Read Кыргыз тилиндеги Жаны Келишим (Луч Надежды) Лука 23 Bible Online

Лука 23 - Кыргыз тилиндеги Жаны Келишим (Луч Надежды) bible

Лука 23

¹1 Чогулгандардын бардыгы орундарынан туруп, Ыйсаны Пилатка алып барышты да,

²2 мындай деп айыптай башташты: «Биз бул Адамдын элибизди бузуп жатканын көрдүк. Падышага салык төлөөгө тыюу салып, Өзүн “Машайак, Падышамын” деп жүрөт».

³3 Ошондо Пилат Ыйсадан: «Сен жүйүттөрдүн Падышасысыңбы?» - деп сурады. Ыйса ага: «Өзүң айтып жатасың», - деп жооп берди.

⁴4 Пилат башкы ыйык кызмат кылуучуларга, чогулган элге: «Мен бул Адамдан эч кандай күнөө тапкан жокмун», - деди.

⁵5 Бирок алар айткандарынан кайтышпай: «Бул Галилеядан баштап ушул жерге чейин, бүт Жүйүт аймагында Өзүнүн окутуусун таратып, элге дүрбөлөң түшүрүп жүрөт», - дешти.

⁶6 Пилат муну укканда: «Эмне, бул Адам галилеялыкпы?» - деп сурады.

⁷7 Ыйсанын Ирод башкарган аймактан экенин билгенде, Пилат Аны Иродго жөнөттү. Анткени ошол күндөрү Ирод Иерусалимде жүргөн эле.

⁸8 Ирод Ыйсаны көргөндө, аябай кубанып кетти, анткени Ал тууралуу көп уккандыктан, кандайдыр бир керемет көрүүгө үмүттөнүп, Аны көптөн бери көргүсү келип жүргөн.

⁹9 Ал Ыйсага көп суроо берди. Бирок Ыйса ага эч кандай жооп берген жок.

¹⁰10 Ал жерде турган башкы ыйык кызмат кылуучулар менен мыйзам окутуучулар Аны аябай айыпташты.

¹¹11 Ирод болсо өзүнүн аскерлери менен Аны кордоп, мазактады да, Ага жылтылдаган кийим кийгизип, кайра Пилатка жөнөтүп жиберди.

¹²12 Буга чейин бири-бири менен касташып жүргөн Ирод менен Пилат ушул күнү дос болуп калышты.

¹³13 Пилат болсо башкы ыйык кызмат кылуучуларды, башчыларды жана элди чакыртып алып, аларга мындай деди:

¹⁴14 «Силер бул Адамды мага элди бузуучу катары алып келгенсиңер. Бирок мен силердин алдыңарда тергөө жүргүзүп, Андан силер койгон айыптардын эч бирин тапкан жокмун.

¹⁵15 Мен Аны Иродго жибергем, бирок ал да Андан күнөө таппай, Аны кайра бизге жөнөтүп жибериптир. Демек, Ал өлүм жазасына татырлык эч бир күнөө жасаган эмес.

¹⁶16 Ошондуктан Аны жазалап туруп, коё берем».

¹⁷17 Пилат майрамга карата бир туткунду бошотуп бериши керек эле.

¹⁸18 Бирок чогулган элдин баары: «Ага өлүм! Бизге Бараббаны бошотуп бер!» - деп кыйкырышты.

¹⁹19 Барабба болсо шаарда болгон бир козголоңго катышып киши өлтүргөндүктөн, түрмөгө камалган эле.

²⁰20 Пилат кайрадан элге кайрылып, Ыйсаны бошоткусу келгенин айтты.

²¹21 Бирок алар: «Аны айкаш жыгачка када, айкаш жыгачка када!» - деп кыйкырышты.

²²22 Пилат үчүнчү жолу аларга: «Ал кандай жаман иш кылды? Мен Андан өлүм жазасына татырлык эч кандай күнөө тапкан жокмун. Ошондуктан Аны жазалап туруп, коё берем», - деди.

²³23 Бирок алар болгон үндөрү менен: «Аны айкаш жыгачка када!» - деп кыйкырып, талап кыла беришти. Алар улам күчөп кыйкыра беришкендиктен,

²⁴24 Пилат алардын талабын орундатууну чечти.

²⁵25 Ошентип, ал козголоңго катышып жана киши өлтүрүп түрмөдө жаткан кишини элдин суранычы боюнча бошотту, Ыйсаны болсо алардын эркине тапшырды.

²⁶26 Аскерлер Ыйсаны алып бара жатышканда, талаадан келе жаткан Шымон деген киренеялык кишини кармап алышты да, ага айкаш жыгачты көтөртүп, Ыйсанын артынан ээрчитип коюшту.

²⁷27 Ыйсанын артынан өтө көп эл ээрчип бара жатты. Алардын арасында Ал үчүн боздоп ыйлаган аялдар бар эле.

