Read Кыргыз тилиндеги Жаны Келишим (Луч Надежды) Марк 14 Bible Online

Марк 14 - Кыргыз тилиндеги Жаны Келишим (Луч Надежды) bible

Марк 14

¹1 Пасах жана Ачыткысыз нан майрамына эки күн калган эле. Башкы ыйык кызмат кылуучулар менен мыйзам окутуучулар Ыйсаны куулук менен кармап алуунун, өлтүрүүнүн жолун издеп жатышты.

²2 Бирок алар: «Майрам күндөрү болбойт, болбосо эл арасында козголоң чыгып кетет», - деп сүйлөшүштү.

³3 Ыйса Бетанияда, пес оорулуу Шымондун үйүндө, дасторкондо отурганда, айнек идишке куюлган, кымбат баалуу, нарддан жасалган жыпар жыттуу, таза май алып, бир аял келди. Ал идиштин оозун сындырып, майды Ыйсанын башына куйду.

⁴4 Ошондо кээ бирөөлөр ачууланышып, өз ара: «Жыпар жыттуу майды мынча ысырап кылуунун эмне кереги бар эле?

⁵5 Аны үч жүздөн ашык динарийге сатып, жакырларга таратып берсе болмок да», - дешти. Ошентип, алар аялга нааразы болушту.

⁶6 Бирок Ыйса аларга мындай деди: «Аны жайына койгула, эмнеге аны оңтойсуздандырып жатасыңар? Ал Мен үчүн жакшы иш кылды.

⁷7 Анткени жакырлар ар дайым жаныңарда болот, аларга каалаган убагыңарда жакшылык кыла аласыңар. Мен болсо силер менен дайыма эле боло бербейм.

⁸8 Бул аял колунан келгенин кылды. Мени көргө коюуга даярдаш үчүн, алдын ала денемди майлады.

⁹9 Силерге чындыкты айтып коёюн, бул Жакшы Кабар дүйнөнүн кайсы гана жеринде таратылбасын, бул аял эске алынып, анын кылганы жөнүндө да айтылат».

¹⁰10 Он эки шакирттин бири Жүйүт Искариот Ыйсаны кармап берүү үчүн, башкы ыйык кызмат кылуучуларга барды.

¹¹11 Алар болсо муну укканда кубанышып, ага акча берүүнү убада кылышты. Ошондо Жүйүт Ыйсаны алардын колуна салып берүү үчүн, ыңгайлуу учурду издей баштады.

¹²12 Ачыткысыз нан майрамынын биринчи күнүндө, Пасах козусу союлганда, шакирттери Ыйсага: «Пасах тамагын кайсы жерде жегиң келет? Биз барып, даярдап берели», - дешти.

¹³13 Ошондо Ыйса эки шакиртин мындай деп жиберди: «Шаарга барсаңар, кумура менен суу көтөрүп бара жаткан адамга жолугасыңар. Анын артынан ээрчип,

¹⁴14 ал кайсы үйгө кирсе, ошол үйгө киргиле да, ошол үйдүн ээсине: Устат сенден: “Шакирттерим менен Пасах тамагын жей турган бөлмө кайсы?” - деп сурап жатат дегиле.

¹⁵15 Ошондо ал силерге төшөнчүлөр төшөлүп даярдалган, үстүнкү кабаттагы чоң бөлмөнү көрсөтөт».

¹⁶16 Анын шакирттери жолго чыгып, шаарга келишкенде, бардыгы Ыйса айткандай болуп чыкты. Ошентип, алар Пасах тамагын даярдашты.

¹⁷17 Кеч киргенде, Ыйса он эки шакирти менен келди.

¹⁸18 Дасторкондо тамак жеп отурушканда, Ыйса аларга: «Силерге чындыкты айтып коёюн, Мени менен бирге тамак ичип отурган араңардагы бирөө Мага чыккынчылык кылат», - деди.

¹⁹19 Алар бул сөзгө капа болушуп, биринин артынан бири: «Мен эмеспи?» - деп сурай башташты.

²⁰20 Ыйса аларга: «Ал - он экинин бири. Ал Мени менен бирге табактагы ашка нанын малып жатат.

²¹21 Дегинкиси, Адам Уулу жөнүндө Ыйык Жазууда кандай жазылса, ошондой аткарылып жатат. Бирок Адам Уулуна чыккынчылык кылган адамга кайгы! Ал адам төрөлбөй эле койсо жакшы болмок», - деп жооп берди.

²²22 Алар тамак жеп жатканда, Ыйса нанды алды да, Кудайга ыраазычылык билдирип сындырды. Анан шакирттерине берип: «Алгыла, жегиле, бул нан Менин Денем», - деди.

