Read Кыргыз тилиндеги Жаны Келишим (Луч Надежды) Матай 26 Bible Online

Матай 26 - Кыргыз тилиндеги Жаны Келишим (Луч Надежды) bible

Матай 26

¹1 Бул сөздөрдү айткандан кийин, Ыйса шакирттерине мындай деди:

²2 «Эки күндөн кийин Пасах майрамы болорун билесиңер. Адам Уулун айкаш жыгачка кадаш үчүн, адамдардын колуна салып беришет».

³3 Ошол убакта башкы ыйык кызмат кылуучулар менен аксакалдар Кайапа деген башкы ыйык кызматчынын үйүнө чогулуп,

⁴4 Ыйсаны амалкөйлүк менен колго түшүрүп, өлтүрүү жөнүндө кеңешишти.

⁵5 Бирок алар: «Эл козголоң чыгарбашы үчүн, муну майрам күндөрү ишке ашырууга болбойт», - дешти.

⁶6 Ыйса Бетаниядагы пес оорулуу Шымондун үйүндө эле.

⁷7 Бир аял айнек идишке кымбат баалуу жыпар жыттуу май алып келип, дасторкондо отурган Ыйсанын башына куйду.

⁸8 Шакирттери муну көргөндө: «Мындай ысырапчылыктын эмне кереги бар.

⁹9 Муну кымбат баада сатып, акчасын жакырларга таратып берсе болот эле да», - деп, нааразы болушту.

¹⁰10 Ыйса муну билип, аларга мындай деди: «Эмнеге аялды оңтойсуздандырып жатасыңар? Ал Мен үчүн жакшы иш кылды.

¹¹11 Анткени Мен силер менен дайыма эле боло бербейм, жардылар болсо дайыма жаныңарда болот.

¹²12 Жыпар жыттуу майды денеме куюу менен, ал Мени көргө коюуга даярдады.

¹³13 Силерге чындыкты айтып коёюн, бул Жакшы Кабар дүйнөнүн кайсы гана жеринде таратылбасын, бул аял эске алынып, анын кылганы жөнүндө да айтылат».

¹⁴14 Ошондо он эки шакирттин бири Жүйүт Искариот башкы ыйык кызмат кылуучуларга барып:

¹⁵15 «Аны колуңарга салып берсем, мага эмне бересиңер?» - деди. Алар ага отуз күмүш тыйын сунуш кылышты.

¹⁶16 Ошол убакыттан тартып, Жүйүт Ыйсаны алардын колуна салып берүү үчүн, ыңгайлуу учурду күтүп жүрдү.

¹⁷17 Ачыткысыз нан майрамынын биринчи күнү шакирттер Ыйсанын жанына келип: «Пасах тамагын Сага кайсы жерге даярдап берүүбүздү каалайсың?» - деп сурашты.

¹⁸18 Ыйса аларга мындай деди: «Шаардагы баланчаныкына баргыла да, Устат мындай дейт дегиле: Менин убактым келип калды. Шакирттерим менен чогуу сеникинде Пасах майрамын өткөрөм».

¹⁹19 Шакирттер Ыйса буйругандай кылып, Пасах тамагын даярдашты.

²⁰20 Кеч киргенде, Ыйса он эки шакирти менен дасторконго отурду.

²¹21 Тамак ичип отурушканда, Ыйса аларга: «Силерге чындыкты айтып коёюн, араңардан бирөө Мага чыккынчылык кылат», - деди.

²²22 Буга аябай капа болгон алардын ар бири: «Мен эмесминби, Теңир?» - деп сурай баштады.

²³23 Ыйса аларга: «Мени менен бирге табакка колун салган адам Мага чыккынчылык кылат, - деп жооп берди.

²⁴24 Дегинкиси, Адам Уулу жөнүндө Ыйык Жазууда кандай жазылса, ошондой болуп жатат. Бирок Адам Уулуна чыккынчылык кылган адамга кайгы. Ал адам төрөлбөй эле койсо жакшы болмок».

²⁵25 Ошондо чыккынчылык кылган Жүйүт да: «Мен эмесминби, Устат?» - деп сурады. Ыйса ага: «Өзүң айтып жатасың», - деди.

²⁶26 Тамак ичип отурушканда, Ыйса нан алып, Кудайга ыраазычылык билдирди. Андан кийин нанды сындырып, шакирттерине берип жатып: «Алгыла, жегиле. Бул Менин Денем», - деди.

