Read Кыргыз тилиндеги Жаны Келишим (Луч Надежды) Жакан 16 Bible Online

Жакан 16 - Кыргыз тилиндеги Жаны Келишим (Луч Надежды) bible

Жакан 16

¹1 Буларды Мен силерге азгырылып кетпешиңер үчүн айттым.

²2 Силерди синагогалардан кууп чыгарышат, атүгүл, силерди өлтүрүп жаткан адам: “Кудайга кызмат кылып жатам!” - деп ойлогон күндөр келет.

³3 Алар Атамды да, Мени да тааныбагандыктан, ушундай кылышат.

⁴4 Ошол күндөр келгенде, ушул айткандарымды эстешиңер үчүн, Мен буларды силерге алдын ала айттым. Бул жөнүндө мурун айтпаганымдын себеби: Мен силердин жаныңарда элем.

⁵5 Азыр болсо Мен Мени Жибергенге бара жатам. Бирок эч кимиңер Менден: “Кайда бара жатасың?” - деп сураган жоксуңар.

⁶6 Айткан сөздөрүмдөн улам жүрөгүңөр кайгыга толду.

⁷7 Бирок силерге чындыкты айтып коёюн, Менин кеткеним силер үчүн жакшы! Эгерде кетпесем, силерге Сооротуучу келбейт. Эгерде кетсем, Аны силерге жиберем.

⁸8 Ал келип, бул дүйнөнүн күнөөсүн ашкере кылат, адилдик жана келечектеги сот жөнүндө билдирет.

⁹9 Бул дүйнөнүн күнөөсү - Мага ишенбегендиги.

¹⁰10 Адилдик - Менин Атама бараткандыгым. Мындан ары силер Мени көрбөйсүңөр.

¹¹11 Ал эми сот - бул дүйнөнүн төрөсү шайтандын соттолгондугу.

¹²12 Силерге айта турган сөзүм көп, бирок азыр силер түшүнө албайсыңар.

¹³13 Чындык Руху келгенде, силерди чындыкка үйрөтөт. Ал Өз атынан сүйлөбөйт, эмнени укса, ошону айтат жана силерге келечекте эмне болорун билдирет.

¹⁴14 Ал Мени даңктайт, анткени Менден алганын силерге билдирет.

¹⁵15 Атамда эмне болсо, ошонун баары Меники, ошондуктан Мен: “Менден алганын силерге билдирет”, - деп айттым.

¹⁶16 Бир аз убакыттан кийин силер Мени көрбөй каласыңар, дагы бир аз убакыттан кийин кайра көрөсүңөр, анткени Мен Атама бара жатам».

¹⁷17 Ошондо Ыйсанын кээ бир шакирттери: «“Бир аз убакыттан кийин Мени көрбөй каласыңар, дагы бир аз убакыттан кийин кайра көрөсүңөр”, “Атама бара жатам”, - дегенин кандай түшүнсө болот?

¹⁸18 “Бир аз убакыттан кийин”, - дегени эмнеси? Эмне жөнүндө айтып жатканын түшүнгөн жокпуз», - дешти.

¹⁹19 Ыйса алардын эмне жөнүндө сурагылары келип жатканын билип, мындай деди: «“Бир аз убакыттан кийин Мени көрбөй каласыңар, дагы бир аз убакыттан кийин кайра көрөсүңөр”, - деп айтканым жөнүндө бири-бириңерден сурап жатасыңарбы?

²⁰20 Чындыкты, силерге чындыкты айтып коёюн, силер боздоп ыйлайсыңар, бул дүйнө болсо кубанат. Кайгырасыңар, бирок кайгыңар кубанычка айланат.

²¹21 Төрөр маалы келген аял толгоо тартып кыйналат. Төрөгөндөн кийин, дүйнөгө наристе келди деп, кубанганынан кыйналганын унутуп коёт.

²²22 Ошол сыяктуу эле силер да азыр кайгырып жатасыңар. Бирок Мен силерди кайра көрөм, ошондо жүрөгүңөр кубанычка толот жана ал кубанычты силерден эч ким тартып албайт.

²³23 Ошол күнү силер Менден эч нерсе сурабайсыңар. Чындыкты, силерге чындыкты айтып коёюн, Атамдан Менин ысымым урматына эмне сурасаңар да, Ал берет.

²⁴24 Буга чейин силер Менин ысымым урматына эч нерсе сураган жоксуңар. Кубанычыңар толук болуш үчүн сурагыла, аласыңар!

²⁵25 Ушул убакка чейин Мен силерге үлгү-насаат аңгемелер менен сүйлөдүм. Атам жөнүндө үлгү-насаат аңгемелер менен эмес, ачык айта турган убак келет.

²⁶26 Ошол күнү Атамдан Менин ысымым урматына сурайсыңар. Ошондо Мен силерге: “Атамдан силер үчүн өтүнүп сурайм”, - деп айтпайм.

²⁷27 Анткени Атам Өзү силерди сүйөт. Себеби силер Мени сүйөсүңөр жана Кудайдан келгениме ишендиңер.

²⁸28 Мен бул дүйнөгө Атамдан келдим. Азыр болсо бул дүйнөнү таштап, кайра Атама бара жатам».

²⁹29 Ошондо шакирттери: «Мына азыр үлгү-насаат аңгемесиз, ачык айттың.

³⁰30 Биз азыр Сенин баарын билериңди билдик. Сага суроо берүүнүн деле кереги жок экен, анткени Сен биз сурай электе эле эмнени сурарыбызды билесиң, ошондуктан Кудайдан келгендигиңе ишенебиз», - дешти.

³¹31 Ошондо Ыйса аларга мындай деп жооп берди: «Азыр ишенип жатасыңарбы?

³²32 Мына, ар кимиңер ар кайсы жакка чачырап кете турган убак келе жатат, атүгүл, келип да калды. Силер Мени жалгыз таштап кетесиңер. Бирок Мен жалгыз эмесмин, анткени Атам Мени менен.

³³33 Мен муну силерге Менин тынчтыгым силерде болсун деп айттым. Бул дүйнөдө азап тартасыңар, бирок кайраттуу болгула, анткени Мен бул дүйнөнү жеңдим».