²³23 Чөйчөктү да алып, Кудайга ыраазычылык билдирди да, аларга берди. Бардыгы ошол чөйчөктөгүдөн ичишти.

²⁴24 Ошондо Ыйса аларга: «Бул - көптөр үчүн төгүлүп, жаңы келишимди беките турган Менин каным.

²⁵25 Силерге чындыкты айтып коёюн, Кудайдын Падышачылыгында жаңы шарап иче турган күн келгенге чейин, Мен мындан ары жүзүм ширесинен ичпейм», - деди.

²⁶26 Кудайды даңктап ырдашкандан кийин, алар Зайтун тоосуна жөнөштү.

²⁷27 Ошондо Ыйса аларга: «Ушул түнү баарыңар Менден шектенесиңер. Анткени Ыйык Жазууда: “Койчуну жок кылам, ошондо койлор туш-тушка чачырап кетет”, - деп жазылган.

²⁸28 Бирок Мен тирилгенден кийин, силерди Галилеядан тосуп алам», - деди.

²⁹29 Ошондо Петир Ыйсага: «Бардыгы шектенишсе да, мен шектенбейм», - деди.

³⁰30 Ыйса ага: «Сага чындыкты айтып коёюн, бүгүн, ушул түнү, короз эки жолу кыйкырганга чейин, сен Менден үч жолу баш тартасың», - деди.

³¹31 Бирок ал ого бетер күчөп: «Сени менен бирге өлүшүм керек болсо да, мен Сенден баш тартпайм», - деди. Ушундай сөздөрдү башка шакирттер да айтышты.

³²32 Алар Гетсемани деген жерге келишти. Ошондо Ыйса шакирттерине: «Мен сыйынып келгенче, силер бул жерде отуруп тургула», - деди да,

³³33 Петирди, Жакыпты, Жаканды ала кетти. Анын тынчы кетип, жаны кыйнала баштады.

³⁴34 Анан аларга: «Жаным аябай кейип турат. Бул жерде калгыла да, сергек болгула», - деди.

³⁵35 Өзү четкерээк барып, жүзтөмөндөп жыгылды да, мындай деп сыйына баштады: «Эгерде мүмкүн болсо, ушул саат Менден кыя өтүп кетсинчи».

³⁶36 Анан мындай деп сыйынды: «Ата! Сенин колуңдан келбеген нерсе жок. Бул чөйчөктү Менден кыя өткөрүп жиберчи. Бирок Мен каалагандай эмес, Сен каалагандай болсун».

³⁷37 Ал шакирттерине кайтып келгенде, алардын уктап жатканын көрүп, Петирге: «Шымон, уктап жатасыңбы? Бир саат сергек боло алган жоксуңбу?

³⁸38 Азгырылып кетпес үчүн, сергек болгула, сыйынгыла. Рух сергек, дене алсыз», - деди.

³⁹39 Анан дагы четкерээк барып, ошол эле сөздөрдү айтып сыйынды.

⁴⁰40 Ал кайтып келгенде, алардын кайрадан уктап калганын көрдү. Анткени аларды уйку басып жаткан эле. Алар Ыйсага эмне деп жооп беришерин билишкен жок.

⁴¹41 Үчүнчү жолу келгенде, Ыйса аларга: «Силер дагы эле уктап, эс алып жатасыңарбы? Бүттү, убакыт-сааты келди. Мына, Адам Уулу күнөөкөрлөрдүн колуна салынып берилет.

⁴²42 Тургула, кеттик. Мына, Мага чыккынчылык кылуучу жакындап калды», - деди.

⁴³43 Ыйса муну айтып бүтө электе эле, он экинин бири Жүйүт жана кылыч, союл көтөргөн бир топ адам келип калды. Аларды башкы ыйык кызмат кылуучулар, мыйзам окутуучулар жана аксакалдар жиберишкен эле.

⁴⁴44 Ыйсага чыккынчылык кылуучу аларга: «Мен кимди өпсөм, Ал - Ошол. Аны кармап, сактык менен алып кеткиле», - деген эле.

⁴⁵45 Жүйүт келери менен, Ыйсанын жанына барып: «Устат! Устат!» - деп, Аны өптү.

⁴⁶46 Ошондо алар Аны кармап алышты.

⁴⁷47 Ыйсанын жанында тургандардын бири кылычын сууруп чыгып, башкы ыйык кызмат кылуучунун кулунун бир кулагын шылый чапты.

⁴⁸48 Ыйса аларга: «Мени кармаш үчүн, каракчыны кармачудай болуп, кылыч, союл алып чыктыңарбы?