²⁷27 Анан чөйчөктү алып, Кудайга ыраазычылык билдирди да, аны шакирттерине узатып жатып, мындай деди: «Баарыңар мындан ичкиле.

²⁸28 Анткени бул - көптөрдүн күнөөлөрүнүн кечирилиши үчүн төгүлүп, жаңы келишимди беките турган Менин каным.

²⁹29 Силерге айтып коёюн, Атамдын Падышачылыгында силер менен жаңы шарап ичер күн келгенге чейин, Мен мындан ары жүзүм ширесинен ичпейм».

³⁰30 Кудайды даңктап ырдашкандан кийин, алар Зайтун тоосуна жөнөштү.

³¹31 Ошондо Ыйса шакирттерине мындай деди: «Ушул түнү баарыңар Менден шектенесиңер. Анткени Ыйык Жазууда: “Койчуну жок кылам, ошондо койлор туш-тушка чачырап кетет”, - деп жазылган.

³²32 Бирок Мен тирилгенден кийин, силерди Галилеядан тосуп алам».

³³33 Петир Ага: «Баары Сенден шектенишсе да, Мен эч качан шектенбейм», - деди.

³⁴34 Ыйса ага мындай деди: «Сага чындыкты айтып коёюн, ушул түнү, короз кыйкырганга чейин, сен Менден үч ирет баш тартасың».

³⁵35 Петир Ага: «Сени менен бирге өлүшүм керек болсо да, мен Сенден баш тартпайм», - деди. Ушундай сөздөрдү башка шакирттер да айтышты.

³⁶36 Анан Ыйса шакирттери менен Гетсемани деген жерге келип, аларга: «Мен тигил жакка барып сыйынып келгиче, ушул жерде отура тургула», - деди.

³⁷37 Ал Петир менен Зебедейдин эки уулун жанына ээрчитип алды. Анын көңүлү чөгүп, жаны кейип турду.

³⁸38 Ыйса аларга: «Жаным аябай кыйналып турат. Бул жерде калып, Мени менен бирге сергек болгула», - деди.

³⁹39 Анан Ал бир аз нарыраак барып, жүзтөмөндөп жыгылып, сыйына баштады: «Ата! Мүмкүн болсо, ушул чөйчөк Менин жанымдан кыя өтүп кетсинчи. Бирок Мен каалагандай эмес, Сен каалагандай болсун».

⁴⁰40 Кайтып келип, шакирттеринин уктап жатканын көрдү да, Петирге мындай деди: «Жада калса, бир саат Мени менен бирге сергек болуп тура албадыңарбы?

⁴¹41 Азгырылып кетпеш үчүн, сергек болгула жана сыйынгыла, анткени рух сергек, дене алсыз».

⁴²42 Анан четке чыгып, дагы сыйынды: «Ата! Бул чөйчөктүн Менден кыя өтүп кетиши мүмкүн эмес болсо, эгерде Мен андан ичишим керек болсо, анда Сен каалагандай болсун».

⁴³43 Кайтып келип, алардын кайра уктап калганын көрдү, анткени аларды уйку басып жаткан эле.

⁴⁴44 Нарыраак барып, ошол эле сөздөрдү айтып, үчүнчү ирет сыйынды.

⁴⁵45 Анан шакирттеринин жанына келип, мындай деди: «Силер дагы эле уктап, эс алып жатасыңарбы? Мына, убакыт келип калды, Адам Уулун күнөөкөрлөрдүн колуна салып беришет.

⁴⁶46 Тургула, кетели. Мына, Мага чыккынчылык кыла турган адам жакын келип калды».

⁴⁷47 Ал сөзүн айтып бүткүчө, он эки шакирттин бири Жүйүт келип калды. Анын жанында башкы ыйык кызмат кылуучулар менен аксакалдар жиберген, кылыч, союл көтөргөн бир топ адам бар эле.

⁴⁸48 Ыйсага чыккынчылык кылуучу болсо: «Мен кимди өпсөм, Ал - Ошол. Ошону кармагыла», - деди да,

⁴⁹49 ошол замат Ыйсанын жанына келип: «Салам, Устат!» - деп, Аны өптү.

⁵⁰50 Ыйса болсо ага: «Досум, эмне үчүн келдиң?» - деди. Ошондо жиберилген адамдар жакын келип, Аны кармап алышты.

⁵¹51 Ыйсанын жанында жүргөндөрдүн бири кылычын сууруп алып, башкы ыйык кызмат кылуучунун кулунун кулагын шылый чапты.

