Read Кыргыз тилиндеги Жаны Келишим (Луч Надежды) Лука 2 Bible Online

Лука 2 - Кыргыз тилиндеги Жаны Келишим (Луч Надежды) bible

Лука 2

¹1 Ошол күндөрдө Рим императору Август «Бүт өлкөдө эл каттоо болсун» деген буйрук чыгарды.

²2 Бул Кибрений Сирияны башкарып турган убакта болгон биринчи эл каттоо эле.

³3 Ошондо каттоодон өтүш үчүн, ар ким өз шаарына барды.

⁴4 Жусуп да Галилеядагы Назарет шаарынан Жүйүт аймагына, Дөөттүн шаары Бейт-Лехемге жөнөдү. Анткени ал Дөөт падышанын тукумунан эле.

⁵5 Ал өзү менен убадалашып койгон кош бойлуу аялы Мариям менен бирге каттоодон өтмөкчү болду.

⁶6 Алар Бейт-Лехемге келишкенде, Мариямдын төрөр маалы келип,

⁷7 тун Уулун төрөдү. Аны ороп, сарайдагы акырга жаткырды, анткени мейманканада аларга орун жок болчу.

⁸8 Ошол жерде түнкүсүн талаада түнөп малын кайтарган койчулар бар эле.

⁹9 Күтүлбөгөн жерден аларга Теңирдин периштеси көрүнүп, Теңирдин даңкы жаркырады. Койчулар аябай коркуп кетишти.

¹⁰10 Периште аларга: «Коркпогула! Мен силерге бардык адамдарды сүйүнтө турган чоң кубанычты жарыялайм:

¹¹11 Бүгүн Дөөттүн шаарында силер үчүн Куткаруучу төрөлдү. Ал - Машайак Теңир.

¹²12 Силер аны бул белги боюнча билесиңер: жалаякка оролуп, акырда жаткан Наристени көрөсүңөр», - деди.

¹³13 Күтүлбөгөн жерден периште менен бирге асман аскерлеринин тобу көрүнүп:

¹⁴14 «Асмандагы Кудайга даңк! Жер үстүндө, Кудайга жаккан адамдар арасында тынчтык болсун», - деп, Кудайды даңкташты.

¹⁵15 Периштелер асманга көтөрүлүп кеткенден кийин, койчулар бири-бирине: «Жүргүлө, Бейт-Лехемге баралы да, ал жерде эмне болгонун, Теңирдин бизге эмне жөнүндө жарыялаганын көрөлү», - дешти.

¹⁶16 Алар шашылыш түрдө келишип, Мариям менен Жусупту, акырда жаткан Наристени көрүштү.

¹⁷17 Аларды көрүшкөндөн кийин, бул Наристе жөнүндө уккандарын айтып беришти.

¹⁸18 Ошондо угуп тургандардын бардыгы койчулардын сөздөрүнө таң калышты.

¹⁹19 Мариям болсо бул сөздөрдүн бардыгын көңүлүнө түйүп, эсине сактады.

²⁰20 Койчулар көргөндөрүнүн, уккандарынын баары периштенин айтканындай болгону үчүн Кудайды даңктап, мактап, кайра кайтышты.

²¹21 Сегиз күндөн кийин, Наристени сүннөткө отургузууга мезгил жеткенде, Анын ысымын Ыйса деп коюшту. Бул ысым Наристе бойго бүтө электе эле, периште тарабынан коюлган эле.

²²22 Мусанын мыйзамы боюнча алардын тазалануу убагы бүткөндөн кийин, алар Ыйсаны Теңирдин алдына алып баруу үчүн, Иерусалимге алып келишти.

²³23 Анткени Теңирдин мыйзамында: «Сүннөткө отургузулган ар бир тун эркек бала Теңирге арналсын», - деп жазылган.

²⁴24 Алар Теңирдин мыйзамы боюнча эки бактек же эки жаш көгүчкөндү курмандыкка чалуулары керек эле.

²⁵25 Ошол убакта Иерусалимде Шымыйон деген адам жашачу. Ал Ысрайыл элинин сооронор мезгилин күтүп жүргөн, Кудайдан корккон, Ыйык Рухтун жетеги менен жашаган адил адам эле.

