузгун ошол жерге чогулат.

²⁹29 Ошол күндөрдөгү алааматтан кийин күн караңгылап, ай өз жарыгын бербей калат. Асмандан жылдыздар түшүп, асман күчтөрү кыймылдайт.

³⁰30 Ошондо асмандан Адам Уулунун жышааны көрүнөт. Жер үстүндөгү бардык элдер боздошот жана Адам Уулунун асмандагы булуттар үстүндө улуу күч жана даңк менен келе жатканын көрүшөт.

³¹31 Ал чоң сурнай тарткан периштелерин жиберет, алар Кудай тандап алган адамдарды төгөрөктүн төрт бурчунан чогултушат.

³²32 Анжыр дарагынан сабак алгыла: анын бутактары көөп, бүчүр байлап калганда, жай келерине аз калганын билесиңер.

³³33 Ошол сыяктуу эле силер да мунун баарын көргөнүңөрдө, аз убакыт калганын, босогодо турганын билсеңер болот.

³⁴34 Силерге чындыкты айтып коёюн, мунун баары болмоюнча, бул муун жок болуп кетпейт.

³⁵35 Асман менен жер жок болуп кетет, Менин сөздөрүм болсо жок болбойт.

³⁶36 Ал күн жана саат жөнүндө Атамдан башка эч ким билбейт, асмандагы периштелер да билбейт.

³⁷37 Адам Уулу келген убакта Нухтун убагындагыдай болот.

³⁸38 Топон сууга чейин, Нух кемеге кирген күнгө чейин, адамдар ичип-жешкен, аял алышкан, күйөөгө тийишкен.

³⁹39 Топон суу каптап, баарын жок кылганга чейин ойлонушкан эмес. Адам Уулу келгенде да ошондой болот.

⁴⁰40 Ошондо талаада жүргөн эки кишинин бири алынат, бири калтырылат.

⁴¹41 Жаргылчак тартып отурган эки аялдын бири алынат, бири калтырылат.

⁴²42 Ошондуктан сергек болгула, анткени Теңириңердин кайсы убакта келерин билбейсиңер.

⁴³43 Ууру түндүн кайсы убагында келерин үй ээси билсе, сак болуп, ууруга үйүнүн түбүн каздыртмак эместигин билесиңер.

⁴⁴44 Ошондуктан силер да даяр болгула. Анткени Адам Уулу силер күтпөгөн убакта келет.

⁴⁵45 Кулдардын тамагын өз убагында берип турсун деп, кожоюн дайындаган ишенимдүү жана акылдуу кул ким?

⁴⁶46 Кожоюну кайтып келгенде, иштеп жаткан кул бактылуу.

⁴⁷47 Силерге чындыкты айтып коёюн, кожоюн өзүнүн бүт мал-мүлкүн ал кулга ишенип тапшырат.

⁴⁸48 Кулу жаман чыгып, “Кожоюнум жакында келбейт”, - деп ойлоп,

⁴⁹49 жолдошторун уруп-сабап, шарапкорлор менен ичип-жей баштаса,

⁵⁰50 кулдун кожоюну ал күтпөгөн күнү, ал ойлобогон убакта келет да,

⁵¹51 аны бөлө чаап, эки жүздүүлөргө тиешелүү жаза менен жазалайт. Ал жерде ый жана тиш кычыратуу болот.