Read Кыргыз тилиндеги Жаны Келишим (Луч Надежды) Жакан 4 Bible Online

Жакан 4 - Кыргыз тилиндеги Жаны Келишим (Луч Надежды) bible

Жакан 4

¹1 Ыйса «Ал Жаканга караганда көбүрөөк шакирт күтүп, элди сууга чөмүлдүрүп жатат» деген сөз фарисейлерге жеткенин билгенде,

²2 (чынында, Ыйсанын Өзү эмес, шакирттери чөмүлдүрүп жатышкан эле),

³3 Жүйүт аймагынан кайра Галилеяга жөнөдү.

⁴4 Ыйса Самария аймагы аркылуу өтүүгө тийиш эле.

⁵5 Ошондуктан Ал Самариянын Шекем шаарына келди. Ал шаар Жакып өзүнүн уулу Жусупка мурас кылып калтырган жерге жакын жайгашкан эле.

⁶6 Ошол жерде «Жакыптын кудугу» деп аталган кудук бар болчу. Жол жүрүп чарчаган Ыйса кудуктун жанына отура кетти. Алтынчы саат чамасы эле.

⁷7 Ошол маалда самариялык бир аял кудуктан суу алганы келди. Ыйса андан ичкенге суу сурады.

⁸8 Шакирттери тамак сатып алуу үчүн, шаарга кетишкен эле.

⁹9 Самариялык аял Ага: «Өзүң жүйүт болуп туруп, менден, самариялык аялдан, суу сурайсыңбы?» - деди. Себеби жүйүттөр самариялыктар менен мамилелешчү эмес.

¹⁰10 Ыйса аялга: «Эгерде Кудайдын белеги эмне экендигин жана сенден суу сураган Ким экендигин билсең, сен Андан өзүң сурар элең, ошондо Ал сага тирүү суу бермек», - деп жооп берди.

¹¹11 Аял Ага: «Мырза, суу сузуп алгыдай эч нерсең жок экен, кудук болсо терең, Сенде тирүү суу кайдан болсун?

¹²12 Сен, эмне, бизге ушул кудукту калтырган атабыз Жакыптан да чоңсуңбу? Ал өзү да, балдары да, малы да ушул кудуктан суу ичишкен», - деди.

¹³13 Ыйса аялга мындай деп жооп берди: «Бул суудан ичкен адам кайра эле суусайт.

¹⁴14 Ал эми Мен берген суудан ичкен адам түбөлүк суусабайт. Мен бере турган суу анын ичинде түбөлүк өмүргө агып баруучу булакка айланат».

¹⁵15 Ошондо аял Ага: «Мырза, суусабашым үчүн, бул жерге сууга келбешим үчүн, мага ошол суудан берчи!» - деди.

¹⁶16 «Барып, күйөөңдү бул жерге чакырып кел», - деди Ыйса.

¹⁷17 «Менин күйөөм жок», - деп жооп берди аял. Ошондо Ыйса ага: «“Күйөөм жок”, - деп, чындыкты айттың.

¹⁸18 Сен беш жолу күйөөгө чыккансың, бирок азыркысы күйөөң эмес. Муну сен туура айттың», - деди.

¹⁹19 Аял Ага: «Мырза, Сенин пайгамбар экениңди билдим.

²⁰20 Биздин ата-бабаларыбыз мына бул тоодо Кудайга табынышчу экен, силер болсо Кудайга табынуучу жай Иерусалимде болуш керек дейсиңер», - деди.

²¹21 Ыйса ага мындай деди: «Мага ишен, бул тоонун үстүндө да, Иерусалимде да Атага табынбай турган убак келет.

²²22 Силер эмнеге табынып жүргөнүңөрдү билбейсиңер, биз болсо билебиз. Анткени куткарылуу жүйүттөрдөн келет.

²³23 Чыныгы табынуучулар Атага рух менен, чындык боюнча табына турган убакыт келет, ал тургай, келип да калды. Анткени Ата да Өзүнө ошондой табынуучуларды издейт.

²⁴24 Кудай - Рух. Ага табынуучулар да рух менен, чындык боюнча табынуулары керек».

²⁵25 Аял Ыйсага: «Машайак келерин билем. Ал келгенде, бизге баарын айтып берет», - деди.

²⁶26 Ошондо Ыйса ага: «Сен дал ошонун Өзү менен сүйлөшүп турасың», - деди.

²⁷27 Ошол мезгилде шакирттери келип калышты. Алар Анын аял менен сүйлөшүп жатканын көрүп таң калышты. Бирок эч кимиси Андан: «Андан эмнени сурап жатасың?» же «Аны менен эмне жөнүндө сүйлөшүп жатасың?» - деп сураган жок.

