Read Кыргыз тилиндеги Жаны Келишим (Луч Надежды) Жакан 1 Bible Online

Жакан 1 - Кыргыз тилиндеги Жаны Келишим (Луч Надежды) bible

Жакан 1

¹1 Эң башында Сөз бар болгон, Сөз Кудайда болгон жана Сөз Кудай болгон.

²2 Сөз эң башында Кудайда болгон.

³3 Бардыгы Ал аркылуу башталган, эмне башталса да, Ансыз башталган эмес.

⁴4 Анда өмүр болгон, ал өмүр адамдар үчүн жарык болгон.

⁵5 Жарык караңгыда жаркырап турат, караңгылык жарыкты каптаган жок.

⁶6 Кудай жиберген бир адам болгон, анын ысымы Жакан эле.

⁷7 Ал күбөлөндүрүү үчүн келген. Баары ал аркылуу ишенип калыш үчүн, ал Жарык жөнүндө күбөлөндүрүү үчүн келген.

⁸8 Ал Жарык эмес болчу, бирок Жарык жөнүндө күбөлөндүрүү үчүн келген.

⁹9 Бул дүйнөгө келген ар бир адамды жарык кылуучу чыныгы Жарык бар эле.

¹⁰10 Ал бул дүйнөдө болгон, дүйнө Ал аркылуу жаралган, бирок бул дүйнө Аны тааныган жок.

¹¹11 Ал Өз элине келди, бирок Өз эли Аны кабыл алган жок.

¹²12 Ал эми Аны кабыл алып, Ага ишенгендерге Кудайдын балдары болуу бийлиги берилди.

¹³13 Алар кандан эмес, дененин каалоосу менен эмес, эркектин каалоосу менен эмес, Кудайдан төрөлүштү.

¹⁴14 Сөз адам болуп, биз менен жашап турду. Биз Анын даңкын, Атанын жалгыз Уулунун даңкын көрдүк. Ал ырайымдуулук менен акыйкатка толо эле.

¹⁵15 Жакан Ал жөнүндө бийик үн менен мындай деп күбөлөндүрдү: «“Менден кийин Келе Жаткан менин алдыма чыкты, анткени Ал менден мурун эле бар болчу”, - деп, мен ушул Адам жөнүндө айткам».

¹⁶16 Андагы толуктуктан бардыгыбыз ырайым үстүнө ырайым кабыл алдык.

¹⁷17 Анткени мыйзам Муса аркылуу берилди, ал эми ырайым менен чындык Ыйса Машайак аркылуу пайда болду.

¹⁸18 Кудайды эч ким эч качан көргөн эмес. Аны бизге Атанын ичиндеги жалгыз Уул көрсөттү.

¹⁹19 Жүйүттөр Иерусалимден ыйык кызмат кылуучулар менен лебилерди жиберип, «Сен кимсиң?» - деп суратышканда, Жакан аларга:

²⁰20 «Мен Машайак эмесмин», - деп күбөлөндүрдү. Ал жооп берүүдөн баш тарткан жок, ачык эле айтты.

²¹21 Ошондо алар: «Анда сен кимсиң, Илияссыңбы?» - деп сурашты. «Жок», - деди ал. «Пайгамбарсыңбы?» - деп сурашканда, ал: «Жок», - деп жооп берди.

²²22 «Деги сен кимсиң? Бизди жибергендерге жооп бергидей бололу: өзүң жөнүндө эмне дейсиң?» - дешти алар.

²³23 Ошондо Жакан мындай деди: «Ышайа пайгамбар: “"Теңирге жолду түздөгүлө", - деп, ээн талаада бир үн жар салат”, - деп айткан. Ошол үн менмин».

²⁴24 Жиберилген адамдар фарисейлерден эле.

²⁵25 Алар Жакандан: «Эгерде Сен Машайак да, Илияс да, пайгамбар да эмес болсоң, анда эмне үчүн сууга чөмүлдүрүп жатасың?» - деп сурашты.

²⁶26 Жакан аларга: «Мен сууга чөмүлдүрүп жатам. Бирок араңарда силер тааныбаган Бирөө турат.

²⁷27 Ал менден кийин келип, менин алдыма турду. Мен Анын бут кийиминин боосун чечүүгө да татыксызмын», - деп жооп берди.

²⁸28 Бул Иордан дарыясынын чыгыш тарабындагы Битабара айылында, Жакан сууга чөмүлдүрүп жаткан жерде болду.

