Read Кыргыз тилиндеги Жаны Келишим (Луч Надежды) Лука 1 Bible Online

Лука 1 - Кыргыз тилиндеги Жаны Келишим (Луч Надежды) bible

Лука 1

¹1 Урматтуу Теопил! Биздин арабызда кеңири белгилүү болгон окуялар жөнүндө көптөгөн адамдар баяндап жаза башташты.

²2 Бизге ал окуяларды башынан бери өз көзү менен көргөндөр жана Кудайдын Сөзүн таратуучулар айтышкан эле.

³3 Ошондуктан бардыгын башынан баштап кылдаттык менен изилдеп чыкканымдан кийин, мен да сага ирети менен баяндап жазып жиберүүнү туура таптым.

⁴4 Бул аркылуу сен өзүң уккан сөздөрдүн чындык экендигин билип каласың.

⁵5 Жүйүт падышасы Ироддун убагында Абия тобунда Захария аттуу ыйык кызмат кылуучу болгон. Анын Арун уруусунан чыккан Элизабет деген аялы бар эле.

⁶6 Экөө тең Теңирдин осуяттары менен көрсөтмөлөрүн так аткарып, Кудай алдында адил жашашчу.

⁷7 Элизабет төрөбөс болгондуктан, алардын балдары жок болчу. Экөө тең карып калышкан эле.

⁸8 Бир күнү Захария өз кезеги боюнча Кудай алдында кызмат кылып жатканда,

⁹9 ыйык кызмат кылуучулардын салты боюнча өкчөмө таш ыргытылып, ага Теңирдин ийбадатканасына кирип жыпар жыттуу зат түтөтүү кызматы тийди.

¹⁰10 Жыпар жыттуу зат түтөтүлүп жаткан учурда, көп эл сыртта сыйынып турду.

¹¹11 Ошондо ага Теңирдин периштеси көрүндү. Периште жыпар жыттуу зат түтөтүлүүчү жайдын оң жагында турду.

¹²12 Захария аны көргөндө, селт эте түштү. Аны коркунуч басты.

¹³13 Периште болсо ага мындай деди: «Коркпо, Захария! Анткени сенин сыйынууң угулду. Аялың Элизабет сага уул төрөп берет, анын ысымын Жакан коёсуң.

¹⁴14 Сен кубанычка, шаттыкка бөлөнөсүң, анын төрөлгөнүнө көптөр сүйүнүшөт.

¹⁵15 Анткени ал Теңирдин алдында улуу адам болот. Шарап да, күчтүү ичкилик да ичпейт. Энесинин ичинде жатканда эле Ыйык Рухка толот.

¹⁶16 Ысрайыл уулдарынын көпчүлүгүн өздөрүнүн Кудай-Теңирине бурат.

¹⁷17 Аталарынын жүрөгүн балдарына, баш ийбегендерди адил адамдардын ойлонуу жолуна буруп, даярдалган элди Теңирге алып келүү үчүн, ал Илияс пайгамбардын руху жана күчү менен Анын алдында келет».

¹⁸18 Ошондо Захария периштеге: «Мен муну эмнеден улам билем? Анткени мен карып калдым, аялым да карыды», - деди.

¹⁹19 Периште ага мындай деп жооп берди: «Мен Кудай алдында туруучу Жебирейилмин, сени менен сүйлөшүү үчүн, сага ушул жакшы кабарды билдирүү үчүн жиберилгем.

²⁰20 Сен менин өз убагы келгенде орундала турган сөздөрүмө ишенбегендигиң үчүн, тилден калып, бул ишке ашкан күнгө чейин сүйлөбөйсүң».

²¹21 Ошол учурда Захарияны күтүп турган эл анын ийбадатканада кармалып жатканына таң калды.

²²22 Ал сыртка чыкканда, элге сүйлөй албай койду. Ошондо алар анын ийбадатканада көрүнүш көргөнүн түшүнүштү. Захария аларга жаңсап түшүндүрдү, анткени ал дудук болуп, сүйлөй албай калган эле.

