Read Кыргыз тилиндеги Жаны Келишим (Луч Надежды) Жакан 9 Bible Online

Жакан 9 - Кыргыз тилиндеги Жаны Келишим (Луч Надежды) bible

Жакан 9

¹1 Ыйса кетип бара жатып, тубаса сокур адамды көрдү.

²2 Шакирттери Андан: «Устат, бул кишинин сокур болуп төрөлүшүнө кимдин күнөөсү себеп болду: өзүнүкүбү же ата-энесиникиби?» - деп сурашты.

³3 Ыйса мындай деп жооп берди: «Өзүнүкү да, ата-энесиники да себеп болгон жок. Анын жашоосунда Кудайдын кудурети көрсөтүлүшү үчүн ушундай болду.

⁴4 Күндүз Мени Жибергендин иштерин кылышым керек. Түн келет, ошондо эч ким эч нерсе кыла албай калат.

⁵5 Мен бул дүйнөдө болуп турганда, дүйнөнүн жарыгымын».

⁶6 Ушул сөздү айткандан кийин, Ал жерге түкүрүп, топурактан ылай жасады да, аны сокур адамдын көзүнө сүйкөп, мындай деди:

⁷7 «Силоом (бул сөз «Жиберилген» деп которулат) көлмөсүнө барып жуун!» Ал барып жуунганда, көзү ачылды. Ал кайтып келгенде,

⁸8 коңшулары жана анын мурун сокур экенин көргөндөр: «Бул киши ушу жерде кайыр сурап отурган киши эмеспи?» - деп жатышты.

⁹9 Бирөөлөрү: «Ошол» дешсе, бирөөлөрү: «Жок, бул ошого окшош экен», - дешти. Өзү болсо: «Ошол менмин», - деди.

¹⁰10 Ошондо алар андан: «Көздөрүң кантип ачылды?» - деп сурашты.

¹¹11 Ал мындай деп жооп берди: «Ыйса деген Киши ылай жасап, көзүмө сүйкөп: “Силоом көлмөсүнө барып жуун!” - деди. Мен барып жуундум, ошондо көздөрүм ачылды».

¹²12 Алар андан: «Ал кайда?» - деп сурашты. «Билбейм», - деп жооп берди ал.

¹³13 Ошондо алар мурун сокур болгон бул кишини фарисейлердин алдына алып барышты.

¹⁴14 Ыйса ылай жасап, анын көзүн ачкан күн ишемби күн болчу.

¹⁵15 Фарисейлер да ал кишиден көзүнүн кантип көрүп калганын сурашты. «Ал көзүмө ылай сүйкөдү, анан мен жуундум, азыр көзүм көрүп жатат», - деп жооп берди ал.

¹⁶16 Ошондо фарисейлердин кээ бирөөлөрү: «Ал Адам Кудайдан эмес. Анткени ишемби күнүн сактабайт экен», - дешсе, кээ бирөөлөрү: «Күнөөкөр адам ушундай кереметтерди жасай алмак беле?» - дешти. Ошентип, алардын арасында талаш чыгып кетти.

¹⁷17 Анан алар сокур адамдан: «Ал сенин көзүңдү ачпадыбы, Ал тууралуу сен эмне дейсиң?» - деп, дагы сурашты. Ошондо ал: «Ал - пайгамбар», - деп жооп берди.

¹⁸18 Бирок жүйүттөр көзү ачылган кишинин мурда сокур экенине, азыр көрүп калгандыгына ата-энесин чакыртып келмейинче ишенишкен жок.

¹⁹19 Алардан: «Сокур болуп төрөлгөн балаңар ушулбу? Азыр ал кандайча көрүп калды?» - деп сурашты.

²⁰20 Ата-энеси аларга: «Бул биздин балабыз, анын сокур болуп төрөлгөнү чын.

²¹21 Бирок азыр анын көзү кандайча көрүп калгандыгын билбейбиз, көзүн ким ачканын да билбейбиз. Бала эмес го, өзүнөн сурагыла, өзү айтып берсин», - деп жооп берди.

²²22 Ата-энеси жүйүттөрдөн корккондуктан, ушинтип жооп берди. Анткени жүйүттөр «Ким Аны Машайак деп кабыл ала турган болсо, ал синагогадан чыгарылсын» деген чечим чыгарып коюшкан эле.

²³23 Ошондуктан ата-энеси: «Бала эмес го, өзүнөн сурагыла», - деген эле.

²⁴24 Ошондо фарисейлер мурун сокур болгон кишини экинчи ирет чакырышты да: «Кудай алдында чыныңды айт, биз ал Адамдын күнөөкөр экендигин билебиз», - дешти.

²⁵25 Ал мындай деп жооп берди: «Анын күнөөкөр же күнөөкөр эмес экенин билбейм. Бир гана нерсени билем: мен сокур болчумун, азыр көзүм көрүп калды».

²⁶26 «Ал сага эмне кылды? Көзүңдү кантип ачты?» - деп, алар дагы сурашты.

²⁷27 «Айтып эле жатпаймынбы, өзүңөр укпай жатасыңар го. Дагы эмнени уккуңар келет? Же силер да Анын шакирти болгуңар келип жатабы?» - деп жооп берди ал.

²⁸28 «Анын шакирти сенсиң, биз болсо Мусанын шакирттерибиз», - деп, фарисейлер аны жекиришти да:

²⁹29 «Кудайдын Мусага сүйлөгөнүн билебиз, ал эми Жанагынын кайдан келгенин билбейбиз», - дешти.

³⁰30 Ошондо көзү көрүп калган адам аларга мындай деп жооп берди: «Анын кайдан келгенин билбегениңер кызык экен. Ал менин көзүмдү ачпадыбы.

³¹31 Кудайдын күнөөкөрлөрдү укпай тургандыгын билебиз. Бирок ким Кудайдан коркуп, Анын эркин аткарса, Кудай аны угат.

³²32 Бирөө тубаса сокурдун көзүн ачты дегенди эч ким эч качан уккан эмес.

³³33 Эгерде Ал Адам Кудайдан болбосо, мындай ишти кыла алмак эмес».

³⁴34 Ошондо алар: «Күнөөкөр болуп төрөлгөн сен бизди окуткуң барбы?» - деп, аны ийбадатканадан кууп чыгышты.

³⁵35 Аны ийбадатканадан кууп чыгышканын Ыйса укканда, аны таап: «Сен Кудайдын Уулуна ишенесиңби?» - деп сурады.

³⁶36 Ал Ага: «Мырза, Ал Ким? Мен Ага ишенейин», - деди.

³⁷37 Ыйса ага: «Сен Аны көрдүң. Ал азыр сени менен сүйлөшүп жатат», - деди.

³⁸38 Ошондо ал: «Ишенем, Теңир!» - деп, Ага таазим кылды.

³⁹39 Анан Ыйса: «Мен бул дүйнөгө көзү көрбөгөндөр көрсүн, көргөндөр сокур болсун деп өкүм чыгаруу үчүн келгем», - деди.

⁴⁰40 Анын жанында турган кээ бир фарисейлер муну укканда: «Эмне, биз да сокурбузбу?» - дешти.

⁴¹41 «Эгерде сокур болсоңор, анда мойнуңарда күнөө жок болмок. Бирок көзүбүз көрөт деп жатканыңар үчүн, күнөөңөр мойнуңарда калат», - деди Ыйса аларга.