Read Кыргыз тилиндеги Жаны Келишим (Луч Надежды) Матай 8 Bible Online

Матай 8 - Кыргыз тилиндеги Жаны Келишим (Луч Надежды) bible

Матай 8

¹1 Ыйса тоодон түшкөндө, көп эл Аны ээрчиди.

²2 Ошондо бир пес оорулуу Ага жакын келип, таазим кылды да: «Теңир! Эгерде кааласаң, мени таза кыла аласың», - деди.

³3 Ыйса ага колун тийгизип: «Каалайм, таза бол!» - деди. Ал ошол замат пес оорусунан айыгып, таза болуп калды.

⁴4 Анан Ыйса ага: «Эч кимге айтпагын! Баргын да, ыйык кызмат кылуучуга көрүнүп, Муса буйруган курмандыкты чал, бул аларга күбөлөндүрүү болсун», - деди.

⁵5 Ыйса Капернаум шаарына келгенде, бир жүз башы Ага жакын келип:

⁶6 «Теңир! Үйдө менин кулум катуу ооруп, кыйналып жатат», - деп, Андан жардам сурады.

⁷7 Ошондо Ыйса ага: «Мен барып, аны айыктырамын», - деди.

⁸8 Бирок жүз башы мындай деди: «Теңир! Үйүмө кирүүңө мен татыксызмын. Сен бир ооз сөз айтсаң эле, менин кулум айыгат.

⁹9 Анткени мен да бийлик астындагы адаммын, бирок менин кол астымда да аскерлер бар. Алардын бирине: “кет”, - десем, кетет; дагы бирине: “кел”, - десем, келет; кулума: “муну кыл”, - десем, кылат».

¹⁰10 Муну угуп таң калган Ыйса Өзүнүн артында келе жаткандарга мындай деди: «Мен силерге чындыкты айтып коёюн, Ысрайыл жеринен да мындай ишенимди таппадым.

¹¹11 Силерге айтып коёюн, чыгыш менен батыштан көптөр келип, Асман Падышачылыгында Ыбрайым, Ыскак жана Жакып менен бирге болушат.

¹²12 Ал эми Падышачылыктын уулдары сырттагы караңгылыкка ыргытылат. Ал жерде ый жана тиш кычыратуу болот».

¹³13 Анан Ыйса жүз башыга: «Бара бер, сен ишенгендей болсун», - деди. Кул ошол замат айыкты.

¹⁴14 Ыйса Петирдин үйүнө келип, анын кайын энеси ысытма оорусу менен ооруп жатканын көрдү.

¹⁵15 Ыйса Өзүнүн колун анын колуна тийгизери менен, ал ысытма оорусунан айыгып калды. Анан ал аял туруп, Ага кызмат кыла баштады.

¹⁶16 Кеч киргенде, Ыйсага жин оорусуна чалдыккан көп кишини алып келишти. Сөзү менен жиндерди кууп чыгарып, Ал бардык оорулууларды айыктырды.

¹⁷17 Бул Ышайа пайгамбар аркылуу айтылган төмөнкү сөздүн аткарылышы үчүн болду: «Ал биздин кеселдерибизди Өзүнө алып, ооруларыбызды көтөрдү».

¹⁸18 Ыйса Өзүнүн тегерегиндеги элди көргөндө, шакирттерине көлдүн наркы өйүзүнө сүзүп өтүүнү буйруду.

¹⁹19 Ошондо Ага бир мыйзам окутуучу келип: «Устат! Кайда барсаң да, мен Сенин артыңдан барам», - деди.

²⁰20 Ыйса ага: «Түлкүлөрдүн ийини бар, асмандагы канаттуулардын уясы бар. Ал эми Адам Уулунун баш калкалар жери жок», - деди.

²¹21 Шакирттердин бири Ага: «Теңир! Адегенде атамдын сөөгүн коюп келейин, мага уруксат бер», - деди.

²²22 Бирок Ыйса ага: «Менин артымдан ээрчи. Өлүктөр өлгөн адамдарын өздөрү коюп алышсын», - деди.

²³23 Ыйса кайыкка түшкөндө, шакирттери кошо түшүштү.

²⁴24 Күтүлбөгөн жерден көлдө чоң толкун башталды. Кайыкты толкун ура баштады. Ыйса болсо уктап жаткан эле.

²⁵25 Шакирттери Ага келип: «Теңир, бизди сактай көр, чөгүп баратабыз», - деп, Аны ойготушту.

²⁶26 Ошондо Ыйса аларга: «Эмне мынча корктуңар, ишеними аздар?!» - деди да, ордунан туруп, шамал менен көлгө тыюу салды. Ошондо улуу тынчтык орноду.

²⁷27 Адамдар: «Шамалды да, көлдү да баш ийдирген бул ким?» - деп таң калышты.

²⁸28 Ыйса көлдүн наркы өйүзүндөгү Гадара аймагына келгенде, Аны мүрзөлүк үңкүрлөрдүн ичинен жин оорулуу эки адам тосуп чыкты. Алар аябай жаалдуу болгондуктан, бул жолдон эч ким өтө алчу эмес.

²⁹29 Анан алар: «Кудайдын Уулу, бизде эмне ишиң бар? Сен бизди белгиленген убакыт келе электе эле кыйнаганы келдиңби?» - деп кыйкыра башташты.

³⁰30 Алардан анча алыс эмес жерде чочколор жайылып жүргөн эле.

³¹31 Жиндер Ыйсадан: «Эгерде Сен бизди кууп чыгара турган болсоң, анда бизди чочколорго жиберчи», - деп өтүнүштү.

³²32 Ыйса аларга: «Баргыла!» - деди. Алар бул адамдардын ичинен чыгып, чочколорго киришти. Ошондо чочколор тик жардан көлгө кулап, сууга чөгүп өлүштү.

³³33 Чочко кайтаруучулар болсо качып жөнөштү. Алар шаарга кирип, болгон окуяны айтып беришти, жин оорулуу адамдар жөнүндө да айтышты.

³⁴34 Ошондо шаардын бүт эли Ыйсаны утурлап чыкты. Аны көргөндө, алар Андан өздөрүнүн аймагынан чыгып кетүүсүн өтүнүштү.