Read Кыргыз тилиндеги Жаны Келишим (Луч Надежды) Жакан 7 Bible Online

Жакан 7 - Кыргыз тилиндеги Жаны Келишим (Луч Надежды) bible

Жакан 7

¹1 Андан кийин Ыйса Галилея аймагын аралап жүрдү. Ал Жүйүт аймагында жүргүсү келген жок, анткени жүйүттөр Аны өлтүрмөкчү болуп жатышкан эле.

²2 Жүйүттөрдүн «Алачык майрамы» жакындап калган.

³3 Ошондо бир туугандары Ыйсага: «Бул жерден чыгып, Жүйүт аймагына бар, кылып жаткан иштериңди шакирттериң да көрүшсүн.

⁴4 Анткени белгилүү болгусу келген адам иштерин жашырбайт. Ушундай иштерди кылып жаткандан кийин, Өзүңдү дүйнөгө көрсөт», - дешти.

⁵5 Анткени бир туугандары да Ага ишенишчү эмес.

⁶6 Ыйса аларга мындай деди: «Менин убагым келе элек. Ал эми силер үчүн бардык учурда боло берет.

⁷7 Бул дүйнө силерди жек көрө албайт, ал эми Мени жек көрөт. Анткени Мен анын иштеринин жаман экендигин күбөлөндүрүп жатам.

⁸8 Силер майрамга бара бергиле! Мен азырынча бул майрамга барбайм, анткени Менин убагым келе элек».

⁹9 Ал ушуну айтып, Галилеяда калып калды.

¹⁰10 Бир туугандары кеткенден кийин, Ыйса да майрамга жашыруун жөнөдү.

¹¹11 Жүйүттөр болсо: «Ал кайда?» - деп, майрам убагында Ыйсаны издей башташты.

¹²12 Элдин арасында Ал жөнүндө ар кандай сөз жүрүп жатты. Бирөөлөр Аны: «Жакшы», - десе, бирөөлөр: «Жок, Ал элди адаштырып жатат», - деп жатышты.

¹³13 Бирок жүйүттөрдөн коркушкандыктан, Ал тууралуу ачык айта алышкан жок.

¹⁴14 Майрамдын ортосунда Ыйса ийбадатканага келип, элди окута баштады.

¹⁵15 «Бул окубаса деле Ыйык Жазууну кайдан билет?» - деп, жүйүттөр таң калышты.

¹⁶16 Ыйса аларга мындай деп жооп берди: «Менин окутуум Меники эмес, Мени жиберген Кудайдыкы.

¹⁷17 Кудайдын каалоосун аткаргысы келген адам, бул окутуу Кудайданбы же Мен Өз атымдан сүйлөп жатамбы, билип алат.

¹⁸18 Өз атынан сүйлөгөн өзүнүн даңкталышын каалайт. Ал эми Ким Өзүн Жибергендин даңкталышын кааласа, Ал - чындык, Анда адилетсиздик жок.

¹⁹19 Муса силерге мыйзам берген, бирок бириңер да аны аткарбайсыңар. Мени эмне үчүн өлтүргөнү жатасыңар?»

²⁰20 Ошондо эл Ага: «Сенин ичиңде жин бар. Ким Сени өлтүрөм деп жатат?» - деди.

²¹21 Ыйса мындай деп сөзүн улантты: «Ишемби күнү оорулууну айыктырганыма баарыңар таң калып жатасыңар.

²²22 Муса силерге сүннөткө отургузуу мыйзамын берген. (Чынында, бул мыйзам Мусадан мурун эле бар болчу, ал ата-бабалардан калган. ) Силер болсо ишемби күнү сүннөткө отургузуп жатасыңар.

²³23 Мусанын мыйзамын бузбайлы деп, ишемби күнү деле сүннөткө отургузуп жатпайсыңарбы. Анан ишемби күнү бир адамды толук айыктырып койгондугум үчүн, Мага эмнеге ачууланып жатасыңар?

²⁴24 Сырткы көрүнүшү боюнча соттобогула, сотуңар адил болсун».

²⁵25 Ошондо иерусалимдиктердин кээ бирөөлөрү мындай дешти: «Өлтүрөбүз деп издеп жатышканы Ушул эмеспи?

²⁶26 Карасаңар, Ал ачык эле айтып жатат, бирок Ага эч ким эч нерсе деген жок! Же башчылар да Аны Машайак деп, ынанып калышканбы?