⁵²52 Ошондо Ыйса ага мындай деди: «Кылычыңды кынына сал. Кылыч көтөргөндүн баары кылычтан өлөт.

⁵³53 Же, эмне, Атамдан азыр жардам сурап ала албайт деп ойлойсуңбу? Ал Мага он эки түмөндөн көп периштени жиберер.

⁵⁴54 Ушундай болуш керек экендигин билдирген Ыйык Жазуулар анда кантип аткарылмак?»

⁵⁵55 Анан элге кайрылып: «Каракчыны кармачудай болуп, Мени кармаш үчүн, кылыч, союл алып чыктыңарбы? Күн сайын ийбадатканада элди окутуп, силер менен отурганымда, Мени кармаган жок элеңер.

⁵⁶56 Пайгамбарчылыктардын аткарылышы үчүн ушундай болду», - деди. Ошондо шакирттери Аны таштап, качып кетишти.

⁵⁷57 Ыйсаны туткундагандар Аны башкы ыйык кызмат кылуучу Кайапанын алдына алып барышты. Ал жерге башкы ыйык кызмат кылуучулар, аксакалдар чогулушкан эле.

⁵⁸58 Петир Аны алыстан ээрчип, башкы ыйык кызмат кылуучунун короосуна чейин келди. Аягы эмне менен бүтөр экен деп, ичкери кирип, сакчылардын жанына отурду.

⁵⁹59 Ыйсаны өлүм жазасына тартуу үчүн, башкы ыйык кызмат кылуучулар жана синедриондогулардын баары жалган күбөлөндүрүү издешти.

⁶⁰60 Жалаа жабуучулар көп келгени менен, Ыйсага айып коё алышкан жок. Акырында эки адам келип, мындай деди:

⁶¹61 «Бул Адам: “Мен Кудайдын ийбадатканасын бузуп, аны кайра үч күндүн ичинде тургуза алам”, - деп айткан».

⁶²62 Ошондо башкы ыйык кызмат кылуучу ордунан туруп: «Эмне жооп бербейсиң? Булардын Сага каршы айткан айыптоолоруна эмне дейсиң?» - деди.

⁶³63 Ыйса үндөгөн жок. Ошондо башкы ыйык кызмат кылуучу Ага: «Тирүү Кудайдын алдында айт, Теңирдин Уулу Машайак Сенсиңби?» - деди.

⁶⁴64 Ыйса Ага: «Өзүң айтып турасың. Бирок Мен айтып коёюн, Адам Уулунун кудуреттүү Кудайдын оң жагында отурганын жана асмандагы булут үстүндө келе жатканын көрөсүңөр», - деди.

⁶⁵65 Ошондо башкы ыйык кызмат кылуучу өзүнүн кийимин айрып жиберип, мындай деди: «Бул Кудайга акарат келтирип жатат! Бизге дагы кандай күбөлөр керек? Мына, Анын Кудайга акарат келтиргенин азыр өзүңөр уктуңар!

⁶⁶66 Буга эмне дейсиңер?» Алар: «Өлүм жазасына татыктуу», - деп жооп беришти.

⁶⁷67 Ошондо Анын бетине түкүрүштү, сабашты. Кээ бирөөлөр жаакка чаап:

⁶⁸68 «Кана, пайгамбарчылык кылчы, Машайак, Сени ким урду?» - дешти.

⁶⁹69 Сыртта, короодо отурган Петирдин жанына бир күң келип: «Сен да галилеялык Ыйса менен чогуу жүрбөдүң беле», - деди.

⁷⁰70 Бирок Петир баарынын алдында: «Сенин эмнени айтып жатканыңды билбейм», - деп танып койду.

⁷¹71 Дарбазадан чыкканда, аны башка бир күң көрүп, ошол жерде тургандарга: «Бул да назареттик Ыйса менен чогуу жүргөн болчу», - деди.

⁷²72 Петир карганып: «Ал Адамды тааныбайм», - деп, дагы танып койду.

⁷³73 Бир аз убакыттан кийин, ошол жерде тургандар Петирге келип: «Чын эле, сен да ошолордон экенсиң. Сүйлөгөнүңөн эле билинип турат», - дешти.

⁷⁴74 Петир ого бетер карганып: «Ал Адамды тааныбайм», - деди. Ошол маалда короз кыйкырды.

⁷⁵75 Ыйсанын «Короз кыйкырганга чейин, сен Менден үч жолу баш тартасың» деген сөзү Петирдин эсине түштү. Ошондо ал сыртка чыгып, өксөп ыйлады.