²⁸28 Аял суу алган идишин таштап, шаарга барды да, элге:

²⁹29 «Жүргүлө, кылганымдын баарын айтып берген Адамды көргүлө! Ал Машайак эмеспи?» - деп айта баштады.

³⁰30 Ошондо алар шаардан чыгып, Ыйсаны көздөй жөнөштү.

³¹31 Ошол арада шакирттери Ыйсадан: «Устат, тамактанып ал», - деп өтүнүштү.

³²32 Бирок Ыйса аларга: «Менде силер билбеген тамак бар», - деди.

³³33 Шакирттери бири-бирине: «Ага бирөө тамак алып келип бергенби?» - дешти.

³⁴34 Ыйса аларга мындай деди: «Менин тамагым - Мени жиберген Кудайдын каалоосун аткаруу жана Анын ишин бүтүрүү.

³⁵35 Силер: “Төрт айдан кийин орок маалы башталат”, - дейсиңер. Бирок Мен силерге айтып коёюн: талаага көз чаптырып, эгинди карагылачы, ал орууга даяр болуп бышып калды.

³⁶36 Орокчу азыртадан эле эмгек акысын алып, түбөлүк өмүр үчүн түшүм жыйнап жатат. Ошентип, себүүчү да, орокчу да кубанат.

³⁷37 Анткени ушул учурга “Бирөө себет, бирөө орот” деген сөз туура келет.

³⁸38 Мен силерди өзүңөр эмгектенбегенди орушуңар үчүн жибергем. Башкалар эмгектеништи, силер болсо түшүмүн жыйнап жатасыңар».

³⁹39 Ошол шаардагы самариялыктардын көпчүлүгү: «Ал мага кылганымдын баарын айтып берди», - деп күбөлөндүргөн аялдын сөзү аркылуу Ыйсага ишенип калышты.

⁴⁰40 Ошондуктан алар Ага келип, Андан өздөрү менен калуусун өтүнүштү. Ыйса ал жерде эки күн болду.

⁴¹41 Анын сөзүн угуп, Ага дагы көп киши ишенип калды.

⁴²42 Алар аялга: «Биз эми Ага сенин сөзүң боюнча эле ишенип жаткан жокпуз. Анткени Анын сөзүн өзүбүз да угуп, Анын, чын эле, дүйнөнүн Куткаруучусу, Машайак экенин билдик», - дешти.

⁴³43 Эки күндөн кийин Ыйса ал жерден Галилеяга жөнөп кетти.

⁴⁴44 Анткени Ыйса Өзү: «Пайгамбар өз жеринде урматталбайт», - деп күбөлөндүргөн эле.

⁴⁵45 Галилеяга келгенде, ал жердин тургундары Аны кабыл алышты. Анткени алар да Иерусалимде болгон майрамга барып, Анын майрамда кылган иштеринин баарын көрүшкөн болчу.

⁴⁶46 Ошентип, Ыйса Галилеядагы Каанага дагы келди. Ал жерде Ал сууну шарапка айландырган эле. Капернаумда падышанын сарай кызматчысынын уулу ооруп жаткан.

⁴⁷47 Ал Ыйсанын Жүйүт аймагынан Галилеяга келгенин угуп, Ага келди да: «Келип, өлүм алдында жаткан баламды айыктыра көр», - деп өтүндү.

⁴⁸48 Ыйса ага: «Силер Мага керемет-жышаандарды көрмөйүнчө ишенбейсиңер!» - деди.

⁴⁹49 Сарай кызматчысы Ага: «Теңир! Балам өлүп кала электе келе көр!» - деди.

⁵⁰50 Ошондо Ыйса ага: «Кете бер, балаң айыкты», - деди. Ал Ыйсанын айткан сөзүнө ишенип, үйүнө жөнөдү.

⁵¹51 Аны кулдары тосуп чыгышып: «Балаң айыгып калды», - дешти.

⁵²52 Ал кулдарынан баласынын кайсы убакта жакшы болуп калганын сурады. «Кечээ, жетинчи саат чамасында ысытмасынан айыкты», - деп жооп беришти алар.

⁵³53 Ошондо ал Ыйсанын: «Балаң айыкты», - деп, дал ошол убакта айтканын эстеди. Ал бүт үй-бүлөсү менен Ыйсага ишенип калды.

⁵⁴54 Бул Ыйсанын Жүйүт аймагынан Галилеяга келгенден кийин жасаган экинчи керемети эле.