Read Кыргыз тилиндеги Жаны Келишим (Луч Надежды) Матай 27 Bible Online

Матай 27 - Кыргыз тилиндеги Жаны Келишим (Луч Надежды) bible

Матай 27

¹1 Эртең менен бардык башкы ыйык кызмат кылуучулар менен аксакалдар чогулуп, Ыйсаны өлүм жазасына тартуу үчүн, кеңешме өткөрүштү.

²2 Алар Аны байлап алып, башкаруучу Понтий Пилатка алып барышты.

³3 Ыйсага чыккынчылык кылган Жүйүт Анын айыпталганын көргөндө өкүнүп, отуз күмүш тыйынды башкы ыйык кызмат кылуучулар менен аксакалдарга кайта алып келди да:

⁴4 «Күнөөсүз кандын төгүлүшүнө себепкер болуп, күнөө кетирдим», - деди. Алар: «Биздин ишибиз эмне! Өзүң бил», - деп коюшту.

⁵5 Жүйүт күмүш тыйындарды ийбадатканага ыргытып жиберип, ал жерден чыкты да, барып, асынып өлдү.

⁶6 Башкы ыйык кызмат кылуучулар тыйындарды жыйнап алып: «Бул - кандын наркы. Муну ийбадаткананын казынасына салууга болбойт», - дешти.

⁷7 Өз ара акылдашышты да, бөтөн жерликтердин сөөгүн коюу үчүн, ал тыйынга карапачынын жерин сатып алышты.

⁸8 Ошондон улам ал жер бүгүнкү күнгө чейин «Кандуу талаа» деп аталат.

⁹9 Ошондо Жеремия пайгамбардын «Алар ысрайылдыктардын Аны баалаган баасын - отуз күмүш тыйынды алып,

¹⁰10 Теңир мага айткандай, карапачынын жерин сатып алышты» деп айткан сөзү аткарылды.

¹¹11 Ыйса башкаруучунун алдында турду. Пилат Андан: «Сен жүйүттөрдүн Падышасысыңбы?» - деп сурады. «Өзүң айтып турасың», - деди Ыйса.

¹²12 Айыптап жаткан башкы ыйык кызмат кылуучулар менен аксакалдарга Ыйса такыр жооп берген жок.

¹³13 Ошондо Пилат Ага мындай деди: «Сага каршы кандай күбөлөндүрүүлөрдү айтып жатышканын угуп жатасыңбы?»

¹⁴14 Бирок Ыйса анын бир да сөзүнө жооп берген жок. Пилат буга аябай таң калды.

¹⁵15 Пасах майрамы сайын эл каалаган бир туткунду боштондукка чыгарууну башкаруучу адат кылып алган эле.

¹⁶16 Ошол учурда түрмөдө Барабба деген, атагы чыккан бир туткун бар болчу.

¹⁷17 Баары чогулганда, Пилат мындай деди: «Кимди бошотушумду каалайсыңар, Бараббаныбы же Машайак аталган Ыйсаныбы?»

¹⁸18 Анткени Аны көрө албастыктан улам кармап беришкенин Пилат билчү.

¹⁹19 Пилат сот тагында отурганда, аялынан «Ал адил Адамга тие көрбө, анткени мен түндө түшүмдө Ал үчүн аябай кыйналып чыктым» деген кабар келди.

²⁰20 Ошол учурда башкы ыйык кызмат кылуучулар менен аксакалдар: «Бараббаны сурагыла, Ыйса өлүм жазасына тартылсын», - деп, элди көндүрүп жатышты.

²¹21 Пилат алардан: «Экөөнүн кимисин бошотуп берүүмдү каалайсыңар?» - деп сурады. «Бараббаны», - дешти алар.

²²22 «Анда Машайак аталган Ыйсаны эмне кылайын?» деген Пилатка баары бир ооздон: «Ал айкаш жыгачка кадалсын!» - деп жооп беришти.

²³23 Башкаруучу: «Ал кандай жаман иш кылды эле?» - десе, алар: «Кадалсын!» - деп, ого бетер катуу кыйкырышты.

²⁴24 Эч нерсе жардам бербестигин, тескерисинче, ызы-чуу күчөп баратканын көргөн Пилат суу алып, элдин алдында колун жууду да, мындай деди: «Бул адил Адамдын каны үчүн Мен күнөөлүү эмесмин. Өзүңөр билгиле».

²⁵25 Элдин баары: «Анын каны биздин жана биздин балдарыбыздын мойнунда болсун», - деп жооп беришти.

²⁶26 Ошондо Пилат аларга Бараббаны бошотуп берди. Ыйсаны болсо камчы менен сабаткандан кийин, айкаш жыгачка кадатуу үчүн, аскерлердин колуна тапшырды.

²⁷27 Башкаруучунун аскерлери Ыйсаны падыша сарайына алып келишти да, бүт аскер бөлүгүн Анын тегерегине чогултушту.

²⁸28 Ыйсанын кийимин чечип алып, падышалар кийүүчү кочкул кызыл чапан кийгизишти.

²⁹29 Тикенектен таажы өрүп, башына кийгизип, оң колуна таяк карматышты да, алдына тизе бүгүп: «Салам, жүйүттөрдүн Падышасы!» - деп келекелешти.

³⁰30 Ага түкүрүштү, чыбык менен башка чапкылашты.

³¹31 Келекелешкенден кийин, Андан падышалар кийүүчү кочкул кызыл чапанды чечип алып, Өз кийимин кийгизишти. Анан Аны айкаш жыгачка кадоо үчүн алып жөнөштү.

³²32 Жолдо алар киренеялык Шымон деген адамды учуратып, Ыйсанын айкаш жыгачын мажбурлап көтөртүп коюшту.

