Read Кыргыз тилиндеги Жаны Келишим (Луч Надежды) Марк 10 Bible Online

Марк 10 - Кыргыз тилиндеги Жаны Келишим (Луч Надежды) bible

Марк 10

¹1 Ыйса ал жерден чыгып, Иордан дарыясынын наркы өйүзүндөгү Жүйүт аймагына келди. Анын жанына кайрадан көп эл чогулду. Ал адатынча аларды окута баштады.

²2 Фарисейлер келип, Ыйсадан: «Эркекке аялын кетирүүгө болобу?» - деп сынап сурашты.

³3 Ыйса аларга жооп бере: «Муса силерге кандай осуят берди эле?» - деп сурады.

⁴4 Алар: «Муса эркектин талак кат жазып, аялын кетирүүсүнө уруксат берген», - дешти.

⁵5 Ошондо Ыйса аларга мындай деп жооп берди: «Силердин таш боордугуңардан улам, Муса силерге ушул осуятты жазып калтырган.

⁶6 Кудай дүйнөнү жарата баштаганда эле, адамдарды эркек, аял кылып жараткан.

⁷7 Ошондуктан адам ата-энесин таштап,

⁸8 аялы менен биригет. Экөө бир дене болот. Ошентип, алар экөө эмес, бир дене.

⁹9 Демек, Кудай кошконду адам ажыратпасын».

¹⁰10 Үйгө келишкенде, шакирттери Ыйсадан ушул жөнүндө дагы сурашты.

¹¹11 Ыйса аларга: «Аялын кетирип, башканы алган адам ойноштук кылган болот.

¹²12 Күйөөсүн таштап, башкага тийген аял да ойноштук кылган болот», - деди.

¹³13 Ыйса колун тийгизип койсун деп, кээ бирөөлөр Ага балдарын алып келишти. Бирок шакирттер аларга тоскоолдук кылышты.

¹⁴14 Муну көргөн Ыйса ачууланып, аларга мындай деди: «Балдардын Мага келүүсүнө жол бергиле. Аларга тоскоолдук кылбагыла, анткени Кудайдын Падышачылыгы ушундайлардыкы.

¹⁵15 Силерге чындыкты айтып коёюн, ким Кудайдын Падышачылыгын баладай кабыл албаса, ал ага кирбейт».

¹⁶16 Анан Ал балдарды кучактап, алардын үстүнө колун коюп, батасын берди.

¹⁷17 Ыйса жолго чыкканда, кимдир бирөө чуркап келип, Анын алдына тизелеп жыгылды да: «Жакшы Устат! Түбөлүк өмүргө ээ болуу үчүн, эмне кылышым керек?» - деп сурады.

¹⁸18 Ыйса ага: «Мени эмнеге жакшы дейсиң? Кудайдан башка эч ким жакшы эмес.

¹⁹19 “Ойноштук кылба. Киши өлтүрбө. Бирөөгө жалаа жаппа. Уурдаба. Таарынтпа. Ата-энеңди сыйла” деген осуяттарды билесиң», - деди.

²⁰20 Ал Ыйсага: «Устат, мен мунун бардыгын жаш чагымдан бери аткарып жүрөм», - деп жооп берди.

²¹21 Ыйса аны карап, жакшы көрө мындай деди: «Сага бир нерсе жетишпейт. Бар да, колуңда болгондун бардыгын сатып, жакырларга таратып бер, ошондо асманда казынаң болот. Анан кел да, айкаш жыгачыңды алып, Мени ээрчип жүр».

²²22 Ошондо ал бул сөзгө капа болуп, көңүлү чөккөн бойдон кетип калды, анткени анын мал-мүлкү көп эле.

²³23 Ыйса тегерегин карап, шакирттерине: «Байлардын Кудай Падышачылыгына кириши кандай кыйын!» - деди.

²⁴24 Шакирттер Анын сөздөрүнө аябай таң калышты. Бирок Ыйса кайрадан аларга: «Балдар, байлыгына ишенгендердин Кудай Падышачылыгына кириши кандай кыйын!

²⁵25 Бай адамдын Кудай Падышачылыгына кирүүсүнө караганда, ийненин көзүнөн төөнүн өтүүсү оңоюраак», - деди.

²⁶26 Алар аябай таң калышып, өздөрүнчө: «Анда ким куткарылат?» - дешти.

²⁷27 Ыйса аларды карап: «Адамдар муну кыла алышпайт, бирок Кудай кыла алат. Анткени Кудай бардыгын кыла алат», - деди.

²⁸28 Петир Ага: «Мына, биз баарын таштап, Сени ээрчип жүрөбүз», - деп айта баштады.

