Read Кыргыз тилиндеги Жаны Келишим (Луч Надежды) Марк 15 Bible Online

Марк 15 - Кыргыз тилиндеги Жаны Келишим (Луч Надежды) bible

Марк 15

¹1 Таң атары менен, башкы ыйык кызмат кылуучулар, мыйзам окутуучулар, аксакалдар жана синедриондогулар кеңешме өткөрүштү да, Ыйсаны байлап, Пилатка алып барып тапшырышты.

²2 Пилат Ыйсадан: «Сен жүйүттөрдүн Падышасысыңбы?» - деп сурады. Ыйса болсо ага: «Өзүң айтып жатасың», - деп жооп берди.

³3 Башкы ыйык кызмат кылуучулар Ага каршы көп нерселерди айтып айыптап жатышты.

⁴4 Ошондо Пилат Андан: «Сен такыр жооп бербейсиңби?» - деп, дагы сурады. Анан: «Сага каршы айтылган айыптоонун көптүгүн карачы», - деди.

⁵5 Бирок Ыйса бул суроого да жооп берген жок. Пилат буга таң калды.

⁶6 Ал майрам сайын эл сураган бир туткунду бошотуп берчү.

⁷7 Ошол учурда Барабба деген киши көтөрүлүшчүлөр менен бирге камакта болчу. Алар козголоң убагында киши өлтүрүшкөн эле.

⁸8 Эл Пилаттан адаттагысындай эле бирөөнү бошотуп берүүсүн сурап, кыйкыра баштады.

⁹9 Пилат болсо аларга: «Каалайсыңарбы, мен силерге жүйүттөрдүн Падышасын бошотуп берейин?» - деди.

¹⁰10 Анткени ал башкы ыйык кызмат кылуучулардын Ыйсаны көрө албастыктан улам кармап беришкендигин билчү.

¹¹11 Бирок башкы ыйык кызмат кылуучулар: «Андан көрө Бараббаны бошотуп берүүсүн сурагыла», - деп, элди тукуруп коюшту.

¹²12 Пилат кайрадан аларга: «Жүйүттөрдүн Падышасы деп өзүңөр атаган Адамды эмне кылышымды каалайсыңар?» - деди.

¹³13 Алар: «Аны айкаш жыгачка када!» - деп кыйкырышты.

¹⁴14 Пилат алардан: «Ал кандай жаман иш кылды эле?» - деп сурады. Алар болсо: «Аны айкаш жыгачка када!» - деп, мурдагыдан да катуу кыйкырышты.

¹⁵15 Ошондо Пилат элге жагууну каалап, аларга Бараббаны бошотуп берди. Ал эми Ыйсаны камчы менен сабаткандан кийин, айкаш жыгачка кадатуу үчүн, аскерлердин колуна тапшырды.

¹⁶16 Аскерлер болсо Ыйсаны ак сарайдын короосуна, башкача айтканда, преторияга алып келишти да, бүт аскер бөлүгүн чогултушту.

¹⁷17 Ыйсанын үстүнө кочкул кызыл чапан жаап, башына тикенектен таажы өрүп кийгизишти.

¹⁸18 Анан: «Салам, жүйүттөрдүн Падышасы!» - деп, Аны менен саламдаша башташты.

¹⁹19 Алар Аны ичке чыбык менен башка чапкылашты, Ага түкүрүштү. Тизе бүгүп, Ага таазим кылышты.

²⁰20 Аны ушинтип шылдыңдашкандан кийин, Андан кочкул кызыл чапанды чечип алып, Өзүнүн кийимин кийгизишти. Анан Аны айкаш жыгачка кадоо үчүн алып жөнөштү.

²¹21 Алар талаадан келе жаткан Шымон деген киренеялык бир кишиге Ыйсанын айкаш жыгачын мажбурлап көтөртүп коюшту. Ал Искендер менен Руттун атасы эле.

²²22 Ошентип, алар Ыйсаны Голгофа (бул «Баш сөөгү» деп которулат) деген жерге алып келишти.

²³23 Ага смирна кошулган шарап беришти, бирок Ал ичкен жок.