²⁹29 Кийинки күнү Жакан өзүн көздөй келе жаткан Ыйсаны көрүп: «Бул - Кудайдын курмандык Козусу, Ал дүйнөнүн күнөөсүн Өз мойнуна алат.

³⁰30 “Менден кийин келген Адам менин алдыма турду, анткени Ал менден мурун эле бар болчу”, - деп, мен ушул Адам жөнүндө айткам.

³¹31 Мен Аны таанычу эмесмин. Бирок Ысрайыл эли Аны билип калсын деп, сууга чөмүлдүрүү үчүн келгем», - деди.

³²32 Жакан күбөлөндүрүүсүн мындай деп улантты: «Рухтун асмандан көгүчкөн сыяктуу түшүп, Анын үстүндө турганын көрдүм.

³³33 Мен Аны таанычу эмесмин. Бирок адамдарды сууга чөмүлдүртүү үчүн мени жиберген Кудай мага: “Рухтун кимдин үстүнө түшүп, Анда болуп турганын көрсөң, Ыйык Рухка чөмүлдүрүүчү Ошол”, - деген.

³⁴34 Мен көрдүм да: “Бул - Кудайдын Уулу”, - деп күбөлөндүрдүм».

³⁵35 Эртеси күнү да Жакан өзүнүн эки шакирти менен турган эле.

³⁶36 Ал өтүп бара жаткан Ыйсаны көргөндө: «Мына, Кудайдын курмандык Козусу!» - деди.

³⁷37 Жакандан бул сөздөрдү укканда, эки шакирт тең Ыйсаны ээрчип жөнөштү.

³⁸38 Ыйса артына бурулуп, алардын ээрчип келе жатканын көрүп: «Силерге эмне керек?» - деп сурады. Алар Андан: «Устат, кайсы жерде турасың?» - деп сурашты.

³⁹39 «Барып, өзүңөр көргүлө», - деди Ыйса. Алар барып, Ыйсанын кайсы жерде турарын көрүштү да, ал күнү Аныкында калып калышты. Бул убак онунчу саат чамасы эле.

⁴⁰40 Жакандан угуп, Ыйсанын артынан ээрчиген эки адамдын бири Шымон Петирдин бир тууганы Андрей эле.

⁴¹41 Ал адегенде агасы Шымонду таап, ага: «Биз Машайакты таптык», - деди.

⁴²42 Андрей бир тууганы Шымонду Ыйсага алып келди. Ыйса аны карап: «Жунус уулу Шымон, сага Кейфа деген ысым берилет», - деди.

⁴³43 Эртеси күнү Ыйса Галилеяга бармакчы болду. Филипти таап: «Менин артымдан ээрчи!» - деди.

⁴⁴44 Филип болсо Андрей менен Петир жашаган Бетсайида шаарынан эле.

⁴⁵45 Филип Натанаелди таап, ага: «Мусанын “Тоорат” китебинде, ошондой эле “Пайгамбарлар” китебинде жазылган Машайакты таптык, Ал - назареттик Жусуптун Уулу Ыйса», - деди.

⁴⁶46 Бирок Натанаел ага: «Назареттен жакшы нерсе чыкмак беле?» - деп койду. Ошондо Филип ага: «Барып, өзүң көр», - деди.

⁴⁷47 Ыйса келе жаткан Натанаелди көрүп: «Куулугу жок, накта ысрайылдык мына ушул», - деди.

⁴⁸48 Натанаел Андан: «Мени кайдан билесиң?» - деп сурады. Ыйса ага: «Филип сени чакыра электе эле, Мен сени анжыр дарагынын түбүндө отурганыңда көргөм», - деди.

⁴⁹49 Ошондо Натанаел: «Устат, Сен Кудайдын Уулусуң! Сен Ысрайыл элинин Падышасысың!» - деди.

⁵⁰50 Ыйса ага: «Сен Мага: “Мен сени анжыр дарагынын түбүндө отурганыңда көргөм”, - дегеним үчүн ишенип жатасың. Мындан чоңун көрөсүң», - деди.

⁵¹51 Дагы мындай деди: «Чындыкты, силерге чындыкты айтып коёюн, мындан ары ачылган асманды жана Адам Уулун көздөй жогору чыгып, кайра төмөн түшүп жаткан Кудайдын периштелерин көрөсүңөр».