²⁷27 Бирок биз Анын кайсы жерден экенин билебиз. Ал эми Машайак келгенде, Анын кайсы жерден экенин эч ким билбейт».

²⁸28 Ошондо ийбадатканада элди окутуп жаткан Ыйса үнүн катуу чыгарып, мындай деди: «Ооба, силер Мени билесиңер, Менин кайсы жерден экенимди да билесиңер. Бирок Мен Өз атымдан келген жокмун. Мени жиберген Кудай - чындык, силер Аны билбейсиңер.

²⁹29 Мен Аны билемин, анткени Мен Анданмын, Мени Ал жиберген».

³⁰30 Ошондо Ыйсаны кармоого аракеттеништи. Бирок Ага эч кимиси кол көтөргөн жок, анткени Анын убагы келе элек болчу.

³¹31 Бирок элдин көбү: «Машайак келгенде, эмне, Бул көрсөткөн кереметтерден да көп керемет көрсөтөбү?» - деп, Ыйсага ишенип калышты.

³²32 Эл арасында Ал жөнүндө айтылып жаткан ушундай сөздөр фарисейлерге жетти. Ошондо ыйык кызмат кылуучулар менен фарисейлер Ыйсаны кармап келүүгө кызматчыларын жиберишти.

³³33 Ыйса болсо аларга мындай деди: «Дагы бир аз убакыт араңарда болом, андан кийин Мени Жибергенге барам.

³⁴34 Мени издейсиңер, бирок таппайсыңар. Мен болгон жерге силер келе албайсыңар».

³⁵35 Ошондо жүйүттөр өз ара мындай деп сүйлөшө башташты: «Биз таба албагыдай, Ал кайда барат? Эллиндердин өлкөсүнө чачырап кеткен жүйүттөргө барып, эллиндерди окутабы?

³⁶36 “Мени издейсиңер, бирок таппайсыңар”, “Мен болгон жерге силер келе албайсыңар”, - дегени эмнеси?»

³⁷37 Майрамдын акыркы - эң улуу күнү Ыйса эл алдында туруп, бийик үн менен мындай деди: «Ким суусаса, Мага келсин жана ичсин.

³⁸38 Ыйык Жазууда айтылгандай, Мага ишенген адамдын ичинен тирүү суу чыгат».

³⁹39 Ыйса бул сөз аркылуу Өзүнө ишенгендер ала турган Ыйык Рух жөнүндө айтты. Ыйса даңктала элек болгондуктан, Рух бериле элек болчу.

⁴⁰40 Бул сөздөрдү уккан кээ бирөөлөр: «Чын эле, бул - Пайгамбар», - дешсе,

⁴¹41 кээ бирөөлөр: «Бул - Машайак», - дешти. Дагы бирөөлөр: «Жок! Машайак Галилеядан келмек беле?

⁴²42 Ыйык Жазууда: “Машайак Дөөттүн тукумунан, Дөөттүн шаарчасы Бейт-Лехемден келет”, - деп айтылган жок беле?» - дешти.

⁴³43 Ошондо эл арасында Ыйса тууралуу талаш-тартыш чыкты.

⁴⁴44 Кээ бирөөлөр Аны кармоого аракеттеништи, бирок Ага эч кимиси кол көтөргөн жок.

⁴⁵45 Кайтып келишкен кызматчылардан башкы ыйык кызмат кылуучулар менен фарисейлер: «Эмне үчүн Аны алып келген жоксуңар?» - деп сурашты.

⁴⁶46 Кызматчылар болсо: «Эч ким эч качан бул Адамдай сүйлөгөн эмес», - деп жооп беришти.

⁴⁷47 Ошондо фарисейлер аларга мындай дешти: «Эмне, силер да алданып калдыңарбы?

⁴⁸48 Башкаруучулардан же фарисейлерден Ага ким ишенди?!

⁴⁹49 Мыйзамды билбеген бул караңгы эл каргышка калсын!»

⁵⁰50 Алардын бири, мурун Ыйсага түн жамынып келип кеткен Никедим, аларга мындай деди:

⁵¹51 «Эмне кылганын адамдын өз оозунан угуп териштирбей туруп, биздин мыйзам боюнча өкүм чыгарууга болобу?»

⁵²52 Ошондо ага: «Эмне, сен да Галилеядансыңбы? Изилдеп көр, Галилеядан пайгамбар чыкпай тургандыгын ошондо билесиң», - деп жооп беришти.

⁵³53 Андан кийин баары тең үйлөрүнө тарап кетишти.