Read Кыргыз тилиндеги Жаны Келишим (Луч Надежды) Жакан 2 Bible Online

Жакан 2 - Кыргыз тилиндеги Жаны Келишим (Луч Надежды) bible

Жакан 2

¹1 Эки күндөн кийин Галилеядагы Каана шаарында үйлөнүү тою болду. Ыйсанын энеси ошол жерде болчу.

²2 Ыйса да шакирттери менен бирге тойго чакырылды.

³3 Шарап жетпей калганда, энеси Ыйсага: «Шараптары түгөнүп калыптыр», - деди.

⁴4 Ыйса ага: «Сен экөөбүздүн ишибиз эмне, аял! Менин убагым али келе элек», - деди.

⁵5 Энеси кулдарга: «Ал силерге эмнени айтса, ошону кылгыла», - деди.

⁶6 Ошол жерде жүйүттөрдүн тазалануу расмисин аткарууга арналган, эки-үч ченем суу баткан алты таш идиш турган эле.

⁷7 Ыйса кулдарга: «Идиштерге суу толтургула», - деди. Кулдар идиштерге мелт-калт кылып суу толтурушту.

⁸8 Андан кийин аларга: «Эми сузуп алгыла да, той башкаруучуга алып баргыла», - деди. Алар алып барышты.

⁹9 Той башкаруучу шарапка айланган суудан татып көргөндөн кийин, (ал шараптын кайдан экенин билген жок, аны суу сузуп алган кулдар гана билишчү), күйөөнү чакырып:

¹⁰10 «Элдин баары адегенде шараптын жакшысын беришет, коноктор кызып калгандан кийин, начарын беришет. Сен болсо шараптын жакшысын ушул убакка чейин сактап коюптурсуң», - деди.

¹¹11 Ошентип, Ыйса Галилеядагы Каанада Өзүнүн эң алгачкы кереметин жасап, Өзүнүн даңкын көрсөттү. Ошондо шакирттери Ага ишенип калышты.

¹²12 Ошондон кийин Ыйса энеси, инилери жана шакирттери менен Капернаумга барып, ал жерде бир нече күн болду.

¹³13 Жүйүттөрдүн Пасах майрамы жакындаганда, Ыйса Иерусалимге келип,

¹⁴14 ийбадаткананын короосунда өгүз, кой, көгүчкөн саткандарды жана акча алмаштырып отургандарды көрдү.

¹⁵15 Аркандан камчы жасап алып, алардын баарын кой, өгүздөрү менен кошо ийбадаткананын короосунан кууп чыкты. Акча алмаштыруучулардын акчасын чачып, үстөлдөрүн көңтөрүп салды.

¹⁶16 Анан көгүчкөн саткандарга: «Буларыңарды бул жерден алып кеткиле! Атамдын үйүн базарга айландырбагыла!» - деди.

¹⁷17 Ошондо шакирттер Ыйык Жазуудагы «Сенин үйүңө болгон кызганыч Мени жеп жатат» деген сөздөрдү эстешти.

¹⁸18 Жүйүттөр Ыйсадан: «Ушундай кылууга укугуң бар экенин кандай жышаан менен көрсөтө аласың?» - деп сурашты.

¹⁹19 Ыйса аларга: «Бул ийбадаткананы бузгула, Мен аны үч күндүн ичинде кайра тургузам», - деп жооп берди.

²⁰20 Жүйүттөр буга: «Бул ийбадаткана кырк алты жылда курулуп бүткөн. Сен аны үч күндүн ичинде тургузуп коёсуңбу?» - дешти.

²¹21 Ыйса болсо «ийбадаткана» деп, Өзүнүн денеси жөнүндө айткан эле.

²²22 Ыйса өлүп, кайра тирилгенден кийин, шакирттери Анын ушул жөнүндө айтканын эстешип, Ыйык Жазууда жазылгандарга жана Анын сөзүнө ишеништи.

²³23 Көп адамдар Ыйсанын Иерусалимде, Пасах майрамында кылган кереметтерин көрүп, Ага ишенип калышты.

²⁴24 Алардын баарынын кандай экендигин билгендиктен, Ыйса Өзүн аларга ишенип тапшырган жок.

²⁵25 Адамдын жүрөгүндө эмне бар экендигин билгендиктен, Ал кимдир бирөөнүн адам жөнүндө күбөлөндүрүүсүнө муктаж эмес эле.