Read Кыргыз тилиндеги Жаны Келишим (Луч Надежды) 2 Тиметейге 4 Bible Online

2 Тиметейге 4 - Кыргыз тилиндеги Жаны Келишим (Луч Надежды) bible

2 Тиметейге 4

¹1 Ошондуктан Кудайдын алдында жана Өзүнүн падышалык бийлиги менен кайтып келип, тирүүлөрдү да, өлгөндөрдү да соттой турган Ыйса Машайактын алдында мен сага буйрук кыламын:

²2 Кудайдын сөзүн айт, аны ыңгайы келсе да, ыңгайы келбесе да айтууга даяр бол, ашкереле, тыюу сал, акыл-насаат айт, чыдамдуулук менен үйрөт.

³3 Анткени адамдар туура окутууну кабыл албай, кошомат кылып сүйлөй турган окутуучуларды өз каалоолору боюнча тандап кала турган убак келет.

⁴4 Чындыкты уккулары келбей, тамсилдерге кулак төшөп калышат.

⁵5 Бирок сен бардык нерседе кыраакы бол, кыйынчылыктарга чыда, Жакшы Кабар таратуучулук милдетиңди аткар, өз кызматыңды аягына чыгар.

⁶6 Анткени мен курмандыкка чалынуунун алдында турам, менин бул дүйнө менен коштошор убактым келди.

⁷7 Мен жакшы күрөштүм, жарыштын аягына чыктым, ишенимди сактадым.

⁸8 Азыр болсо мага адилеттиктин таажысы даярдалып жатат. Адилет Сот - Теңир аны мага ошол Күнү берет, мага эле эмес, Анын келишин чыдамсыздык менен күткөндөрдүн баарына берет.

⁹9 Мага тезирээк келүүгө аракет кыл.

¹⁰10 Анткени Демас бул дүйнөнү сүйүп, мени таштап, Тесалоникага кетип калды. Кирескес Галатияга, Тит Далматияга кетти. Бир гана Лука мени менен калды.

¹¹11 Маркты өзүң менен кошо ала кел, анткени кызмат кылышы үчүн, ал мага керек.

¹²12 Тихикти Эфеске жибердим.

¹³13 Келериңде Троастагы Карпостукуна калтырып кеткен чапанымды жана китептеримди, айрыкча булгаары китептеримди ала кел.

¹⁴14 Жез иштетүүчү уста Искендер мага көп жамандык кылды. Теңир ага иштерине жараша тиешесин берсин!

¹⁵15 Андан сен да сак бол, анткени ал биздин айткан сөздөрүбүзгө аябай каршы чыгып жатат.

¹⁶16 Мен биринчи жолу сот алдында коргонуу сөзүн сүйлөп жатканымда, эч ким жанымда болгон жок, мени бардыгы таштап кетишти. Кудай муну аларга күнөө катары эсептебесин!

¹⁷17 Бирок Жакшы Кабар мен аркылуу таратылып, бардык бутпарастар угушу үчүн, Теңир жанымда болуп, мага күч берди. Ошентип, мен арстандын азуусунан куткарылдым.

¹⁸18 Теңир мени ар кандай жамадыктан куткарып, Өзүнүн Асмандагы Падышачылыгы үчүн сактайт. Ал түбөлүккө даңктала берсин! Оомийин.

¹⁹19 Прискила менен Акилага, Онесепордун үй-бүлөсүнө салам айтып кой.

²⁰20 Эраст Корунтта калды. Ал эми ооруп калган Трофимди Милетке калтырдым.

²¹21 Кышка чейин келүүгө аракет кыл. Эйбул менен Пуд, Линос менен Клавдия жана бардык бир туугандар сага салам айтып жатышат.

²²22 Теңир Ыйса Машайак сенин рухуң менен бирге болсун. Теңир силерге ырайымын төгө берсин! Оомийин.