²⁸28 Ыйса аларга бурулуп, мындай деди: «Иерусалимдик кыздар, Мен үчүн ыйлабагыла, өзүңөр үчүн, балдарыңар үчүн ыйлагыла.

²⁹29 Анткени: “Тукумсуз, бала төрөбөгөн, эмчек эмизбеген аялдар бактылуу”, - деп айтыла турган күндөр келет.

³⁰30 Ошондо тоолорго: “Биздин үстүбүзгө кулагыла”, дөбөлөргө болсо: “Бизди басып калгыла”, - деп айта башташат.

³¹31 Жашыл даракка ушундай кылышса, анда куураган дарак эмне болот?»

³²32 Ыйса менен бирге эки кылмышкерди да өлтүргөнү алып бара жатышты.

³³33 Алар «Баш сөөгү» деген жерге келишкенде, Ыйсаны жана эки кылмышкерди айкаш жыгачка кадап коюшту. Бирин Анын оң жагына, бирин сол жагына кадашты.

³⁴34 Ыйса болсо: «Ата, буларды кечире көр! Анткени эмне кылып жатышканын билишпейт», - деди. Аскерлер өкчөмө таш ыргытып, Анын кийимдерин бөлүп алышты.

³⁵35 Эл ошол жерде карап турду. Башкаруучулар болсо: «Ал башкаларды куткарды. Эгерде Ал Кудай тандаган Машайак болсо, анда Өзүн куткарсын», - деп шылдыңдашты.

³⁶36 Аскерлер Ыйсанын жанына келип, Ага ачуу ичимдик сунуп:

³⁷37 «Эгерде Сен жүйүттөрдүн Падышасы болсоң, анда Өзүңдү куткар», - деп шылдыңдашты.

³⁸38 Ыйсанын баш жагына грек, латын жана эврей тилдеринде «Бул - жүйүттөрдүн Падышасы» деп жазылган тактайчаны илип коюшту.

³⁹39 Айкаш жыгачка кадалган эки кылмышкердин бири: «Эгерде Машайак болсоң, анда Өзүңдү да, бизди да куткар!» - деп, Ага тил тийгизди.

⁴⁰40 Экинчиси болсо аны тыйып: «Кудайдан коркпойсуңбу, өзүң деле ушул жазага тартылбадыңбы.

⁴¹41 Бизге го туура өкүм чыгарышты, анткени биз кылган иштерибизге жараша жазабызды алып жатабыз. Бул болсо эч кандай жаман иш жасаган жок да», - деди.

⁴²42 Анан ал Ыйсага: «Ыйса! Өзүңдүн Падышачылыгыңа барганда, мени эстей көр», - деди.

⁴³43 Ыйса ага: «Мен сага чындыкты айтып коёюн, бүгүн сен Мени менен бейиште болосуң», - деди.

⁴⁴44 Болжол менен түшкү алтынчы сааттан тогузунчу саатка чейин күн көрүнбөй, бүт жерди караңгылык каптап турду.

⁴⁵45 Ийбадатканадагы көшөгө дал ортосунан айрылып калды.

⁴⁶46 Ыйса үнүн катуу чыгарып: «Ата, жанымды Сенин колуңа тапшырамын!» - деди. Ушинтип айткандан кийин, Ал жан берди.

⁴⁷47 Муну көргөн жүз башы: «Бул чын эле адил Адам болчу», - деп, Кудайды даңктады.

⁴⁸48 Муну көрүүгө чогулган эл болгон окуяны көргөндөн кийин, өкүнүү менен тарай баштады.

⁴⁹49 Ыйсаны тааныгандардын бардыгы жана Аны Галилеядан ээрчип келген аялдар алыстан бул окуяны карап турушту.

⁵⁰50 Ал жерде жүйүттөрдүн Ариматая шаарынан ак ниет, адил, Кудайдын Падышачылыгын күтүп жүргөн Жусуп деген адам бар эле. Ал кеңештин мүчөсү болчу.

⁵¹51 Бирок ал кеңештин Ыйсаны өлтүрүү үчүн чыгарган чечимине жана кылган иштерине макул болгон эмес.

⁵²52 Ал Пилатка барып, Ыйсанын сөөгүн сурады.

⁵³53 Анан ал сөөктү түшүрүп алып, кепиндеди да, асканын бооруна оюлуп жасалган, али эч ким коюла элек мүрзөгө койду.

⁵⁴54 Жума күнү аяктап, ишемби күнгө таяп калган эле.

⁵⁵55 Ыйса менен Галилеядан келген аялдар да Жусупту ээрчип келишип, мүрзөнү жана Анын сөөгү кандай коюлганын көрүштү.

⁵⁶56 Анан алар шаарга кайтып барышып, жыпар жыттуу заттарды жана майлоочу майларды даярдашты. Мыйзамдын талабына ылайык алар ишемби күнү эс алышты.