²⁴24 Ыйсаны айкаш жыгачка кадагандар өкчөмө таш ыргытып, Анын кийимдерин бөлүп алышты.

²⁵25 Үчүнчү саат чамасында Аны айкаш жыгачка кадашты.

²⁶26 Анын баш жагына «Жүйүттөрдүн Падышасы» деген айыптоо жазылган тактайчаны илип коюшту.

²⁷27 Ыйсанын жанына эки кылмышкерди: бирин Анын оң жагына, бирин сол жагына айкаш жыгачка кадашты.

²⁸28 Ошентип, «Ал кылмышкер катары эсептелди» деген пайгамбарчылык орундалды.

²⁹29 Өтүп бара жаткандар баштарын чайкап, Ыйсаны мындай деп тилдеп жатышты: «Эй, ийбадаткананы бузуп, үч күндө Тургузуучу!

³⁰30 Айкаш жыгачтан түшүп, Өзүңдү куткарбайсыңбы!»

³¹31 Башкы ыйык кызмат кылуучулар менен мыйзам окутуучулар да шылдыңдашып, бири-бирине: «Башкаларды куткарды, Өзүн болсо куткара албайт!

³²32 Машайак, Ысрайылдын Падышасы, азыр айкаш жыгачтан түшсүн, биз көрүп, Ага ишенип калалы», - дешти. Анын жанындагы айкаш жыгачка кадалгандар да Аны тилдеп жатышты.

³³33 Алтынчы сааттан тогузунчу саатка чейин бүт жерди караңгылык басып турду.

³⁴34 Тогузунчу саатта Ыйса үнүн катуу чыгарып: «Элои! Элои! Ламма савахфани?» - деп кыйкырды. Бул «Кудайым ай, Кудайым ай! Мени эмнеге жалгыз калтырдың?» деп которулат.

³⁵35 Ал жерде тургандардын кээ бирөөлөрү муну укканда: «Ал Илиясты чакырып жатат», - дешти.

³⁶36 Ошондо бирөө жүгүрүп барып, соргучту ачуу ичимдикке малды да, аны ичке таякка илип, Ыйсага берди. Анан: «Токтогула, Илияс келип, Аны түшүрүп алар бекен, көрөлү», - деди.

³⁷37 Ыйса болсо катуу үн чыгарып, жан берди.

³⁸38 Ошондо ийбадатканадагы көшөгө жогорудан ылдый айрылып, экиге бөлүнүп калды.

³⁹39 Ыйсанын маңдайында турган жүз башы Анын ушундай катуу үн чыгарып жан бергенин көргөндө: «Бул Адам, чын эле, Кудайдын Уулу болчу», - деди.

⁴⁰40 Ал жерде алыстан карап турган аялдар да бар болчу. Алардын арасында магдалалык Мариям, кичинекей Жакып менен Жосенин энеси Мариям, Саломе бар эле.

⁴¹41 Ыйса Галилеяда жүргөндө, алар Анын артынан ээрчип, Ага кызмат кылышчу. Ал жерде Аны менен Иерусалимге келген башка да көптөгөн аялдар бар эле.

⁴²42 Кеч кирип, жума күнү аяктап, ишемби күнгө таяп калганда,

⁴³43 синедриондун бир кадырлуу мүчөсү, Кудайдын Падышачылыгын күтүп жүргөн ариматаялык Жусуп келди. Ал Пилатка кирүүгө батынып, Ыйсанын сөөгүн сурады.

⁴⁴44 Пилат Анын өлүп калганына таң калды. Анан ал жүз башыны чакырып: «Өлгөнүнө көп болдубу?» - деп сурады.

⁴⁵45 Жүз башыдан билгенден кийин, Жусупка сөөктү бердиртти.

⁴⁶46 Жусуп ак болотнай сатып алды да, Ыйсанын сөөгүн айкаш жыгачтан түшүрүп, кепиндеди. Анан ал сөөктү асканын бооруна оюлган мүрзөгө коюп, мүрзөнүн оозун таш тоголотуп келип жапты.

⁴⁷47 Магдалалык Мариям менен Жосенин энеси Мариям болсо Анын кайсы жерге коюлганын карап турушту.