Read Кыргыз тилиндеги Жаны Келишим (Луч Надежды) Марк 5 Bible Online

Марк 5 - Кыргыз тилиндеги Жаны Келишим (Луч Надежды) bible

Марк 5

¹1 Алар көлдүн наркы өйүзүндөгү Гадара аймагына келишти.

²2 Ыйса кайыктан түшөрү менен, Аны мүрзөлүк үңкүрлөр тараптан жин оорулуу бир адам тосуп чыкты.

³3 Ал мүрзөлүк үңкүрлөрдө жашачу, аны эч ким чынжыр менен да байлап коё алчу эмес.

⁴4 Анткени аны көп жолу кишендеп, чынжыр менен байлашкан, бирок ал чынжырларды үзүп, кишендерди талкалап салчу. Аны тыюуга эч кимдин күчү жетчү эмес.

⁵5 Ал дайыма, күндүр-түндүр тоолордо, үңкүрлөрдө кыйкырып жүрчү, өзүн өзү таш менен ургулачу.

⁶6 Ал Ыйсаны алыстан көрүп чуркап келди да, Ага таазим кылып:

⁷7 «Эй, Ыйса, бардыгынан жогору турган Кудайдын Уулу! Менде эмнең бар? Кудай үчүн суранам, мени кыйнай көрбө», - деп, катуу кыйкырды.

⁸8 Анткени Ыйса ага: «Жин, бул адамдын ичинен чыгып кет!» - деп айткан эле.

⁹9 Анан Ыйса андан: «Сенин атың ким?» - деп сурады. Ал: «Менин атым “Түмөн”, анткени биз көппүз», - деп жооп берди.

¹⁰10 «Бизди ушул өлкөдөн кууп чыгара көрбө», - деп, жиндер Ыйсадан аябай өтүнүштү.

¹¹11 Ошол жерде, тоонун боорунда чочколор жайылып жүргөн эле.

¹²12 Жиндердин баары Ыйсадан: «Бизди ушул чочколорго жибер, ошолордун ичине кирели», - деп өтүнүштү.

¹³13 Ыйса ошол замат аларга уруксат берди. Жиндер адамдын ичинен чыгып, чочколордун ичине кирди. Ошондо эки миңге жакын чочко көлдү карай бет алып, тик жардан кулап, сууга чөгүп өлдү.

¹⁴14 Чочко кайтаруучулар болсо качып жөнөштү. Алар шаарларга, айылдарга барып, бул окуя тууралуу жарыялашты. Эмне болгондугун көргөнү чыккан эл

¹⁵15 Ыйсанын жанына келип, баягы жин оорулуунун, ичинде түмөн жини бар адамдын кийим кийип, акыл-эсине келип отурганын көрүп, үрөйлөрү учту.

¹⁶16 Бул окуяны көргөндөр жин оорулуу адамга эмне болгондугу жөнүндө, чочколор жөнүндө элге айтып беришти.

¹⁷17 Ошондо эл Ыйсадан өздөрүнүн аймагынан чыгып кетүүсүн сурана баштады.

¹⁸18 Ыйса кайыкка түшкөндө, мурда жин оорусу бар адам Андан: «Сенин жаныңда жүрөйүнчү», - деп суранды.

¹⁹19 Бирок Ыйса ага уруксат берген жок. Ага: «Үйүңө, жакындарыңа бар, Теңир сага эмне кылганын, сага кандай ырайым көрсөткөнүн аларга айтып бер», - деди.

²⁰20 Ошондо ал барып, Ыйсанын эмне кылганын Декапол дубанында жарыялай баштады. Бардыгы таң калып жатышты.

²¹21 Ыйса кайрадан берки өйүзгө сүзүп келгенде, Анын жанына көп эл чогулуп калды. Ал көлдүн жээгинде турганда,

²²22 синагога башчыларынын бири, Жайыр деген киши келди. Ал Ыйсаны көргөндө, Анын бутуна жыгылып:

²³23 «Кызым өлүм алдында жатат. Барып, ага колуңду тийгиз, ал оорусунан айыгып, тирүү калсын», - деп жалынып-жалбарды.

²⁴24 Ыйса аны менен жөнөдү. Анын артынан ээрчип алган көп эл Аны туш-тарабынан кысып бара жатты.

²⁵25 Элдин арасында он эки жылдан бери кан агуудан азап чегип жүргөн бир аял бар эле.

²⁶26 Ал көп дарыгерлерге көрүнүп, колунда болгонун бүт түгөткөн, бирок оорусунан айыкпай, абалы начарлай берген.

²⁷27 Ыйса жөнүндө уккан бул аял көпчүлүктү аралап өтүп, Анын артынан келип, кийимине колун тийгизди.

²⁸28 Анткени ал: «Анын кийимине колумду тийгизсем эле айыгам», - деген эле.

²⁹29 Ошол замат анын кан агуусу токтоду. Аял өзүнүн оорудан айыкканын сезди.

³⁰30 Ошол эле учурда Ыйса Өзүнөн күч чыкканын сезип: «Менин кийимиме ким колун тийгизди?» - деп, элге кайрылды.

³¹31 Шакирттери Ага: «Топ эл Сени кысып турганын көрүп турасың да, анан “Мага ким колун тийгизди?” - дейсиң!» - дешти.

³²32 Бирок Ыйса муну ким кылганын көрүш үчүн, тегерегин карады.

³³33 Өзүнүн айыкканын билген ал аял коркконунан калтырап, Ыйсанын алдына келип жыгылды да, Ага болгон чындыкты айтып берди.

³⁴34 Ошондо Ыйса ага: «Кызым, сени ишенимиң куткарды. Тынчтык менен бара бер. Ооруңдан айык!» - деди.

³⁵35 Ыйса ушуну айтып жатканда, синагога башчысынын үйүнөн адамдар келишип: «Кызың өлүп калды. Эми Устатты убара кылбай эле кой», - дешти.

³⁶36 Ыйса бул сөздөрдү укканда, ошол замат синагога башчысына: «Коркпо, бирок ишен!» - деди.

³⁷37 Ыйса Петирди, Жакыпты жана анын бир тууганы Жаканды гана ээрчитип алып,

³⁸38 синагога башчысынын үйүнө барды. Ал жерден Ал ызы-чуу түшүп, буркурап-боздоп ыйлап жаткандарды көрдү.

³⁹39 Ичкери кирип, аларга: «Эмнеге ызы-чуу түшүп, ыйлап жатасыңар? Кыз өлбөй эле уктап жатат», - деди.

⁴⁰40 Алар болсо Ыйсаны шылдыңдап күлүштү. Ыйса баарын тышка чыгарып жиберди да, кыздын ата-энесин жана Өзү менен келгендерди ээрчитип, кыз жаткан бөлмөгө кирди.

⁴¹41 Ыйса кызды колунан алып, ага: «Талита куми!» - деди. Бул сөз «Кыз, сага айтып жатамын, тур!» деп которулат.

⁴²42 Кыз ошол замат ордунан туруп, баса баштады. Ал он эки жашта эле. Муну көргөндөр аябай таң калышты.

⁴³43 «Муну эч ким билбесин», - деп, Ыйса аларга катуу эскертти да, кызга тамак берүүнү буйруду.