²⁶26 Ага Ыйык Рух тарабынан: «Теңирдин Машайагын көрмөйүнчө, өлбөйсүң», - деп алдын ала айтылган эле.

²⁷27 Ал Ыйык Рухтун жетеги менен ийбадатканага келди. Мыйзамды аткаруу үчүн, ата-энеси Наристе Ыйсаны ийбадатканага алып келишкенде,

²⁸28 Шымыйон Аны колуна алып, Кудайды даңктап, мындай деди:

²⁹29 «Эгедер Теңирим, эми Өз сөзүң боюнча Өз кулуңду тынчтык менен коё бересиң.

³⁰30 Анткени мен Сенин бардык элдердин алдында даярдаган куткарууңду,

³¹31 бутпарастардын көзүн ача турган жарыкты,

³²32 Ысрайыл элиңдин даңкын көрдүм».

³³33 Наристе жөнүндө айтылган сөздөргө Жусуп да, Мариям да таң калды.

³⁴34 Анан Шымыйон аларга батасын берип, Наристенин энеси Мариямга: «Бул Наристе Ысрайыл жеринде көптөрдүн жыгылуусунун жана көптөрдүн жогору көтөрүлүүсүнүн, талаш-тартыштын себепкери болот. Көптөрдүн жүрөктөгү ойлору ачылат.

³⁵35 Ал эми сенин жүрөгүң тилингендей болот», - деди.

³⁶36 Ошол жерде Ашыр уруусунан чыккан Пануел кызы Анна деген карыган пайгамбар аял бар эле. Ал күйөөсү менен жети жыл гана жашаган.

³⁷37 Сексен төрт жаштагы бул жесир аял орозо кармап, сыйынып, Кудайга күнү-түнү кызмат кылып, ийбадатканадан кетчү эмес.

³⁸38 Ошол учурда ал да келип, Теңирди даңктап, Иерусалимдин эркиндикке чыгуусун күтүп жүргөндөрдүн бардыгына Ал жөнүндө айтып берди.

³⁹39 Алар Теңирдин мыйзамында көрсөтүлгөндүн бардыгын аткарышкандан кийин, Галилеядагы өздөрүнүн Назарет шаарына кайтып келишти.

⁴⁰40 Бала күчкө толуп, акыл кирип, чоңоё берди. Кудай Ага батасын берип жатты.

⁴¹41 Жыл сайын Ыйсанын ата-энеси Иерусалимге Пасах майрамына барышчу.

⁴²42 Ыйса он эки жашка чыкканда да, алар адаттагыдай эле Иерусалимге майрамга барышты.

⁴³43 Майрам күндөрү аяктап, үйлөрүнө кайтышканда, өспүрүм Ыйса Иерусалимде калып калды. Муну Жусуп да, Анын энеси да байкаган жок.

⁴⁴44 Аны башкалар менен келе жатат деп ойлошту. Бир күн жол жүрүшкөндөн кийин, алар Аны туугандарынын жана тааныштарынын арасынан издей башташты.

⁴⁵45 Таппай коюшкандан кийин, Аны издеп, кайра Иерусалимге келишти.

⁴⁶46 Үч күндөн кийин Аны ийбадатканадан, устаттардын ортосунда сөз угуп, суроо берип отурган жеринен табышты.

⁴⁷47 Угуп отургандардын бардыгы Анын акылына жана берген жоопторуна таң калышты.

⁴⁸48 Ата-энеси Аны көрүп, таң калды. Энеси Ага: «Балам, бул эмне кылганың? Атаң экөөбүз сарсанаа болуп, Сени издеп жүрөбүз», - деди.

⁴⁹49 Ыйса аларга: «Мени эмнеге издейсиңер? Атамдын үйүндө болушум керек экендигин билген эмес белеңер?» - деди.

⁵⁰50 Бирок алар айтылган сөздөрдүн маанисин түшүнүшкөн жок.

⁵¹51 Анан Ыйса ата-энеси менен Назаретке келди. Ал ата-энесине тил алчаак болду. Энеси болсо бул сөздөрдүн баарын көкүрөгүнө түйүп жүрдү.

⁵²52 Ыйса жетилип, акыл-эске толду. Ал Кудайдын да, адамдардын да сүймөнчүгү болду.