⁴⁹49 Күн сайын ийбадатканада элди окутуп, силер менен болгонумда, Мени кармаган жок элеңер. Бирок Кудай сөзү орундалууга тийиш», - деди.

⁵⁰50 Ошондо шакирттеринин баары Ыйсаны таштап, качып кетишти.

⁵¹51 Жылаңач денесине жабуу жамынган бир жаш жигит Ыйсанын артынан ээрчип бара жатты. Ал жигитти аскерлер кармап алышканда,

⁵²52 ал үстүндөгү жабуусун таштай салып, жылаңач бойдон качып кетти.

⁵³53 Ыйсаны башкы ыйык кызмат кылуучунун алдына алып келишти. Бардык ыйык кызмат кылуучулар, аксакалдар жана мыйзам окутуучулар Анын жанына чогулушту.

⁵⁴54 Петир Аны алыстан ээрчип, ыйык кызмат кылуучунун короосуна кирди. Ал жерде сакчылар менен бирге отуруп, отко жылынды.

⁵⁵55 Башкы ыйык кызмат кылуучулар менен синедриондогулардын баары Ыйсага өлүм жазасын өкүм кылуу үчүн, жалган күбөлөндүрүү издешти, бирок таба алышкан жок.

⁵⁶56 Анткени көп адамдар Ага каршы жалган күбөлөндүрүшсө да, ал күбөлөндүрүүлөр бири-бирине карама-каршы эле.

⁵⁷57 Кээ бирөөлөр орундарынан туруп, Ага каршы мындай деп жалган күбөлөндүрүштү:

⁵⁸58 «Биз Анын: “Кол менен салынган бул ийбадаткананы бузуп, үч күндүн ичинде кол менен салынбаган башка ийбадаткана тургузам”, - дегенин укканбыз».

⁵⁹59 Бирок алардын мындай күбөлөндүрүүлөрү да бири-бирине дал келген жок.

⁶⁰60 Ошондо башкы ыйык кызмат кылуучу ортого чыгып, Ыйсадан: «Сен эмне такыр жооп бербейсиң? Сага каршы булар эмне деп күбөлөндүрүп жатышат?» - деп сурады.

⁶¹61 Бирок Ыйса унчуккан жок, эч кандай жооп да берген жок. Ошондо башкы ыйык кызмат кылуучу Ыйсага дагы мындай суроо берди: «Даңктуу Кудайдын Уулу, Машайак Сенсиңби?»

⁶²62 «Менмин! Силер Адам Уулунун кудуреттүү Кудайдын оң жагында отурганын жана асмандагы булуттар үстүндө келе жатканын көрөсүңөр», - деп жооп берди Ыйса.

⁶³63 Ошондо башкы ыйык кызмат кылуучу өзүнүн кийимин айрып жиберип: «Бизге дагы кандай күбөлөр керек?

⁶⁴64 Кудайга акарат келтиргенин өзүңөр уктуңар. Силер буга эмне дейсиңер?» - деди. Алардын баары Ыйсаны өлүм жазасына татыктуу деп чечишти.

⁶⁵65 Кээ бирөөлөр Ага түкүрө башташты. Анын көзүн таңып коюп сабап: «Кана, пайгамбарчылык кылчы!» - дешти. Сакчылар да Аны жаакка чапкылашты.

⁶⁶66 Петир ылдыйкы короодо турганда, башкы ыйык кызмат кылуучунун күңдөрүнүн бири келди.

⁶⁷67 Ал отко жылынып отурган Петирди көрүп, тигиле карап: «Сен да назареттик Ыйса менен чогуу жүрбөдүң беле», - деди.

⁶⁸68 Бирок ал: «Сенин эмнени айтып жатканыңды билбейм, түшүнгөн да жокмун», - деп, танып койду. Анан ал сыртка, сырткы короого чыкты. Ошондо короз кыйкырды.

⁶⁹69 Петирди кайрадан көргөн күң өзүнүн жанында тургандарга: «Бул да ошолордон», - деп айта баштады.

⁷⁰70 Ал болсо дагы танып койду. Ошол жерде тургандар бир аздан кийин Петирге кайрадан: «Сен, чын эле, ошолордонсуң. Анткени сен галилеялыксың да», - дешти.

⁷¹71 Петир болсо аябай карганып: «Силер айтып жаткан Адамды мен тааныбайм», - деди.

⁷²72 Ошондо короз экинчи жолу кыйкырды. Петир Ыйсанын: «Короз эки жолу кыйкырганга чейин, сен Менден үч жолу баш тартасың», - деп айткан сөзүн эстеп, ыйлай баштады.