Read Кыргыз тилиндеги Жаны Келишим (Луч Надежды) Жакан 11 Bible Online

Жакан 11 - Кыргыз тилиндеги Жаны Келишим (Луч Надежды) bible

Жакан 11

¹1 Эже-сиңди Мариям менен Марта жашаган Бетания деген айылда Лазар деген бир адам ооруп жатты.

²2 Ыйсаны жыпар жыттуу май менен майлаган, Анын бутун чачы менен аарчыган ушул Мариям болчу. Ооруп жаткан Лазар анын бир тууганы эле.

³3 «Теңир, жакшы көргөн адамың ооруп жатат», - деп, эже-сиңди Ыйсага айттырып жиберишти.

⁴4 Ыйса муну укканда: «Ал бул оорудан өлбөйт, бул - Кудайдын даңкталышы үчүн жол берилген оору. Бул аркылуу Кудай Уулу даңкталат», - деди.

⁵5 Ыйса Мартаны, анын сиңдисин жана Лазарды жакшы көрчү.

⁶6 Ал Лазардын ооруп жатканын укса да, жүргөн жеринде дагы эки күн болду.

⁷7 Андан кийин шакирттерине мындай деди: «Жүргүлө, Жүйүт аймагына кайра баралы».

⁸8 Шакирттери Ага: «Устат, жүйүттөр жакында эле Сени таш бараңга алып өлтүргөнү жатышпады беле? Анан кайра ошол жакка барганы жатасыңбы?» - дешти.

⁹9 Ыйса аларга: «Бир күндө он эки саат жарык болот эмеспи. Күндүз жүргөн адам мүдүрүлбөйт, анткени ал бул дүйнөнүн жарыгын көрүп турат.

¹⁰10 Ал эми түн ичинде жүргөн адам мүдүрүлөт, анткени анын ичинде жарык жок», - деп жооп берди.

¹¹11 Ыйса бул сөздөрдү айткандан кийин, аларга: «Досубуз Лазар уктап калды, бирок Мен барып, аны ойготом», - деди.

¹²12 Шакирттери Ага: «Теңир! Уктап жатса, анда айыгат», - дешти.

¹³13 Ыйса Лазардын өлүп калганы жөнүндө айткан эле, шакирттери болсо анын жөн эле уктап жатканы жөнүндө айтып жатат деп ойлошту.

¹⁴14 Ошондо Ыйса ачык эле мындай деди: «Лазар өлүп калды.

¹⁵15 Силер үчүн кубанып жатам. Силердин ишенип калышыңар үчүн, Менин ал жакта болбогонум жакшы болду. Жүргүлө, ага баралы».

¹⁶16 Ошондо Эгиз деген да ысымы бар Томас башка шакирттерге: «Жүргүлө, биз да аны менен бирге өлөлү», - деди.

¹⁷17 Ыйса келгенде, Лазардын көргө коюлганына төрт күн болгонун укту.

¹⁸18 Бетания менен Иерусалимдин ортосундагы аралык болжол менен он беш стадий болгондуктан,

¹⁹19 көптөгөн жүйүттөр Марта менен Мариямга көңүл айтууга келишкен эле.

²⁰20 Марта Ыйсанын келе жатканын укканда, алдынан тосуп чыкты. Мариям болсо үйдө калды.

²¹21 Марта Ыйсага: «Теңир! Сен бул жерде болгондо, бир тууганым өлмөк эмес.

²²22 Бирок мен азыр да билем, Сен Кудайдан эмне сурасаң да, Кудай Сага берет», - деди.

²³23 Ыйса ага: «Бир тууганың тирилет», - деди.

²⁴24 Марта Ага: «Акыркы күнү, өлгөндөр тириле турган күнү тирилерин билем», - деди.

²⁵25 Ыйса ага мындай деди: «Мен тирилүүмүн жана өмүрмүн. Мага ишенген адам өлсө да, тирилет.

²⁶26 Мага ишенип жашаган адам өлбөйт. Ушуга ишенесиңби?»

²⁷27 Марта Ага: «Ооба, Теңир. Дүйнөгө келе турган Кудай Уулу Машайак Сен экендигиңе ишенем», - деди.

²⁸28 Муну айткандан кийин, ал үйүнө барды да, сиңдиси Мариямды тымызын чакырып алып: «Устат бул жерде. Ал сени чакырып жатат», - деди.

²⁹29 Муну угары менен, Мариям шашылыш тура калып, Ыйсага жөнөдү.

³⁰30 Ыйса айылга кире элек болчу, Ал Марта менен жолуккан жерде эле.

³¹31 Мариямга көңүл айтканы келгендер анын үйдөн шашылыш чыгып кеткенин көрүшкөндө, «Бир тууганын жоктоп ыйлаш үчүн, мүрзөгө кетти го», - деп ойлоп, артынан кошо жөнөштү.

