Read Кыргыз тилиндеги Жаны Келишим (Луч Надежды) Лука 3 Bible Online

Лука 3 - Кыргыз тилиндеги Жаны Келишим (Луч Надежды) bible

Лука 3

¹1 Рим падышасы Тиберийдин падышачылыгынын он бешинчи жылы эле. Жүйүт аймагында Понтий Пилат, Галилеяда Ирод Антипас, Итурея жана Трахонит аймактарына Ироддун бир тууганы Филип, Абиленеяда Лусаний акимчилик кылып,

²2 Анас менен Кайапа башкы ыйык кызмат кылуучу болуп турганда, ээн талаада Захариянын уулу Жаканга Кудайдан сөз айтылды.

³3 Ошондон кийин Жакан Иордан дарыясынын боюндагы бүт аймактарды кыдырып, адамдардын күнөөлөрүнүн кечирилиши үчүн, тобо кылуу чөмүлдүрүүсүн жар сала баштады.

⁴4 Бул жөнүндө Ышайа пайгамбардын китебинде мындай деп жазылган: «Теңирге жол даярдагыла, Ал үчүн жолду түздөгүлө деп, ээн талаада жар салган адамдын үнү угулат.

⁵5 Ойдуңдун баары толтурулсун, тоолор менен дөңдөрдүн баары текшиленсин, ийри-буйру жерлер түздөлсүн, өңгүл-дөңгүл жолдор тегизделсин.

⁶6 Ошондо ар бир адам Кудайдын куткаруусун көрөт».

⁷7 Жакан сууга чөмүлдүрүлүү үчүн келген элге: «Жылан тукумдары! Келечек каардан качып кутулууну силерге ким үйрөттү?

⁸8 Тобо кылганыңарды иштериңер аркылуу көрсөткүлө! “Биздин атабыз - Ыбрайым”, - деп ойлобой эле койгула. Анткени силерге айтып коёюн, Кудай Ыбрайымга ушул таштардан да балдарды жаратып бере алат.

⁹9 Балта дарактардын тамырынын жанына коюлган. Демек, жакшы жемиш бербеген ар бир дарак кыйылып, отко ыргытылат», - деди.

¹⁰10 Ошондо эл Жакандан: «Анда эмне кылышыбыз керек?» - деп сурады.

¹¹11 Ал элге: «Кимдин эки кийими бар болсо, бирин кийими жокко берсин. Кимдин тамак-ашы болсо, ал да ушундай кылсын», - деп жооп берди.

¹²12 Салык жыйноочулар да сууга чөмүлдүрүлүү үчүн келип, андан: «Устат, биз эмне кылышыбыз керек?» - деп сурашты.

¹³13 Жакан аларга: «Силерге белгиленгенден ашык талап кылбагыла», - деп жооп берди.

¹⁴14 Аскерлер да андан: «Бизчи, биз эмне кылышыбыз керек?» - деп сурашты. Ошондо Жакан аларга: «Эч кимге кысым көрсөтпөгүлө, бирөөгө жалаа жаппагыла, өзүңөрдүн маянаңарга ыраазы болгула», - деп жооп берди.

¹⁵15 Куткаруучуну күтүп жүргөн эл Жакан жөнүндө: «Бул Машайак эмеспи?» - деп ойлошту.

¹⁶16 Жакан элдин бардыгына мындай деп жооп берди: «Мен силерди сууга чөмүлдүрөм, бирок менден Күчтүү келет, мен Анын бут кийиминин боосун чечүүгө да татыксызмын. Ал силерди Ыйык Рухка жана отко чөмүлдүрөт.

¹⁷17 Анын күрөгү Өз колунда, Ал Өзүнүн кырманын тазалап, буудайды кампасына жыйнайт, ал эми саманды өчпөс отко салат».

¹⁸18 Жакан элге дагы көп нерселер жөнүндө насаат айтып, Жакшы Кабарды жарыялап жүрдү.

¹⁹19 Ал башкаруучу Иродду ашкере кылды. Анткени Ирод өзүнүн бир тууганынын аялы Иродияны алып, дагы көптөгөн жаман иштерди жасаган эле.

²⁰20 Анысы аз келгенсип, ал Жаканды түрмөгө каматып койду.

²¹21 Бардык эл сууга чөмүлдүрүлүп жатканда, Ыйса да чөмүлдүрүлдү. Ал сыйынып жатканда, асман ачылып,

²²22 Ыйык Рух дене түрүндө, көгүчкөн сыяктуу Анын үстүнө түштү. Анан асмандан «Сен Менин сүйүктүү Уулумсуң. Мен Сага ыраазымын!» деген үн угулду.

²³23 Ыйса Өзүнүн кызматын баштаганда, отуз жаштын тегерегинде эле. Адамдардын ою боюнча Ал - Жусуптун, Эйлинин,

²⁴24 Мататтын, Лебинин, Мелхинин, Жанайдын, Жусуптун,

²⁵25 Мататиянын, Амостун, Накумдун, Эслинин, Нагайдын,

²⁶26 Мааттын, Мататиянын, Шемейдин, Жусуптун, Жүйүттүн,

²⁷27 Жаханандын, Ресанын, Зоробабылдын, Шалтиелдин, Неринин,

²⁸28 Мелхинин, Адынын, Косамдын, Элмадамдын, Эрдин,

²⁹29 Жосенин, Элиезердин, Жоримдин, Мататтын, Лебинин,

³⁰30 Шымыйондун, Жүйүттүн, Жусуптун, Жонамдын, Элийакимдин,

³¹31 Мелеянын, Менанын, Мататанын, Натандын, Дөөттүн,

³²32 Жышайдын, Обейттин, Бууздун, Салмондун, Нахшондун,

³³33 Аминадаптын, Рамдын, Хесрондун, Перестин, Жүйүттүн,

³⁴34 Жакыптын, Ыскактын, Ыбрайымдын, Терахтын, Нахордун,

³⁵35 Серуктун, Рейунун, Пелектин, Эйбердин, Шелахтын,

³⁶36 Кайнандын, Арпакшаттын, Шемдин, Нухтун, Лемектин,

³⁷37 Матушалдын, Энохтун, Жареттин, Маалалелдин, Кайнандын,

³⁸38 Эноштун, Шеттин, Адамдын, Кудайдын Уулу.