Read Кыргыз тилиндеги Жаны Келишим (Луч Надежды) Марк 8 Bible Online

Марк 8 - Кыргыз тилиндеги Жаны Келишим (Луч Надежды) bible

Марк 8

¹1 Ошол күндөрдө Ыйсанын жанына дагы көп эл чогулду. Бирок алардын жээрге тамагы жок болчу. Ошондо Ыйса шакирттерин жанына чакырып: «Элге боорум ооруп жатат.

²2 Алар үч күндөн бери Менин жанымда жүрүшөт, жей турган эч нерселери жок.

³3 Эгерде аларды үйлөрүнө ачка коё берсем, жолдо алсырап калышат, анткени алардын кээ бири алыстан келишкен», - деди.

⁴4 Шакирттери Ага: «Бул ээн жерде алар тойгудай нанды кайдан тапмак элек?» - дешти.

⁵5 Ошондо Ыйса алардан: «Силерде канча нан бар?» - деп сурады. Алар: «Жети», - дешти.

⁶6 Ошондон кийин Ыйса элдин жерге отуруусун буйруду. Анан жети нанды алып, Кудайга ыраазычылык билдирип, нанды сындырды да, элге таратып бериш үчүн, шакирттерине берди. Шакирттер нанды элге таратып беришти.

⁷7 Аларда бир аз майда балык да бар эле. Ыйса Кудайга ыраазычылык билдиргенден кийин, балыктарды да таратып берүүнү буйруду.

⁸8 Бардыгы тоё жешти. Артып калган нанды чогултканда, жети себет болду.

⁹9 Тамактангандардын саны төрт миңге жакын эле. Андан кийин Ыйса элди таратты.

¹⁰10 Ошол замат Ал шакирттери менен кайыкка түшүп, Далманут аймагына сүзүп келди.

¹¹11 Фарисейлер чыгып, Ыйса менен талаша башташты. Аны сынаш үчүн, асмандан жышаан көрсөтүшүн талап кылышты.

¹²12 Ошондо Ал оор күрсүнүп: «Бул муун эмне үчүн жышаан талап кылып жатат? Силерге чындыкты айтып коёюн, бул муунга жышаан көрсөтүлбөйт», - деди.

¹³13 Анан Ыйса алардын жанынан кетти да, кайрадан кайыкка түшүп, наркы өйүзгө сүзүп кетти.

¹⁴14 Шакирттер нан алып алууну унутуп калышты. Кайыкта, алардын жанында бир эле нан бар болчу.

¹⁵15 Ошондо Ыйса аларга: «Байкагыла, фарисейлердин жана Ироддун ачыткысынан сак болгула», - деп эскертти.

¹⁶16 Шакирттер болсо өз ара: «Наныбыз жок болгон үчүн ушинтип айтып жатат», - деп сүйлөшүштү.

¹⁷17 Ыйса муну билип, аларга: «Силер эмне үчүн наныбыз жок деп жатасыңар? Дагы эле түшүнө элексиңерби? Дагы эле биле элексиңерби? Дагы эле жүрөгүңөр таш боюнчабы?

¹⁸18 Көзүңөр бар туруп, көрбөй жатасыңарбы? Кулагыңар бар туруп, укпай жатасыңарбы? Эмне, эсиңерде жокпу?

¹⁹19 Мен беш нанды беш миң адамга бөлүп бергенимден кийин, артып калган нанды чогултканыңарда, канча себет толду эле?» - деди. Алар Ага: «Он эки», - дешти.

²⁰20 «Ал эми жети нанды төрт миң адамга бөлүп бергенимден кийин, артып калган нанды чогултканыңарда, канча себет толду эле?» «Жети», - дешти.

²¹21 Ошондо Ыйса аларга: «Кантип түшүнбөйсүңөр?» - деди.

²²22 Алар Бетсайидага келишкенде, Ыйсанын алдына бир сокур кишини алып келишип: «Буга колуңду тийгизип кой», - деп өтүнүштү.

²³23 Ыйса сокурду колунан жетелеп, кыштактын сыртына чыгарды да, анын көзүнө түкүрүп, үстүнө колдорун коюп: «Бир нерсе көрүп жатасыңбы?» - деп сурады.

²⁴24 Ал айланасын карап: «Дарактарга окшогон, ары-бери өткөн кишилерди көрүп жатам», - деди.

²⁵25 Ошондон кийин Ыйса анын көздөрүнө кайрадан колдорун тийгизип, ага айланасын кароону буйруду. Сокур адам айыгып, бардыгын ачык көрө баштады.

²⁶26 Анан Ыйса ага: «Кыштакка кирбе. Муну эч кимге айтпа», - деп, аны үйүнө жөнөттү.

²⁷27 Ыйса шакирттери менен бирге Филиптин Кейсареясына тиешелүү айылдарга жөнөдү. Жолдо Ал шакирттеринен: «Эл Мени ким деп эсептейт?» - деп сурады.

²⁸28 Алар мындай деп жооп беришти: «Бирөөлөр “чөмүлдүрүүчү Жакан” деп, бирөөлөр “Илияс пайгамбар” деп, дагы бирөөлөр “мурунку пайгамбарлардын бири” деп эсептешет».

²⁹29 Ошондо Ыйса алардан: «Ал эми силер Мени ким деп эсептейсиңер?» - деп сурады. Петир Ага: «Сен Машайаксың», - деп жооп берди.

³⁰30 Ошондо Ыйса аларга Өзү жөнүндө эч кимге айтпоону эскертти.

³¹31 Анан Ыйса шакирттерине: «Адам Уулу көп азап чегиши, аксакалдар, ыйык кызмат кылуучулар, мыйзам окутуучулар тарабынан четке кагылышы, өлтүрүлүшү жана үчүнчү күнү тирилиши керек», - деп түшүндүрө баштады.

³²32 Ыйса бул жөнүндө аларга ачык эле айтты. Ошондо Петир Ыйсаны четке чакырып, Ага каршы болду.

³³33 Бирок Ыйса шакирттерине бурулуп, Петирге: «Кет жанымдан, шайтан! Анткени сенин ойлоруң - Кудайдын эмес, адамдын ойлору», - деп тыюу салды.

³⁴34 Ошондон кийин Ыйса эл менен бирге шакирттерин да жанына чакырып, мындай деди: «Ким Менин артымдан жүргүсү келсе, ал өзүнөн баш тартсын жана күн сайын өзүнүн айкаш жыгачын алып, Менин артымдан ээрчисин.

³⁵35 Ким өз жанын сактап калгысы келсе, ал андан түбөлүккө ажырайт. Ал эми ким Мен үчүн жана Жакшы Кабар үчүн өз жанынан ажыраса, ал аны сактап калат.

³⁶36 Анткени адам бүт дүйнөгө ээ болуп, бирок өз жанына зыян келтирсе, андан ага кандай пайда?

³⁷37 Же адам өз жанын куткарып алуу үчүн, кандай кун төлөй алат?

³⁸38 Бул бузулган, күнөөкөр муундун алдында ким Менден жана Менин сөздөрүмдөн уялса, Өзүнүн Атасынын даңкы менен, ыйык периштелер менен келгенде, Адам Уулу да ошол адамдан уялат».