²⁹29 Ошондо Ыйса мындай деди: «Силерге чындыкты айтып коёюн, Мен үчүн жана Жакшы Кабар үчүн үй-жайын, же ага-инилерин, же эже-карындаштарын, же энесин, же атасын, же аялын, же балдарын, же жерин таштаган адам

³⁰30 азыр, бул дүйнөдө, куугунтук учурунда да жүз эсе көп үй-жайга, ага-иниге, эже-карындашка, ата-энеге, балдарга жана жерге, ал эми келечекте түбөлүк өмүргө ээ болбой койбойт.

³¹31 Биринчилердин көпчүлүгү акыркы, акыркылардын көпчүлүгү биринчи болот».

³²32 Алар Иерусалимди көздөй бара жатышты. Ыйса алардын алдында бара жатты. Анын артынан ээрчип бара жаткан шакирттердин үрөйлөрү учуп, коркуп жүрүп отурушту. Ыйса он эки шакиртин чакырып алып, аларга Өзүн эмне күтүп тургандыгы жөнүндө кайрадан мындай деп айта баштады:

³³33 «Мына, биз Иерусалимге жакындап калдык. Адам Уулун башкы ыйык кызмат кылуучулар менен мыйзам окутуучулардын колуна салып беришет, Ага өлүм жазасын өкүм кылып, бутпарастардын колуна өткөрүп беришет.

³⁴34 Аны кордошот, сабашат, бетине түкүрүшөт, анан Аны өлтүрүшөт. Бирок Ал үчүнчү күнү тирилет».

³⁵35 Ошондо Зебедейдин уулдары Жакып менен Жакан Ыйсага жакын келип: «Устат! Биздин суранычыбызды орундатышыңды каалайбыз», - дешти.

³⁶36 Ыйса аларга: «Эмне кылышымды каалайсыңар?» - деди.

³⁷37 Алар Ыйсага: «Өзүңдүн даңкыңа ээ болгонуңда, бирибизге оң жагыңа, бирибизге сол жагыңа отурууга уруксат бер», - дешти.

³⁸38 Бирок Ыйса аларга: «Эмне сурап жатканыңарды билбейсиңер. Мен иче турган чөйчөктөн иче аласыңарбы? Мен чөмүлдүрүлө турган чөмүлдүрүү менен чөмүлдүрүлө аласыңарбы?» - деди.

³⁹39 Алар: «Ошенте алабыз», - деп жооп беришти. Ыйса болсо аларга: «Мен иче турган чөйчөктөн ичесиңер, Мен чөмүлдүрүлө турган чөмүлдүрүү менен чөмүлдүрүлөсүңөр.

⁴⁰40 Бирок Менин оң жагым менен сол жагыма отургузуу Менин колумда эмес. Кимге даярдалган болсо, ошол отурат», - деди.

⁴¹41 Муну уккан он шакирт Жакып менен Жаканга ачуулана башташты.

⁴²42 Ыйса болсо шакирттерин чакырып, аларга: «Элге башчылар үстөмдүк кыларын, төрөлөр бийлик жүргүзөрүн билесиңер.

⁴³43 Бирок силердин араңарда мындай болбосун. Тескерисинче, араңарда ким чоң болгусу келсе, ал силерге кызматчы болсун.

⁴⁴44 Араңарда ким биринчи болгусу келсе, ал баарыңарга кул болсун.

⁴⁵45 Анткени Адам Уулу да Өзүнө кызмат кылдыруу үчүн эмес, тескерисинче, Өзү кызмат кылуу үчүн, Өз жанын берип, көптөрдү куткаруу үчүн келген», - деди.

⁴⁶46 Алар Жерихо шаарына келишти. Ыйса Жерихо шаарынан шакирттери жана көп эл менен чыгып бара жаткан. Ошол учурда Тимей уулу Бартымей деген сокур адам жол боюнда кайыр сурап отурган.

⁴⁷47 Назареттик Ыйса өтүп бара жатканын уккан ал: «Ыйса, Дөөттүн Уулу! Мага ырайым кыла көр!» - деп кыйкыра баштады.

⁴⁸48 Көптөр аны тыйып жатышты. Бирок ал: «Дөөттүн Уулу, мага ырайым кыла көр!» - деп, ого бетер катуу кыйкыра баштады.

⁴⁹49 Ыйса токтоп: «Аны чакыргыла», - деди. Ошондо сокур адамга: «Коркпо, ордуңдан тур, сени чакырып жатат», - дешти.

⁵⁰50 Ал сырткы кийимин чечип ыргытты да, ордунан туруп, Ыйсанын жанына келди.

⁵¹51 Ыйса андан: «Менин эмне кылышымды каалайсың?» - деп сурады. Сокур адам Ага: «Устат! Көзүм көрсө экен», - деди.

⁵²52 Ошондо Ыйса ага: «Бара бер, сени ишенимиң куткарды», - деди. Ошол замат анын көздөрү көрүп калды. Анан ал Ыйсанын артынан ээрчип жөнөдү.