²³23 Кызмат кыла турган күндөрү бүткөндөн кийин, ал үйүнө кайтты.

²⁴24 Ошол күндөрдөн кийин анын аялы Элизабеттин боюна бүтүп, беш ай бою жашырынып жүрдү.

²⁵25 «Мени элдин шылдыңынан куткарыш үчүн, Теңир ушул күндөрдө мага назарын салып, ушундай кылды», - деди ал.

²⁶26 Алтынчы айда Кудай Галилеянын Назарет деген шаарына,

²⁷27 Дөөт тукумунан чыккан Жусуп деген адам менен убадалашып койгон кызга Жебирейил периштени жиберди. Кыздын ысымы Мариям эле.

²⁸28 Периште ага келип: «Салам, Кудайдан ырайым тапкан кыз! Теңир сени менен! Аялдардын ичинен сен баталуусуң!» - деди.

²⁹29 Периштенин сөзүнө апкаарый түшкөн Мариям бул саламдашуу эмнени билдирет деп, ойлонуп калды.

³⁰30 Ошондо периште ага мындай деди: «Коркпо, Мариям! Анткени сен Кудайдан ырайым таптың.

³¹31 Боюңа бүтүп, Уул төрөйсүң, Анын ысымын Ыйса коёсуң.

³²32 Ал улуу болот жана Бардыгынан Жогору Тургандын Уулу деп аталат. Кудай-Теңир Ага атасы Дөөттүн тагын берет.

³³33 Ал Жакыптын тукумуна түбөлүккө падышачылык кылат, Анын падышачылыгынын чеги болбойт».

³⁴34 Мариям периштеден: «Эркек көрбөсөм, бул кандайча болот?» - деп сурады.

³⁵35 Периште ага мындай деп жооп берди: «Сенин үстүңө Ыйык Рух түшөт. Сени Бардыгынан Жогору Тургандын күчү каптайт. Ошондуктан төрөлө турган Ыйыкка Кудайдын Уулу деген ысым берилет.

³⁶36 “Төрөбөс” деп аталган тууганың Элизабет да карыганда кош бойлуу болду. Ал уул төрөйт, анын боюна бүткөнүнө алты ай болду.

³⁷37 Анткени Кудайдын бир да сөзү күчүн жоготпойт».

³⁸38 Ошондо Мариям: «Мен мына, мен Теңирдин кулумун. Мага сен айткандай болсун», - деди. Ошондон кийин периште анын жанынан кетти.

³⁹39 Ошол күндөрдүн биринде Мариям тоолуу Жүйүт өлкөсүнүн бир шаарына шашылыш түрдө жөнөдү.

⁴⁰40 Ал Захариянын үйүнө кирип, Элизабет менен саламдашты.

⁴¹41 Мариямдын саламын укканда, Элизабеттин ичиндеги баласы туйлап жиберди. Ошондо Элизабет Ыйык Рухка толуп,

⁴²42 үнүн бийик чыгарып, мындай деди: «Аялдардын ичинен сен баталуусуң, ичиңдеги бала да баталуу!

⁴³43 Теңиримдин энеси мага келгидей, мен киммин?

⁴⁴44 Анткени сенин саламыңды укканымда, ичимдеги бала кубанычтан туйлап жиберди.

⁴⁵45 Ишенгениң үчүн бактылуусуң, анткени Теңирдин сага айткан сөзү аткарылат».

⁴⁶46 Мариям мындай деди: «Менин жаным Теңирди даңктайт.

⁴⁷47 Куткаруучум Кудайды ойлоп, рухум кубанды.

⁴⁸48 Анткени Ал Өзүнүн кулунун момундугуна назарын салды. Анткени мындан ары бардык муундар мени “бактылуу” дешет.

⁴⁹49 Анткени Кудуреттүү мага улуу иш жасады. Анын ысымы ыйык.

⁵⁰50 Ал Өзүнөн корккондорго укумдан-тукумга ырайым кылат.