³³33 Ошентип, алар Голгофа деген жерге келишти. Эврей тилиндеги бул сөз «Баш сөөгү» деп которулат.

³⁴34 Ага өт кошулган шарап беришти. Ал анын даамын татып көрүп, ичпей койду.

³⁵35 Аны айкаш жыгачка кадап коюшкандан кийин, кийимдери үчүн өкчөмө таш ыргытып, өз ара бөлүп алышты.

³⁶36 Андан кийин ошол жерге отуруп, Аны күзөтүштү.

³⁷37 Баш жагына «Бул - жүйүттөрдүн Падышасы Ыйса» деп жазылган, Анын айыбын көрсөткөн тактайчаны илип коюшту.

³⁸38 Ыйсанын жанына эки кылмышкер да айкаш жыгачка кадалды: бири Анын оң жагына, бири сол жагына.

³⁹39 Ал жерден өтүп бара жаткандар баштарын чайкап:

⁴⁰40 «Ии, ийбадаткананы бузуп, үч күндө Тургузуучу! Эгерде Кудайдын Уулу болсоң, куткар Өзүңдү! Түш айкаш жыгачтан!» - деп, тилдеп жатышты.

⁴¹41 Башкы ыйык кызмат кылуучулар да мыйзам окутуучулар жана аксакалдар менен бирге Аны мындай деп шылдыңдашты:

⁴²42 «Башкаларды куткарды, Өзүн болсо куткара албайт! Эгерде Ал Ысрайылдын Падышасы болсо, айкаш жыгачтан түшсүн, ошондо биз Ага ишенели.

⁴³43 Ал Кудайдан үмүттөнчү эмес беле. Эгерде Ал Кудайга жакса, Кудай Аны куткарып алсын. Анткени Ал: “Кудайдын Уулумун”, - дебеди беле».

⁴⁴44 Анын жанындагы айкаш жыгачтарга кадалган кылмышкерлер да Аны тилдеп жатышты.

⁴⁵45 Алтынчы сааттан тогузунчу саатка чейин бүт жерди караңгылык басып турду.

⁴⁶46 Тогузунчу саат чамасында Ыйса: «Эли, Эли, лама шабактани?» - деп, катуу кыйкырды. Бул «Кудайым ай, Кудайым ай! Мени эмнеге жалгыз калтырдың?» деп которулат.

⁴⁷47 Ал жерде тургандардын кээ бирөөлөрү муну укканда: «Ал Илиясты чакырып жатат», - дешти.

⁴⁸48 Алардын бири дароо жүгүрүп барып, соргуч алып келди. Аны ачуу ичимдикке малып, таяктын учуна илип, Ыйсанын оозуна жакындатты.

⁴⁹49 Кээ бирөөлөр болсо: «Коё тур, Илияс келип, Аны куткарар бекен, көрөлү», - деп жатышты.

⁵⁰50 Ыйса дагы бир ирет үнүн катуу чыгарып, жан берди.

⁵¹51 Ошол учурда ийбадаткананын көшөгөсү жогорудан ылдый айрылып, экиге бөлүнүп калды. Жер титиреп, аскалар жарылды.

⁵²52 Мүрзөлөр ачылып, ыйык маркумдар тирилишти.

⁵³53 Алар мүрзөлөрүнөн чыгып, Ыйса тирилгенден кийин, ыйык шаарга кирип, көп адамдарга көрүнүштү.

⁵⁴54 Жүз башы менен бирге Ыйсаны күзөткөн аскерлер жер титирөөнү, болуп жаткан окуяларды көрүшкөндө, үрөйлөрү учуп: «Бул чын эле Кудайдын Уулу болчу», - дешти.

⁵⁵55 Ал жерде Галилеядан бери Ыйсага кызмат кылып ээрчип келген аялдар да бар эле. Алар алыстан карап турушту.

⁵⁶56 Алардын арасында магдалалык Мариям, Жакып менен Жусуптун энеси Мариям жана Зебедей уулдарынын энеси бар болчу.

⁵⁷57 Кеч киргенде, ариматаялык Жусуп деген бир бай адам келди. Ал да Ыйсанын шакирттеринен эле.

⁵⁸58 Ал Пилатка келип, Ыйсанын сөөгүн сурады. Пилат сөөктү берүүнү буйруду.

⁵⁹59 Жусуп сөөктү алып, таза болотнай менен кепиндеди.

⁶⁰60 Анан ал аны асканын бооруна оюлган өзүнүн жаңы мүрзөсүнө алып барып койду. Мүрзөнүн оозун бир чоң ташты тоголотуп келип жапты да, кетип калды.

⁶¹61 Магдалалык Мариям менен дагы бир Мариям ошол жерде, мүрзөнүн маңдайында отурушкан.

⁶²62 Эртеси, ишемби күнү башкы ыйык кызмат кылуучулар менен фарисейлер Пилаттын алдына чогулуп, мындай дешти:

⁶³63 «Мырза! Жанагы алдамчынын тирүү кезинде: “Үч күндөн кийин тирилем”, - дегени эсибизге түшүп жатат.

⁶⁴64 Ошондуктан мүрзөнү үч күн кайтарууга буйрук бер. Шакирттери түн жамынып келип, сөөгүн уурдап кетип, элге: “Ал өлүп, кайра тирилди”, - деп айтышпасын. Ошондо бул акыркы калп мурункудан да жаман болот».

⁶⁵65 Пилат аларга: «Сакчыларды алгыла да, барып, каалаганыңардай кайтарып алгыла», - деп койду.

⁶⁶66 Алар барып, ташка мөөр басышты да, мүрзөнүн жанына сакчыларды коюшту.