Read Кыргыз тилиндеги Жаны Келишим (Луч Надежды) Марк 11 Bible Online

Марк 11 - Кыргыз тилиндеги Жаны Келишим (Луч Надежды) bible

Марк 11

¹1 Алар Иерусалимге жакындаганда, Зайтун тоосунун этегиндеги Бейтфагия жана Бетания кыштактарына жакындап калышканда, Ыйса эки шакиртин мындай деп жөнөттү:

²2 «Маңдайыңардагы кыштакка баргыла. Кыштакка кирериңер менен, эч бир адам мине элек, байланып турган кодикти көрөсүңөр. Аны чечип алып, бул жерге алып келгиле.

³3 Эгерде кимдир бирөө силерден: “Муну эмне кыласыңар?” - деп сураса, “Бул Теңирге керек”, - деп жооп бергиле. Ошондо ал кодикти дароо эле берет».

⁴4 Алар барып, көчөдө, дарбазанын жанында байланып турган кодикти таап, чечип алышты.

⁵5 Ошондо ал жерде тургандардын кээ бирөөлөрү аларга: «Эмне кылып жатасыңар? Силер кодикти эмне үчүн чечип алып жатасыңар?» - дешти.

⁶6 Шакирттер болсо Ыйса айткандай жооп беришти. Ошондо тигилер аларды коё беришти.

⁷7 Кодикти Ыйсага алып келип, анын үстүнө өздөрүнүн кийимдерин салып беришти. Ыйса кодикке минди.

⁸8 Ошондо элдин көпчүлүгү өздөрүнүн кийимдерин, айрымдар болсо дарактардын бутактарын кесип алып, жолго төшөп жатышты.

⁹9 Ыйсанын алды-артында бара жаткандар: «Дөөттүн Уулуна даңк! Теңирдин атынан Келе Жатканга алкыш!

¹⁰10 Атабыз Дөөттүн келе жаткан Падышачылыгы даңктуу болсун! Эң жогорудагыга даңк!» - деп, кыйкырып келе жатышты.

¹¹11 Ыйса Иерусалимге келип, ийбадатканага кирип, бардыгын карап чыкты. Күн кечтеп калгандыктан, он эки шакирти менен бирге Бетанияга жөнөп кетти.

¹²12 Эртеси күнү алар Бетаниядан чыгышканда, Ыйса ачка болду.

¹³13 Ал алыстан жалбырактуу анжыр дарагын көрүп, бир нерсе табылар бекен деп, жакын басып барды. Бирок анжыр дарагынын жанына келип, жалбырактан башка эч нерсе таба алган жок. Анткени анжыр мөмөсүн жыйнай турган убакыт келе элек эле.

¹⁴14 Ошондо Ыйса анжыр дарагына: «Мындан ары түбөлүккө сенден эч ким мөмө жебесин!» - деди. Муну шакирттери угушту.

¹⁵15 Анан Иерусалимге келишти. Ыйса ийбадатканага кирип, ал жердеги сатуучулар менен сатып алуучуларды кууп чыгара баштады. Акча алмаштыруучулар менен көгүчкөн саткандардын үстөлүн көңтөрүп салды.

¹⁶16 Ийбадаткана аркылуу бир нерсе алып өтүүгө эч кимге уруксат берген жок.

¹⁷17 Анан элге мындай деди: «Ыйык Жазууда: “Менин үйүм бүт элдердин сыйынуу үйү деп аталат”, - деп жазылган эмес беле? Силер болсо аны каракчылардын уюгуна айландырдыңар».

¹⁸18 Муну уккан мыйзам окутуучулар менен башкы ыйык кызмат кылуучулар Аны өлтүрүүнүн жолун издей башташты. Алар Андан коркушчу, анткени бүт эл Анын окутуусуна таң калар эле.

¹⁹19 Кеч киргенде, Ал шаардан чыгып кетти.

²⁰20 Эртең менен алар баягы анжыр дарагынын жанынан өтүп бара жатышып, дарактын тамырына чейин куурап калганын көрүштү.

²¹21 Ошондо Петир эстей калып, Ыйсага: «Устат, карачы! Сен каргаган анжыр жыгачы куурап калыптыр», - деди.

²²22 Ыйса аларга мындай деп жооп берди:

²³23 «Кудайга ишенгиле. Силерге чындыкты айтып коёюн, ким бул тоого: “Ордуңан көтөрүлүп, деңизге түш”, - десе жана ичинен шектенбей, айткан сөзү аткарыларына ишенсе, айтканындай болот.

²⁴24 Ошондуктан силерге айтып коёюн, Кудайдан эмнени сурасаңар да, аларыңарга ишенгиле, ошондо силерге берилет.

²⁵25 Кимдир бирөөгө каршы бир нерсеңер бар болсо, сыйынып жатканыңарда, аны кечирип койгула. Ошондо асмандагы Атаңар да силердин күнөөлөрүңөрдү кечирип коёт.

²⁶26 Эгерде кечирбесеңер, анда асмандагы Атаңар да силердин күнөөлөрүңөрдү кечирбейт».

²⁷27 Алар кайрадан Иерусалимге келишти. Ыйса ийбадатканада жүргөндө, башкы ыйык кызмат кылуучулар, мыйзам окутуучулар жана аксакалдар келип:

²⁸28 «Сен муну кайсы бийликтин негизинде кылып жатасың? Муну кылууга Сага ким бийлик берди?» - деп сурашты.

²⁹29 Ыйса аларга мындай деп жооп берди: «Мен да силерден бир нерсени сурайын, Мага жооп бергилечи. Ошондо Мен да силерге муну кайсы бийликтин негизинде кылып жатканымды айтам.

³⁰30 Жакандын чөмүлдүрүүсү Кудайдан беле же адамдардан беле? Мага жооп бергилечи».

³¹31 Алар болсо өз ара мындай деп талкуулашты: «Эгерде “Кудайдан”, - десек, анда Ал: “Анда эмне үчүн Жаканга ишенген жоксуңар?” - дейт».

³²32 «Адамдардан» деп айтуудан коркушту, анткени бүт баары Жаканды чын эле пайгамбар деп эсептешчү.

³³33 Алар Ыйсага: «Билбейбиз», - деп жооп беришти. Ошондо Ыйса аларга: «Муну кайсы бийликтин негизинде кылып жатканымды Мен да силерге айтпайм», - деди.