⁵¹51 Ал Өзүнүн колунун күчүн көрсөттү. Жүрөгүндөгү ойлору текеберлерди чачыратып жиберди.

⁵²52 Күчтүүлөрдү тактыларынан түшүрүп, момундарды көтөрдү.

⁵³53 Ачкаларга ырыскыны мол берди, байларды болсо куру кол коё берди.

⁵⁴54 Биздин ата-бабаларыбызга, Ыбрайымга жана анын тукумуна түбөлүккө ырайым кылууну убада кылганын эстеп, Өзүнүн кулу Ысрайылга жардамга келди».

⁵⁵55 -

⁵⁶56 Мариям Элизабеттин жанында үч айга жакын болуп, үйүнө кайтты.

⁵⁷57 Элизабеттин төрөр маалы келип, уул төрөдү.

⁵⁸58 Теңирдин ага улуу ырайым көрсөткөнүн уккан анын коңшулары менен туугандары аны менен бирге кубанышты.

⁵⁹59 Сегизинчи күнү баланы сүннөткө отургузууга келишти. Ага атасы Захариянын ысымын коймокчу болушту.

⁶⁰60 Бирок баланын энеси: «Жок, анын ысымын Жакан коёбуз», - деди.

⁶¹61 Ошондо алар ага: «Сенин урук-тукумуңда мындай аттуу эч ким жок да», - дешти.

⁶²62 Анан баланын атасынан кандай ат койгусу келерин жаңсап сурашты.

⁶³63 Ал тактайча талап кылып, «Анын ысымы - Жакан» деп жазды. Бардыгы таң калышты.

⁶⁴64 Ошол замат Захарияга тил кирип, Кудайды даңктай баштады.

⁶⁵65 Алардын тегерегинде жашагандардын бардыгын коркунуч басты. Бул жөнүндө тоолуу Жүйүт аймагынын бүт жерине сөз тарады.

⁶⁶66 Уккандардын бардыгы муну көкүрөгүнө түйүп: «Бул бала ким болор экен?» - дешти. Аны Кудай Өзү колдоп жүрдү.

⁶⁷67 Анын атасы Захария Ыйык Рухка толуп, мындай деп пайгамбарчылык кылды:

⁶⁸68 «Ысрайылдын Кудай-Теңирине алкыш! Анткени Ал Өз элине келип, аны кун төлөп куткарып алды.

⁶⁹69 Байыртадан бери Өзүнүн ыйык пайгамбарлары аркылуу айтып келгендей,

⁷⁰70 Өз кулу Дөөттүн тукумунан биз үчүн куткаруу мүйүзүн көтөрдү.

⁷¹71 Ал бизди душмандарыбыздан, бизди жек көргөндөрдүн колунан куткарды.

⁷²72 Биздин ата-бабаларыбызга ырайым кылып, Өзүнүн ыйык келишимин эстеди.

⁷³73 Өмүрүбүз өткөнчө Анын алдында, Ага ыйыктык жана адилеттүүлүк менен,

⁷⁴74 коркпостон кызмат кылышыбыз үчүн, Ал атабыз Ыбрайымга бизди душмандарыбыздын колунан куткарууну убада кылган.

⁷⁵75 -

⁷⁶76 Сен да, наристе, Бардыгынан Жогору Тургандын пайгамбары деп аталасың. Анткени сен Теңирге жол даярдаш үчүн,

⁷⁷77 Кудайдын улуу боорукердиги боюнча күнөөлөрү кечирилип, куткарыларын Анын элине түшүндүрүш үчүн, Анын алдында келесиң.

⁷⁸78 Ошол улуу боорукердик боюнча бизди тынчтыктын жолуна салуу үчүн,

⁷⁹79 караңгычылыкта жана өлүм көлөкөсү баскан өлкөдө жашагандарга жарык берүү үчүн, жогорудан бизге Жарык келди».

⁸⁰80 Бала болсо чоңоюп, күндөн күнгө руху бекемделип жатты. Ал өзүнүн Ысрайыл элине келгенге чейин ээн талаада жашады.