³²32 Мариям болсо Ыйса турган жерге келди да, Аны көргөндө, бутуна жыгылып: «Теңир, Сен бул жерде болгондо, бир тууганым өлмөк эмес», - деди.

³³33 Мариямдын жана аны менен келген жүйүттөрдүн ыйлаганын көргөн Ыйсанын каңырыгы түтөп, жүрөгү сыздады.

³⁴34 «Аны кайсы жерге койдуңар?» - деп сурады Ыйса. «Теңир, келип, Өзүң көр», - деп жооп беришти алар.

³⁵35 Ыйса көзүнө жаш алды.

³⁶36 Ошондо жүйүттөр: «Карагылачы, Лазарды Ал кандай жакшы көрчү!» - дешти.

³⁷37 Кээ бирөөлөр болсо: «Бул сокурдун көзүн ачпады беле, анан ушуну өлүмдөн алып кала алган жокпу?» - дешти.

³⁸38 Ыйса ичинен кайгырып, мүрзөгө басып келди. Ал оозу таш менен жабылган мүрзөлүк үңкүр эле.

³⁹39 «Ташты алып салгыла!» - деди Ыйса. Ошондо өлгөн Лазардын бир тууганы Марта Ага: «Теңир! Жыттанып кетти го, коюлганына төрт күн болуп калбадыбы», - деди.

⁴⁰40 Ошондо Ыйса ага: «Мен сага: “Эгерде ишенсең, Кудайдын даңкын көрөсүң”, - деп айткан жок белем?», - деди.

⁴¹41 Үңкүрдүн оозунан ташты алып салышкандан кийин, Ыйса асманды карап, мындай деди: «Ата, Мени уккандыгың үчүн, Сага ыраазымын.

⁴²42 Мени дайыма угарыңды билем. Бирок муну Мени Сен жибергениңе ушул жерде турган эл ишенсин деп айтып жатам».

⁴³43 Муну айткандан кийин, Ал бийик үн менен: «Лазар, чык!» - деди.

⁴⁴44 Ошондо колу-буту кепинделген Лазар мүрзөдөн чыгып келди. Анын бети-башы да оролуу эле. Ыйса аларга: «Анын кепинин чечкиле, бассын», - деди.

⁴⁵45 Мариямга келген жүйүттөрдүн көпчүлүгү Ыйсанын кылган ишин көрүшкөндө, Ага ишенип калышты.

⁴⁶46 Ал эми кээ бирөөлөрү фарисейлерге барып, Ыйсанын эмне кылганын айтып беришти.

⁴⁷47 Ошондо башкы ыйык кызмат кылуучулар менен фарисейлер жогорку кеңешти чакырып, мындай дешти: «Эмне кылсак? Бул Адам көптөгөн кереметтерди көрсөтүп жатат.

⁴⁸48 Эгерде Аны ушу бойдон тим койсок, баары Ага ишенип калат. Анан римдиктер келип, жерибизди да, элибизди да басып алышат».

⁴⁹49 Алардын бири, ошол жылга башкы ыйык кызмат кылуучу болуп шайланган Кайапа мындай деди: «Силер эч нерсени билбейсиңер.

⁵⁰50 Бүт эл жок болгондон көрө, эл үчүн бир адамдын өлгөнү силер үчүн жакшы болорун түшүнбөйсүңөр!»

⁵¹51 Муну ал оюнан чыгарып айткан жок: ошол жылы башкы ыйык кызмат кылуучу болгондуктан, Ыйсанын эл үчүн өлөрүн алдын ала айтты.

⁵²52 Ал бир улут үчүн гана эмес, Кудайдын чачырап кеткен балдарын чогултуу үчүн да өлүшү керек болчу.

⁵³53 Ошол күнү алар Ыйсаны өлтүрүү жөнүндө чечим чыгарышты.

⁵⁴54 Ошондон кийин Ыйса жүйүттөрдүн арасында ачык жүрбөй калды. Ал чөлгө жакын жердеги Эпрайым деген шаарга кетти. Ал жерде шакирттери менен болду.

⁵⁵55 Жүйүттөрдүн Пасах майрамы жакындап калгандыктан, өлкөнүн туш тарабынан көптөгөн адамдар майрам алдында тазалануу үчүн, Иерусалимге келишти.

⁵⁶56 Алар Ыйсаны издешти. Ийбадатканада туруп алышып: «Кандай деп ойлойсуңар, Ал майрамга келет болду бекен?» - деп, өз ара сүйлөшүп жатышты.

⁵⁷57 Башкы ыйык кызмат кылуучулар менен фарисейлер болсо Ыйсаны кармаш үчүн, «Ыйсанын кайда экенин ким билсе, кабарлап койсун!» деген буйрук беришти.